1 Korɛnti ye 6
6
Kútiiw kúunnɔ senyɛ̀nnɛ na
1Nyàʔá na kàsii ga pye yele wàa ní senyɛnwaa nínge ni, wi n zǐn wɔ́ɔ̀ fɔ̀lɔ n wi kɔ́ri n kári n sáà yére sìndagabèle yɛ́ʔɛ ma pe wi cɔɔnri, wi a Kolocɔlɔɔ syɛɛncanbèle yaʔa pe wi cɔɔnri í? 2Yele ga gi cán ncan Kolocɔlɔɔ syɛɛncanbèle a ba kútiiw kúun dulunyanw syɛ̀ɛnnɛ na ì? Ki si ga pye yele a ba kútiiw kúun dulunyanw syɛ̀ɛnnɛ na, yele ga yɛlɛ bi gbǎn ra kapiipiigèle cɔɔnri yeyɛɛ níngi ni ì? 3Yele ga gi cán ncan wolo a ba kútiiw kúun nyɛ̀ʔɛni tundunbéle na ì, n náa kɔ́ɔ̀ yére dulunyanw naa kèlē na? 4Dulunyanw kérigèle kèle ga nyáʔami yele níngi ni, syɛ́ɛnbèle bele be nyɛ lè Egiliziw o be córo í, yele n sáà bele bee pye lé kútiiceribéle? 5Mii i gi nyuu bi fɛ̀ɛrɛ wáa yele na. Ki n nyaa sícilio o nyɛ yele níngi ni wee wi a gbǎn ra wi senyɛnbèle kèlē cɔɔnri lè í! 6Fwɔɔ a senyɛnwaa i wi senyɛnnɛ kɔ́ri ni syée kútiiw na sìndagabèle yɛ́ʔɛ ma!
7Yele n kolo n kwɔ́ɔ felege o felege na, àmɛɛ yele yeyɛɛ kɔ́ri ni syée lè kútiiw na. Kapeegèle be kpéʔele yele na lè, yele da yɛlɛ bi gi kpàraco ì? Amɛɛ be yúu yele ma lè, ki da yɛlɛ yele í gi kpàraco ì? 8Yele si ye nyɛ kapeebyebèle, ní kàyuubèle, yele tágafɔnyɛnbèle pèle na si yele koro kpéʔele! 9Yele ga gi cán ncan kakolobyebèle a gbǎn Kolocɔlɔɔ fǎngi kɔ́rigɔ lìi í ì? Ye a kɔ́ ra yeyɛɛ váana í, kanɔnʔɔbyebèle, ní sunvɔbèle, ní màde-gbɔ̀ʔɔrɔbèle, ní ceyuubèle, ní nànyuubèle, ní nànjaanǎnbèle, ní cecaacebèle, 10n náà fàra kàyuubèle, ní nyabɛɛnni fɔ̀ɔlɔ, ní singbaadinbèle, ní syɛɛntɛʔɛlɛbèle, ní syɛɛnnɔʔɔrɔbèle na, bele bee wàa faala a gbǎn Kolocɔlɔɔ fǎngi kɔ́rigɔ lìi í. 11Anbée si yele pèle da pye. Kàjáa Kolocɔlɔɔ Pǐli n yele fúnyi jée n mùnu n kapeegèle láʔa yele na, níì sínni kaan yele ma wolo Kàfɔw Zyezu Kirisi mɛ́ɛgi na.
Ye yele céri le Kàfɔw kpɔ̀ʔɔrɔlɔ fáli ni
12 #
1Kor 10:23
Mii a gbǎn kérigèle myɛ kpéʔele, koro i nyɛ kányɛʔɛ, kàjáa ye gi cán tɔ̀nɔ o nyɛ ke myɛ ni í, mii a gbǎn kérigèle myɛ kpéʔele, kàjáa mii si a pye li làa faala púlo í. 13Yaliiri i nyɛ fícɛnni wóro, fícɛnni si wɔ́ɔ i nyɛ yaliiri wólo, koro i nyɛ kányɛʔɛ, kàjáa Kolocɔlɔɔ a ba ti myɛ siinw kwɔ́ɔ. Céri si ga kpéʔele kanɔnʔɔri kéele na í. Ti n kpéʔele Kàfɔw kéele na, Kàfɔw si wɔ́ɔ i nyɛ céri kéele na. 14Kolocɔlɔɔ wi Kàfɔw nyán n yìrige lè, woro wi a wɔ́ɔ ba wolo nyán yìrige wi séew báriga ni.
15Yele ga gi cán ncan yele céri i nyɛ Kirisi céri tɛ́ɛyaa ì? A gi si yɛlɛ lé mii í Kirisi céri tɛ́ɛgaa láa bi pínɛ ní nànjaacew wóro ní? Koro ga yɛlɛ gi pye nyáana í. 16#Sél 2:24 Yele ga tɔ̀ʔɔ̂ gi cán ncan wee wi ga nànjaacɔɔ̀ taa lè, wee bee n pye cere nibin ní wi ní ì? Níì cán Kolocɔlɔɔ n jo «pe siinw a ba pye cere nibin.» 17Wee si wi tan lè Kàfɔw na, wi n pínɛ ní wi ní pìle nibin na.
18Yaa còʔoró yaa léeli kanɔnʔɔri na. Kapeele o kapeele syɔɔn kpéʔele lè, wi céri na ban wi li kpéʔele í. Kàjáa wee wi ga kanɔnʔɔrɔ kpéʔele lè, wi n kapeele taʔa wi tiimaa céri na. 19#1Kor 3:16; 2Kor 6:16 Yele ga wɔ́ɔ̀ gi cán ncan yele céri i nyɛ Pìicǎnni kpɔ̀ʔɔrɔlɔ kpaʔa ì lee yele taa Kolocɔlɔɔ ma lè, lee li nyɛ yele fúnyi ni lè? Ní wɔ́ɔ̀ gi cán ncan yele o nyɛ yeyɛɛ wòolo í ì? 20Níì cán wi n yele syɔɔ lɔgbanra na. Koro na yaa Kolocɔlɔɔ kpɔ̀ʔɔrɔ́ ní yele céri ní.
Currently Selected:
1 Korɛnti ye 6: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
