1 Korɛnti ye 3
3
Kolocɔlɔɔ falipyebèle
1Ni senyɛ̀nnɛ, mii da gbàn ni nyuu ní yele ní àmɛɛ gi yɛlɛ paa nyuu ní Pìicǎnni kôdanʔabéle ní lè í, fwɔɔ àmɛɛ céri kôdanʔabéle nyɛ lè, ní àmɛɛ pìibēle nyɛ lè Kirisi ni. 2#Heb 5:12-13 Yiremɛ mii da ni kaangi yele ma, yaliinirire ban ti da pye í, níì cán yele da pye bi gbǎn di lìi í. Alí níjanʔa yele ga kɔ́ɔ̀ gbàn ni di líi í, 3níì cán yele sèʔé i nyɛ céri kôdanʔabéle. Amɛɛ nyabɛɛnni ní kàsiiw yaà lè yele níngi ni, koro ga gi tɛ̀ɛn n jo yele i nyɛ céri kôdanʔabéle ì? Yele o táanri àmɛɛ dulunyanw syɛ̀ɛnnɛ nyɛ lè ì? 4#1Kor 1:12 Wàa ga jo: «Mii i nyɛ Pɔli wóo!» A wee jo: «Mii i nyɛ Apolɔsi wóo!» Koro ga gi tɛ̀ɛn n jo yele myɛ i táanri àmɛɛ dulunyanw syɛ̀ɛnnɛ nyɛ lè ì? 5Apolɔsi wi nyɛ wìí? Ba Pɔli wi nyɛ wìí? Wolo i nyɛ falipyebèlē yagana, wolo wo pye sábabu á yele tága, àmɛɛ Kàfɔw fáliw kaan lè wo myɛ ma feleye feleye. 6#Kap 18:4-11,24-28 Mii wi lùguri lùgu, á Apolɔsi si di fɔɔn, kàjáa Kolocɔlɔɔ wi di kaan ti i leegi. 7Gee bee na ti lùgufɔw o nyɛ yarigaa í, ti fɔɔnfɔw o wɔ́ɔ̄ nyɛ yarigaa í, fwɔɔ Kolocɔlɔɔ, woro wee wi di kaan ti i leegi lè. 8Wee wi di lúru lè ní wee wi di fɔɔnri lè, pe myɛ i nyɛ nibin. Pe myɛ a be sàraw taa nibin nibin bi yɛlɛ ní be tiimaa fáliw ní. 9Níì cán wolo i nyɛ Kolocɔlɔɔ falipyenyɛ̀nnɛ. Yele si i nyɛ Kolocɔlɔɔ ségi gee wi fála lè, ní wɔ́ɔ i nyɛ wi kpáagi gee wi faanri lè.
10Mii i nyɛ àmɛɛ kpaafaan-sícilio nyɛ lè níì kpáagi kàpɔɔn le n yɛlɛ ní kpɔ́ʔɔri ní Kolocɔlɔɔ kaan mii ma lè, wàa nikwɔɔ si i faanri wi na. Kàjáa syɔɔn o syɔɔn n yɛlɛ waa kɔ̀rɔsíi àmɛɛ wi faanri lè wi na. 11Níì cán kpáagee kàpɔɔn be le n kwɔ́ɔ lè, syɔɔn a ní gbǎn wàa nikwɔɔ le ní wi ní í, kàpɔɔnw bee wi nyɛ Zyezu Kirisi. 12Wàa si ga faan kàpɔɔnw bee na ní tɛɛ̀ ní, wàlá ní wálifiio ní, wàlá ní lɔgbanra kadɛnɛyɛ ní, wàlá ní tiire ní, wàlá ní sìcere ní, koro ga jáa ní nyàányɛɛɔn ní, 13pe myɛ nibin nibin fáli a ba yiri gbɛ̀ɛ́nmi na. Níì cán náagi a ba wi kánmi tɛ̀ɛn cángi bee na, a syɔ́ɔnw fáli nyɔɔ yoo, wi ga nyɔɔ í yoo, náagi a ba wi sɛʔɛ, si wi félegi tɛ̀ɛn. 14Syɔ́ɔnwee wi ga faan lè kàpɔɔnw bee na, ní wi fáliw ga kòro sìngalagi ni, wi a sàra taa. 15Syɔ́ɔnwee fáli si ga sógi lè, wee bee a fɔ̀n. Kàjáa wi tiimaa a syɔɔ, ki a pye mɔ a jo wi n náagi wáa n pari.
16 #
1Kor 6:19; 2Kor 6:16 Yele ga tɔ̀ʔɔ̂ gi cán ncan yele i nyɛ Kolocɔlɔɔ kpɔ̀ʔɔrɔli kpaʔa ì? Ní wɔ́ɔ̀ gi cán ncan Kolocɔlɔɔ Pǐli n tɛ́ɛn yele fúnyi ni ì? 17Wàa ga Kolocɔlɔɔ kpɔ̀ʔɔrɔli kpaʔa kálagi, Kolocɔlɔɔ a wɔ́ɔ wee bee kálagi. Níì cán Kolocɔlɔɔ kpɔ̀ʔɔrɔli kpaʔa i nyɛ fɔɔnrɔ fun, koro si gi nyɛ yele.
18Syɔɔnwaa faala a kɔ́ ra wiyɛɛ váana í, wàa ga pye yele níngi ni ni sɔ̀ngí woro i nyɛ dulunyanw naa síciliwaa, ki n yɛlɛ wi wiyɛɛ bye nilabalaɔ, koro ga pye woro si náa pye sícilio. 19#Zyɔb 5:13 Níì cán dulunyanw naa sícilimɛ i nyɛ labalama Kolocɔlɔɔ nyɛ́nɛ na. Koro gi wɔ́ɔ̀ sɛ́bɛ níì jo: «Wi i sícilibèle có be sícilibeegi na.» 20#Ŋún 94:11 Ní níì jo: «Kàfɔw n sícilibèle sɔ̀ngurɔ cán, wi n gi cán ti i nyɛ gbanzan.» 21Koro na syɔɔnwaa faala a kɔ́ ra wiyɛɛ gbɔ́ʔɔgi ní syɔɔnwaa kéele ní í. Níì cán yáriri myɛ i nyɛ yele wóro, 22Pɔli yoo, Apolɔsi yoo, Sefasi yoo, dulunyanw yoo, sìíw yoo, kùúw yoo, lǎli naa yárira yoo, lǎlee li maa lè loro yáriri yoo. Ti myɛ i nyɛ yele wóro, 23yele si i nyɛ Kirisi wòolo, Kirisi si i nyɛ Kolocɔlɔɔ wóo.
Currently Selected:
1 Korɛnti ye 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
