1 Korɛnti ye 5
5
Kanɔnʔɔri kéele, Egiliziw ni
1 #
Làlw 23:1
Pe i yele kéeli nyuu ni máari níì jo, kanɔnʔɔraa i yaà yele níngi ni, dee félege di nyɛ lè àlí sìndagabèle o di kpéʔele í. Koro gi nyɛ wàa n wi toò cɔ́ɔ láa. 2A yele si kòro kpɔ́ɔmi na ni kpéʔele! Bi gi taa ki maa yɛlɛ yele í dée pye funbɛɛnrɛ na si kéeli bee kpéʔelefɔlɔ yirige yeyɛɛ níngi ni! 3Alí mii ga pye mii o yaà yele níngi ni céri kàbaan na í, ye gi cán mii sɔ̀nguri i yaà yele ma, mii n kútiiw kúun n kwɔ́ɔ kéeli bee kpéʔelefɔlɔ na, mɔ a jo mii i yaà ní yele ní. 4Yele ga yeyɛɛ gbóʔoro Kàfɔw Zyezu mɛ́ɛgi na, ní mii sɔ̀nguri ní n fàra wolo Kàfɔw Zyezu séew na, 5ki n yɛlɛ yele í syɔ́ɔnw bee félege kaan Sutanaw ma, jàngó wi céri í kálagi koro ga pye wi pǐli si syɔɔ Kàfɔw canʔa na.
6 #
Gal 5:9
Yele kpɔ́ɔmi ga nyɔɔ í! Yele ga cán pe ga levé* cɛɛri le búrumii-pírigege ni, wi n cariga n búruw myɛ foro ì? 7#Yir 12:5 Ye levélɛɛw yirige yeyɛɛ ni, koro ga pye yele si pye búrufɔ́ɔn, àmɛɛ yele nyɛ lè levé fun, níì cán pe n wolo sɔ̀lɔ-mí-yaʔali séri byà kpóo n kwɔ́ɔ wi nyɛ lè Kirisi. 8#Yir 13:7; Làlw 16:3 Koro na gi yɛlɛ wolo í sériw kpéʔele ní levé fun búruw ní wi lè sínni ní kányɛɛgi, ki ga yɛlɛ wolo í wi kpéʔele ní levélɛɛw ní í wi lè funbeegi ní kakolobyeri.
9Sɛ́bɛw mii da sɛ́bɛ n tórigo yele ma lè, mii maa yele pye ye a kɔ́ pínɛ ní kanɔnʔɔbyebèlē ní í. 10Kàjáa dulunyanw kanɔnʔɔbyebèlē, ní nyabɛɛnni fɔ̀ɔlɔ, ní syɛɛnnɔʔɔrɔbèle, ní sunvɔbèle, ní màde-gbɔ̀ʔɔrɔbèle kéele na ban mii da gi joo í. Ki ga maa pye poro kéeli na mii nyɛ, ki mǎà dée yɛlɛ yele í yiri dulunyanw ni. 11Tɔ́ɔliw ni gee mii nyuu lè yele ma, koro gi nyɛ ye a kɔ́ pínɛ ní wàa ní í wee wi wiyɛɛ yiri lè senyɛnwaa ní si i nyɛ kanɔnʔɔbyeo, wàlá nyabɛɛnnɛfɔlɔ, wàlá sunvɔlɔ, wàlá màde-gbɔ̀ʔɔrɔɔ, wàlá syɛɛntɛʔɛlɛɔ, wàlá singbaadiɔn, wàlá syɛɛnnɔʔɔrɔɔ, yele ní wee bee wàa a caa kɔ́ pínɛ lìi nyáana í.
12Bele be nyɛ lè kàfugi wòolo, mɛ̀ɛ́ mii tɔ́lɔgi a nyaa poro kútii kúun kéeli ni bi sɛ́ɛ? Kpáagi wòolo na ban yele kútiiw kúunri ì? 13#Làlw 13:5; 17:7 Kolocɔlɔɔ wi a kàfugi wòolo kútii ceri. Ye syɛɛnpeew bee yirige yeyɛɛ níngi ni.
Currently Selected:
1 Korɛnti ye 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
