1 Korɛnti ye 2
2
Kirisi kéeli joolo, wee be kóri tiiparigi na lè
1Ni senyɛ̀nnɛ, lǎlee ni mii da kári yaà yele ma lè n sáà Kolocɔlɔɔ séeraw syɛ́ɛnrɛ joo lè, mii da sáà di joo yele ma syɛɛnjóokpoloro ni wàlá sícili-zyɛ́ɛnrɛ ni í. 2Níì cán n mii yaʔa yele níngi ni, mii maa gi tímana mii fúngi ni n gi nyaa, ki ga yɛlɛ mii í kɔ́ yarigaa nikwɔɔ joo yele ma í, kapye Zyezu Kirisi kéeli ban í, àmɛɛ wi kùu lè tiiparigi na. 3#Kap 18:9 Gee gi mii tiimaa kéeli kwɔ́ɔ lè, mii maa pye yaà yele ma fànʔa fun, ní i fɛ̀ɛgí, ní wɔ́ɔ i cɛ̀lɛ́ gbanʔama. 4Tamani na mii da yele tama lè, ní Syɛɛnjóocǎnri mii da joo n tɛ̀ɛn yele na lè, mii da di joo yele ma kanmaa na jàngó bi yele fúnyi kàriga ní mii fúngi sícilimɛ ní í. Kàjáa Pìicǎnni fànʔa báriga ni mii da di joo, 5koro ga pye yele tágali a kɔ́ tɛ́ɛn syɛ́ɛnbèle sícilimɛ na í, fwɔɔ li tɛ́ɛn Kolocɔlɔɔ séew na.
Kolocɔlɔɔ sícilimi
6Koro ní ki myɛ ní wolo i sícili-zyɛ́ɛnri nyuu bele nínge ni be nìri n kwɔ́ɔ lè, dulunyanw naa sícilimɛ si ban í, dulunyanw naa fànʔafɔɔlɔ wómɔ wɔ́ɔ ban í, poro i syée kálagili ma. 7Kolocɔlɔɔ sícilimi bi làra lè, poro kéeli wolo nyuu ni tèé, Kolocɔlɔɔ maa sícilimi bee sámaga wolo nìjanri taala kéele na sáni dulunyanw í kpéʔele lè, níì bi làriga. 8Dulunyanw naa fànʔafɔwaa faala ga bi cán í. Níì cán pe ga maa bi cán, pe mǎà dée fɔ̀lɔ bi Kàfɔgbɔɔw kpóo tiiparigi na í. 9#Eza 64:3 Kàjáa koro n taa àmɛɛ gi sɛ́bɛ lè níì jo:
«Gee Kolocɔlɔɔ sámaga lè bele má
be tàmaga le ní woro ní lè,
nyapile ga kɔ́ɔ̀ gi nyaa í,
líiweele ga kɔ́ɔ̀ gi lóʔo í,
àlí ki ga kɔ́ɔ̀ jée syɔɔn fúngo ni í.»
10Wolo si na, Kolocɔlɔɔ n gi tɛ̀ɛn wolo na Pìicǎnni báriga ni, níì cán Pìicǎnni li kérigèle myɛ sɛʔɛ ni cángi, àlí Kolocɔlɔɔ tiimaa fúngi kèlē. 11Koro na wìí wi a gbǎn syɔɔn kérigèle cán, kapye syɔ́ɔnw bee pìle ban í, lee li lè wi fúngi ni? Anbée si gi wɔ́ɔ̄ nyɛ, syɔɔnwaa faala a gbǎn Kolocɔlɔɔ kérigèle cán í, kapye Kolocɔlɔɔ Pǐli ban í. 12Pǐlee si wolo taa lè, dulunyanw naa wólo ban í, li n yìri Kolocɔlɔɔ ma, koro ga pye yáriree myɛ Kolocɔlɔɔ kaan wolo ma lè kpɔʔɔrɔ, wolo í toro cán. 13Yáriri bee syɛ́ɛnrɛ si wolo nyuu, ti o nyɛ syɛ́ɛnbèle sícili-zyɛ́ɛnrɛ í, dee ni be peyɛɛ dama lè í, fwɔɔ Pìicǎnni wóro, dee di Pǐli kèlē tèé lè Pìicǎnni fɔ̀ɔlɔ na.
14Pìicǎnni funvɔwaa o fɔ̀lɔ́ Kolocɔlɔɔ Pǐli kèlē na í, níì cán ke i nyɛ wi nyɛnɛ na labalama, wi a gbǎn ge cán í, níì cán Pìicǎnni báriga ni ke cángi ni láʔala. 15Syɔ́ɔnwee má Pìicǎnni nyɛ lè, wee bee i kérigèle myɛ cángi ni láʔala, kàjáa syɔɔn a gbǎn woro kérigèle cán bi láʔala í.
16 #
Eza 40:13
«Wìí wi Kàfɔw sɔ̀ngurɔ cán
si gbǎn wi tama?»
Wolo si na, Kirisi sɔ̀nguri i nyɛ wolo ma.
Currently Selected:
1 Korɛnti ye 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
