1 Korɛnti ye 4
4
Kirisi pìitunbèle
1Kánmi bee na syɛ́ɛnbèle yɛlɛ paa wolo córo Kirisi falipyebèlē ní Kolocɔlɔɔ kalaragèle cɔɔnrifɔɔlɔ. 2Ki si n yɛlɛ kacɔɔnriɔ í pye tágala syɔ́ɔn. 3Yele ga mii sɛʔɛ n wéle, koro ga jáa pe ga mii sɛʔɛ n wéle syɔɔn ye kútiijoo-tɛ́ɛgaa ni, gee bee o nyɛ mii nyɛ́nɛ na yarigaa í. Mii tiimaa a caa wɔ́ɔ niyɛɛ zɛʔɛ í, 4níì cán mii fúngi o mii kábala yafyɛn na í. Gee bee si ban gi mii kaan a mii sín í. Mii sɛʔɛfɔw wi nyɛ Kàfɔw. 5Koro na yele a kɔ́ kútii kúun wàa na sáni lǎli í nan lè í, gee bee n jo sáni Kàfɔw í pan lè í, woro wi a ba yébilimi yárira myɛ yirige gbɛ̀ɛ́nmi na, si syɛ́ɛnbèle fúnyo sɔngurɔ tɛ̀ɛn kàfugi na. Lǎli bee ni syɛ́ɛnbèle myɛ nibin nibin a pe kpɔ́ʔɔri taa Kolocɔlɔɔ ma.
6Ni senyɛ̀nnɛ, mii n kérigèle naa joo yele ma mii ní Apolɔsi kéeli na koro ga pye wolo kéeli í yele tama yele í gi cán ki ga yɛlɛ yele í kɔ́ sɔ̀lɔ syɛɛnsɛbɛgwɔɔri na í, koro ga pye yele wàa faala a kɔ́ ra wiyɛɛ gbɔ́ʔɔgi ní syɔɔnwaa kéele ní í, sáā tíri yeyɛɛ na í. 7Wìí wi gi joo mɔ ma níì jo mɔ n pɔ́rɔ n sɔ̀lɔ pèle na? Ba nyàʔá gi nyɛ mɔ ma, gee gi lè Kolocɔlɔɔ ga gi kaan mɔ ma í? Wi si gi kaan mɔ ma lè, nyàʔá na mɔ miyɛɛ gbɔ́ʔɔgi gi kéeli na mɔ a jo wàa ban wi gi kaan mɔ ma í?
8Gee myɛ yele caa lè, ki i nyɛ yele ma n kwɔ́ɔ, yele n lɔ́ri taa n kwɔ́ɔ, yele i nyɛ fànʔafɔɔlɔ níì wolo yaʔa! Ki a dée pɔ́rɔ yele í pye fànʔafɔɔlɔ kányɛʔɛ ni, koro ga pye wolo í wɔ́ɔ pye fànʔafɔɔlɔ ní yele ní. 9Ki i nyɛ mii nyɛ́nɛ na n jo, Kolocɔlɔɔ n gi yaʔa wolo bele wo nyɛ lè pìitunbèle wolo í pye syɛ́ɛnbèle myɛ kàdoʔo ma, ki pye mɔ a jo pe n wolo tɛ́ʔɛ kùúw kánma na, níì cán wolo i nyɛ yaweleye dulunyanw ni, nyɛ̀ʔɛni tundunbéle ní syɛ́ɛnbèle myɛ ma. 10Wolo i nyɛ nilabalabéle Kirisi kéeli na, yele si i nyɛ sícilibēle Kirisi ni. Wolo i nyɛ fànʔa fun, yele si i nyɛ ní fànʔa ní. Pe n yele kpɔ́ʔɔ, níì wolo faʔa! 11Kateegi ní lògbaagi i nyɛ wolo na, fwɔɔ n baa nan lǎli naa na, wolo wɔ́ɔ i nyɛ fànileo fun, pe i wolo kpúmɔn, wolo si wɔ́ɔ i nyɛ tɛɛkòroyo fun. 12#Kap 18:3 Wolo i báara ní wolo tiimaa kɔ́yi ní ni fɔ̀rɔgí. Syɛ́ɛnbèle i wolo teeri, wolo si i dùbaw kpéʔele be ma. Pe i wolo wɔʔɔ, wolo si i gi kpàracó. 13Pe i wolo mɛ́ɛpɛɛnyi yiri, wolo si i be kpɛʔɛlɛ. Wolo n baa pye àmɛɛ dulunyanw yanɔnʔɔrɔ nyɛ lè, pe i còʔoró wolo na n sɔ̀lɔ yáriri myɛ na, fwɔɔ n baa nan lǎli naa na.
14Mii ga syɛ́ɛnri naa sɛ́bɛ bi fɛ̀ɛrɛ wáa yele na wii í. Kàjáa a mii di sɛ́bɛ bi yele sàmi wii, àmɛɛ syɔɔn wi pìinidaanmabéle sàmí lè. 15Alí tamafɔɔlɔ selebingéle kagunɔ ga pye yele ma Kirisi ni, ye gi cán yele tóobèle ga nɛʔɛ í, níì cán mii wi yele see Kirisi Zyezu ni Syɛɛnjóocǎnri báriga ni. 16#1Kor 11:1; Filip 3:17 Koro na mii i yele nyɛ́ɛri, yaa mii tɛ́ɛlɛ. 17Koro kéeli na mii Timɔte tun yele ma, wi nyɛ lè mii pìinidaanmaw Kàfɔw ni, ní i nyɛ tágala syɔ́ɔn. Woro wi a yele sɔ̀ngí taa mii tánʔaganmi na Kirisi Zyezu ni, bi fàra kérigèle na mii syɛ́ɛnbèle tama lè egilizibèle myɛ ni tɛ́ɛyi myɛ ni.
18Pèle i peyɛɛ gbɔ́ʔɔgi ní i gi sɔ̀ngí mii a ní kári yaà yele ma wii í. 19Kàjáa cɛɛri ga pye mii a kári yaà yele ma, ní Kàfɔw ga fɔ̀lɔ, lǎli bee ni bele be peyɛɛ gbɔ́ʔɔgi lè, mii a gi cán kapye sée i nyɛ be ma, wàlá kapye syɛɛnjóoro yagana dii. 20Níì cán Kolocɔlɔɔ fǎngi o nyɛ syɛɛnjóoro kéele yagana í, fwɔɔ sée kéele. 21Gìí gi pɔ́rɔ yele ma? Mii í kári yele ma ní sàbinnɛ ní láà, koro ga jáa mii í kári ní tàmaga, ní fûnnyinge ní?
Currently Selected:
1 Korɛnti ye 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
