1 Korɛnti ye 1
1
Fòów kéele
1Mii Pɔli Kolocɔlɔɔ yeri lè mii í pye Kirisi Zyezu pìituɔn n yɛlɛ ní woro nyɛ́nɛ kéeli ní, mii ní Sɔsitɛni ní, wi lè wolo senyɛnw, 2#Kap 18:1 wolo a sɛ́bɛw naa tórigo yele ma ye nyɛ lè Kolocɔlɔɔ Egiliziw Korɛnti ni, yele bele Kolocɔlɔɔ nyɛ́nɛ n wòlo lè jàngó yele í pye wi syɛɛncanbéle Kirisi Zyezu ni n fàra bele na be nyɛ lè tɛ́ɛyi myɛ ni ni nyɛ́ɛri Kolocɔlɔɔ ma Zyezu Kirisi mɛ́ɛgi na, wi lè wolo ní poro myɛ Kàfɔw. 3Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma!
Kacǎnyi wo taa Kirisi ni lè
4Mii i bariga kaangi Kolocɔlɔɔ ma làla o làla yele kéeli na, Kolocɔlɔɔ kpɔ́ʔɔri kéele na di kaan yele ma lè Kirisi Zyezu ni, 5woro ni wi yele kpɔ́ʔɔ ní yáriri myɛ ní, n fàra syɛɛnjóori myɛ, ní sícilimi myɛ na. 6Níì cán séeraw wolo kpéʔele lè Kirisi kéeli na, wi syɛ́ɛnri maa sámaga n tɛ́ɛn yele fúnyi ni. 7Koro na yele a tée fɔ̀n yakaanraa faala ni í, àmɛɛ yele lǎli sige lè, lee ni wolo Kàfɔw Zyezu Kirisi a ba wiyɛɛ dɛ̀ɛn lè. 8Woro wi a wɔ́ɔ ra fǎngi nii yele ni fwɔɔ bi ba nan canzangi na, jàngó yele í pye dìgire fun wolo Kàfɔw Zyezu Kirisi cángi na. 9Kolocɔlɔɔ i nyɛ tágala syɔ́ɔn, woro wee wi yele yeri lè n baa pínɛ n pye nibin wi Jáaw Zyezu Kirisi ni, wi lè wolo Kàfɔw.
Wàlila Egiliziw ni
10Ni senyɛ̀nnɛ, mii i yele nyɛ́ɛri wolo Kàfɔw Zyezu Kirisi mɛ́ɛgi na níì jo ye bɛ̀ɛ nibin na, yele a kɔ́ ra wálagi yeyɛɛ na í, fwɔɔ ye pínɛ ye pye nibin, funzɔnguri ní syɛɛnjóori na. 11Níì cán ni senyɛ̀nnɛ, mii n yele kéeli lóʔo Kulowe kpáagi wòolo ma, a be jo kàsii i yaà yele níngi ni. 12#Kap 18:24 Koro gi nyɛ yele i gi nyuu yaà yeyɛɛ ma kánmi naa na: «Wàa a jo: ‹Mii i nyɛ Pɔli wóo!› Wee si jo: ‹Mii i nyɛ Apolɔsi wóo!› Wàa si ní jo: ‹Mii i nyɛ Sefasi wóo!› Wee si mɛ̀ɛ́ níì jo: ‹Mii i nyɛ Kirisi wóo!› » 13A yele jo lé Kirisi n tíla? A be Pɔli kóri lé tiiparigi na yele kéeli na? Ba Pɔli mɛ́ɛgi na lé yele batize?
14 #
Kap 18:8; 19:29; Wɔr 16:23 Mii i bariga kaangi Kolocɔlɔɔ ma àmɛɛ gi nyɛ lè mii ga yele wàa faala batize í, kapye Kirisipusi ní Gayusi ban í. 15Koro na syɔɔnwaa faala a gbǎn joo yele n batize mii mɛ́ɛgi na í. 16#1Kor 16:15 Mii wi níì Sitefanasi kpáagi wòolo batize, wozanbèle na, mii ga gi cán wee mii níì batize lè be ni í. 17Níì cán Kirisi* da mii tun níì jo mii í ba ra syɛ́ɛnbèle batize í, wi maa mii tun mii í ba ra Syɛɛnjóocǎnri nyuu, gee bee si n yɛlɛ gi pye syɔɔn sícili-zyɛ́ɛnrɛ fun, koro ga pye àmɛɛ Kirisi kùu tiiparigi na lè, koro a kɔ́ pye gbanzan í.
Zyezu Kirisi wi lè Kolocɔlɔɔ séew ní wi sícilimi
18Tiiparigi syɛ́ɛnrɛ joolo i nyɛ labalama kéele syɛ́ɛnbèle nyɛ́nɛ na, bele be pùuni lè. Kàjáa wolo bele wo syɔɔ lè, ti i nyɛ wolo ma Kolocɔlɔɔ séew. 19#Eza 29:14 Amɛɛ gi wɔ́ɔ̀ sɛ́bɛ lè níì jo:
«Mii a sícilibèle sícilimɛ kálagi,
si wɔ́ɔ kacánbèle kacánma kàriga
bi pye gbanzan wómɔ.» 20#Zyɔb 12:17; Eza 19:12; 33:18; 44:25 Sán síciliw nyɛ? Ba sán Mowizi làlwaw sɛ́bɛweleo nyɛ? Wàlá lǎli naa kàkabalagafɔlɔ? Kolocɔlɔɔ ga gi tɛ̀ɛn níì jo dulunyanw naa sícilimɛ i nyɛ labalama ì?
21Níì cán dulunyanw syɛ̀ɛnnɛ sícilimɛ ga gbàn n be kaan a be Kolocɔlɔɔ cán í, Kolocɔlɔɔ wi koro kpéʔele nya wi sícilimi báriga ni, ki si n Kolocɔlɔɔ dɛ́nɛ bi tágafɔbèle syɔɔ wi syɛ́ɛnri joolo báriga ni, dee joolo dulunyanw syɛ̀ɛnnɛ córo lè labalama kéele. 22Zyefubèle i kakpoloyo nyɛ́ɛri, Girɛkibèle si i sícilimi caa. 23Wolo si i Kirisi kéeli nyuu woro wee be kpóo lè tiiparigi na, syɛ́ɛnri bee i nyɛ tɛɛtoolo Zyefubèle ma, ní si i nyɛ syɛɛnfeleyi wozanya ma labalama, 24kàjáa bele myɛ Kolocɔlɔɔ nyɛ́nɛ n wòlo lè Zyefubèle yoo, Girɛkibèle yoo, Kirisi i nyɛ bele bee ma Kolocɔlɔɔ séew ní Kolocɔlɔɔ sícilimi. 25Níì cán gee syɛ́ɛnbèle córo lè labalama Kolocɔlɔɔ kàbangi na, labalami bee sícilimɛ n nɛʔɛ n sɔ̀lɔ syɛ́ɛnbèle sícilimɛ na, Kolocɔlɔɔ fǎngi cɛɛri n kpɔ́ʔɔ n sɔ̀lɔ syɛ́ɛnbèle wóʔo myɛ na.
26Ni senyɛ̀nnɛ, yele bele Kolocɔlɔɔ yeri lè, yele ga gi wéle yele a gi nyaa syɛ̀ɛnnɛ saʔa o nyɛ yele níngi ni bele dulunyanw syɛ̀ɛnnɛ córo lè sícilimɛ fɔ̀ɔlɔ céri kàbaan na í, wàlá sée fɔ̀ɔlɔ, koro ga jáa mɛ́ɛkpoloyofɔɔlɔ í. 27Syɛ́ɛnbèle bele dulunyanw syɛ̀ɛnnɛ córo lè nilabalabéle, bele bee si Kolocɔlɔɔ nyɛ́nɛ n wòlo, koro ga pye bi fɛ̀ɛrɛ wáa sícilibèle na. Níì cán syɛ́ɛnbèle bele dulunyanw syɛ̀ɛnnɛ córo lè fànʔa-fùnvɔɔlɔ, Kolocɔlɔɔ n bele bee nyɛ́nɛ n wòlo koro ga pye bi fɛ̀ɛrɛ wáa fǎngi fɔ̀ɔlɔ na. 28Mɛ́ɛpiigèle fɔ̀ɔlɔ, ní bele na dulunyanw syɛ̀ɛnnɛ còʔoró lè, ní bele be lè syɛ́ɛnbèle o be córo syɛ̀ɛnnɛ í, Kolocɔlɔɔ n bele bee nyɛ́nɛ n wòlo jàngó dulunyanw syɛ̀ɛnnɛ í pye gbanzan, 29koro ga pye syɔɔnwaa faala a kɔ́ wiyɛɛ gbɔ́ʔɔ Kolocɔlɔɔ nyɛ́nɛ na í. 30Kolocɔlɔɔ bárigaw ni yele nyɛ Kirisi Zyezu ni, woro Kolocɔlɔɔ kpéʔele wolo ma sícilimi, ní sínni, ní jéemununi, ní syɔɔli, 31#Zyer 9:23 koro na gi yɛlɛ waa gi kpéʔele àmɛɛ gi sɛ́bɛ lè níì jo: «Wàa ga ni wiyɛɛ gbɔ́ʔɔgi, ki n yɛlɛ waa wiyɛɛ gbɔ́ʔɔgi àmɛɛ wi nyɛ lè Kàfɔw ni.»
Currently Selected:
1 Korɛnti ye 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
