1 Korɛnti ye 15
15
Kirisi nyán-yirili kéele
1Ni senyɛ̀nnɛ, mii a yele sɔ̀ngumi tìrige Syɛɛnjóocǎnri na, dee mii da sélì joo yele ma lè, á yele yére di ni níì di cò lè, 2toro dee báriga ni yele wɔ́ɔ̀ syɔɔ lè, ní kapye yele n di kɔn n yɛlɛ ní gi ní àmɛɛ mii da di joo yele ma lè. Kapye koro ban í, yele tágali a pye gbanzan.
3 #
Eza 53:5-12
Dee mii da sélì lóʔo lè, toro mii da wɔ́ɔ̀ joo yele ma ti lè syɛ́ɛnri myɛ nyúngo. Koro gi nyɛ Kirisi n baa kùu wolo kapeegèle kéele na, àmɛɛ Syɛɛnsɛbɛri gi joo lè. 4#Ŋún 16:8-10; Mat 12:40; Kap 2:24-32 A be wi tɔ́n, a wi baa nyán n yìri candaanri wógi na àmɛɛ Syɛɛnsɛbɛri níì gi joo lè, 5#Mat 28:16-17; Mar 16:14; Luk 24:34,36; Zyan 20:19 a wi wiyɛɛ dɛ̀ɛn Sefasi na, ní náà wiyɛɛ dɛ̀ɛn kɛɛ ní siinw na. 6Koro kàdoʔo ma a wi wiyɛɛ dɛ̀ɛn wolo senyɛnbèle pèle na làrinijanna ni, pe n sɔ̀lɔ syɛ̀ɛnnɛ saala siin ní dabata na. Poro pèle saʔa sèʔé i yaà sìi na níjanʔa, á be pèle si kùu n kwɔ́ɔ. 7Koro kàdoʔo ma a wi wiyɛɛ dɛ̀ɛn Zyaki na, ní náà wiyɛɛ dɛ̀ɛn pìitunbèle myɛ na.
8 #
Kap 9:3-6
Bele bee myɛ kàdoʔo ma, a wi wiyɛɛ dɛ̀ɛn mii na, mii wee wi nyɛ àmɛɛ fícarinaa-sìnlɛɛlɛ pya nyɛ lè. 9#Kap 8:3 Níì cán mii wi cɛ́rɛ pìitunbèle myɛ na, mii da caà yɛlɛ paa mii yiri pìituɔn í, níì cán mii maa ni Kolocɔlɔɔ Egiliziw wɔʔɔ. 10Kolocɔlɔɔ kpɔ́ʔɔri báriga ni si mii baa pye kánmi naa na mii nyɛ lè níjanʔa, kpɔ́ʔɔri bee wi kaan mii ma lè, ti ga yiri gbanzan í. Níì cán mii n báara n sɔ̀lɔ pe myɛ na. Koro ní ki myɛ ní mii séew báriga ni ban koro kpéʔele í, Kolocɔlɔɔ kpɔ́ʔɔri di nyɛ mii ma. 11Koro na a gi náà pye mii wi joo yoo, poro be joo yoo, gee wolo nyuu lè, koro wonijangi na yele tága.
Wolo nyán-yirili
12Amɛɛ wo gi nyuu lè níì jo Kirisi n nyán n yiri kúbèle nínge ni, mɛ̀ɛ́ gi nyɛ á yele pèle si i gi nyuu níì jo kúbèle a nyán í. 13Kapye kúbèle a nyán í, gee bee n jo Kirisi ga wɔ́ɔ̀ nyán í. 14Kapye Kirisi ga nyán í, ye gi cán wolo wojoori i nyɛ nyùngo fun, yele tágali si wɔ́ɔ i nyɛ nyùngo fun. 15Kapye kúbèle a nyán kányɛʔɛ ni í, wolo a pye jànvaa séerafɔɔlɔ Kolocɔlɔɔ kérigèle na àmɛɛ wolo séeraw kpéʔele lè níì jo, wi n Kirisi nyán n yìrige bi gi taa wi ga wi nyán í. 16Níì cán kapye kúbèle a nyán í, Kirisi ga wɔ́ɔ̀ nyán í. 17Kapye Kirisi ga nyán í, ye gi cán yele tágali i nyɛ gbanzan. Yele kapeegèle sèʔé i nyɛ yele na, 18bele be nyɛ lè kùúw ŋúnɔmɔ na Kirisi ni, poro n wɔ́ɔ̀ pùuni. 19Kapye dulunyanw naa yagana kéele na wolo wolo sɔ̀ngumi taʔa Kirisi na, wolo i nyɛ nyinimɛ wòolo ní n sɔ̀lɔ syɛ́ɛnbèle myɛ na.
20Kàjáa kányɛʔɛ ni Kirisi n nyán n yiri kúbèle nínge ni, bele be nyɛ lè kùúw ŋúnɔmɔ na, woro wi sélì nyán n yiri bele bee yɛ́ʔɛ ma. 21Níì cán àmɛɛ kùúw jée lè syɔɔn nibin báriga ni, ànbée kúbèle nyán-yirile wɔ́ɔ̀ jée syɔɔn nibin báriga ni. 22Amɛɛ Adami pye lè sábabu syɛ́ɛnbèle myɛ na pé i kúu, ànbée Kirisi wɔ́ɔ̄ nyɛ sábabu syɛ́ɛnbèle myɛ na pé ní pye sìi na. 23Kàjáa pe myɛ a pye ní be làrigēle ní, wozeliw wi nyɛ Kirisi, koro kàdoʔo ma bele be nyɛ lè Kirisi wóbèle, ki a nan poro na wi làribanni ni. 24Gee bee kàdoʔo ma dulunyanw a náa kwɔ́ɔ, Lǎli ni wi a fǎnyi myɛ, ní séew myɛ, ní bárigaw myɛ kwɔ́ɔ lè si fǎngi le Tofɔw Kolocɔlɔɔ kɔ́yi ni. 25#Ŋún 110:1 Níì cán fwɔɔ wi tɛ́ɛn fǎngi na bi taa Kolocɔlɔɔ í wi nigoobèle myɛ cáan wi láari ni. 26Nigoosanw wi a ba kálagi lè, woro wi nyɛ kùúw. 27#Ŋún 8:7 Koro na gi jo Kolocɔlɔɔ n yáriri myɛ le Jaafɔw kɔ́yɔ ni. Kàjáa àmɛɛ gi jo lè wi n yáriri myɛ le Jaafɔw kɔ́yɔ ni, ki n wɔ́ɔ̀ fílige ncan wee wi yáriri myɛ le lè wi kɔ́yi ni, woro tiimaa o nyɛ yáriri bee ni í. 28Kolocɔlɔɔ ga baa yáriri myɛ le wi kɔ́yi ni n kwɔ́ɔ lǎlee ni lè, lǎli bee ni Jaafɔw tiimaa a wiyɛɛ le Kolocɔlɔɔ kɔ́yi ni woro wee wi da yáriri myɛ le lè woro kɔ́yi ni, koro ga pye Kolocɔlɔɔ í sámaga tɛ́ɛn yáriri myɛ nyúngo na.
29Kapye koro ban í, bele be batɛmiw kpéʔele lè kúbèle kéele na, mɛ̀ɛ́ poro a pye? Kapye kúbèle a nyán nyáana í, nyàʔá na si be batɛmiw kpéʔele be kéeli na? 30Nyàʔá na si wolo soro n yére ni kùúw sige làla o làla? 31Ni senyɛ̀nnɛ, canʔa o canʔa mii i nyɛ kùúw kɔ́yɔ ni. Amɛɛ mii nyɔ̌ngbɔɔlɔ táanri lè yele kéeli na wolo Kàfɔw Kirisi Zyezu bárigaw ni, koro na mii gee bee fílige n joo yele ma. 32#Eza 22:13 Amɛɛ mii tún ní sìnbirigi yacobeeye ní Efɛzi ni lè, mii ga maa koro kpéʔele dulunyanw naa tɔ̀nɔ taara kéele na, nyàʔá gee bee a dée nyɔɔ mii na? Kapye kúbèle a nyán í, «ki n yɛlɛ waa líi wáā gbo wó gi cán nyɛ̀ʔɛna wo a kùu.»
33Yele a kɔ́ tíi wàa í yele fáana pùuni í, nyaarinyɛnbeebèle i funjǎnyi kálagi. 34Ye fundeleye le yeyɛɛ ni, yáā kasingéle kpéʔele, yé láʔa kapeegèle na. Níì cán pèle i yaà pe ga Kolocɔlɔɔ cán í, mii n koro joo bi fɛ̀ɛrɛ wáa yele na.
Wonyán-yiribèle cére
35Syɔɔnwaa si a jo: «Kanmìí na kúbèle a nyán? Pe ga nyán cerìí félege ti a pye be na?» 36Nilabalaga! Gee mɔ ga lùgu lè, kapye ki ga kùu í, wovɔngɔ a gbǎn taa í. 37Gee mɔ ga lùgu lè, a gi náà pye ǹdege yoo, wàlá felegaa nikwɔɔ yoo, ki fíingi ki a ba yiri lè, koro ban mɔ da lùgu í, fwɔɔ ki pìifalidi. 38Kolocɔlɔɔ si wi di fíinyi kaangi di ma ni yɛlɛgi ní wi kínidɛnɛgi ní, ànbée wi yaliiri pìifalida myɛ nibin nibin fíinye kaangi di ma ni yɛlɛgi ní di féleyi ní.
39Céri myɛ o nyɛ felege nibin í. Tàa i nyɛ syɛ́ɛnbèle wóro, tàa si i nyɛ yaweeri wóro, tàa nikwɔɔ si i nyɛ féjɛɛnri wóro, tàa nikwɔɔ si wɔ́ɔ i nyɛ fábèle wóro.
40Nyɛ̀ʔɛni yárira féleye wɔ́ɔ i yaà, a tári yárira féleye i naa. Kàjáa nyɛ̀ʔɛni wóro nìjanra n fàli tári wóro nìjanra na. 41Nìjanri félegaa i nyɛ cángi ma, felegaa nikwɔɔ si i nyɛ yégi ma, á kàa si i nyɛ ŋɔripiigèle ma. Alí ŋɔripiigèle myɛ nìjanra o nyɛ sèjira í.
42Anbée kúbèle nyán-yirile a ba pye. Dee be lùgu lè wovɔnʔɔrɔ ní, ti a kɔ́ ba yiri si pye yanaa-sìnvɔnʔɔrɔ. 43Ti n tɔ́n wobeere ní, ti ga baa nyán n yiri lǎli ni lè, ti a pye wojanra ní. Lǎli ni pe di tɔ́n lè, ti n pye fànʔa fun. Ti ga baa nyán, ti a pye ní fànʔa ní. 44Ti maa pye tári cére á be di tɔ́n, ti ga baa nyán, ti a pye nyɛ̀ʔɛni wóro. Kapye ceraa i nyɛ syɔɔn ma tári wóro, tàa a wɔ́ɔ pye wi ma nyɛ̀ʔɛni wóro. 45#Sél 2:7 Gee bee na gi sɛ́bɛ níì jo: «Syɛɛnseliw wi lè Adami, wi n baa pye syɛɛnweeo,» Adami wozanw si i nyɛ pìle, ní i nyɛ sìíw kaanfɔlɔ. 46Koro ní ki myɛ ní nyɛ̀ʔɛni wóro ban di nyɛ wozelidi í, tári wóro dii. Koro kàdoʔo ma nyɛ̀ʔɛni wóro a náa taa. 47Syɛɛnseliw n yiri tári ni, wi i nyɛ tári wóo. Syɛɛnsiin wów si n yìri nyɛ̀ʔɛni na. 48Amɛɛ tári wóo pye lè, ànbée tári wòolo wɔ́ɔ̄ nyɛ. Amɛɛ nyɛ̀ʔɛni wóo nyɛ lè, ànbée nyɛ̀ʔɛni wòolo wɔ́ɔ̄ nyɛ. 49Amɛɛ si wolo tári wóo wíri lè, ànbée wolo a wɔ́ɔ ba nyɛ̀ʔɛni wóo wíri.
50Ni senyɛ̀nnɛ, mii syɛ́ɛnri naa kɔ́rɔ wi nyɛ céri ní sìsyaanw a gbǎn Kolocɔlɔɔ fǎngi kɔ́rigɔ lìi í, fɔ́nʔɔmi a gbǎn sìnvɔnʔɔmi kɔ́rigɔ lìi í.
51 #
1Tes 4:15-17
Ye wéle, mii a kalaralaa joo yele ma, wo myɛ a kùu í, kàjáa wo myɛ si a kàri wovɔnbèlē ní 52terire làrinijanna ni, nyapiikololo nibin na, gee bee a ba kpéʔele búruw wìizanna làla ni. Níì cán pe a wi wìi, kúbèle si nyán yiri bi pye ní sìnvɔnʔɔmi cére ní, wolo si wɔ́ɔ kàri. 53Kányɛʔɛ ni céri naa di fɔ́ɔnri lè, fwɔɔ toro í ba kàri cénaa-sìnvɔnʔɔrɔ, àmɛɛ di kúu lè, fwɔɔ ti ba kàri cénaa-sìnguuro. 54#Eza 25:8 Céri naa di fɔ́ɔnri lè, toro ga baa kàri cénaa-sìnvɔnʔɔrɔ, ní àmɛɛ di kúu lè, ti ga baa kàri cénaa-sìnguuro, lǎli bee ni syɛ́ɛnri naa a foro dee ti da sɛ́bɛ lè níì jo:
«Pe n fànʔa taa kùúw na n wi fǎngi kwɔ́ɔ.»
55 #
Oz 13:14
«Ee kùu, sán mɔ fandaari nyɛ?
Ee kùu, sán mɔ sɔ́ɔnri nyɛ?»
56Kùúw sɔ́ɔnrɔ di nyɛ kapeebyeri. Kapeebyeri fànʔa si gi nyɛ Mowizi làlwaw. 57Kàjáa ki n yɛlɛ waa bariga kaangi Kolocɔlɔɔ ma, woro wi wolo kpéʔele fàndaabèlē wolo Kàfɔw Zyezu Kirisi bárigaw ni. 58Gee bee na, mii senyɛn-nidaanmabèle, ki n yɛlɛ ye nìrimɛ le, ye a kɔ́ ra yeyɛɛ gábala í, yaa syée yɛʔɛ ma làla o làla Kàfɔw fáli ni, ye gi cán fáliwee yele kpéʔele lè Kàfɔw báriga ni, wi a gbǎn yiri gbanzan í.
Currently Selected:
1 Korɛnti ye 15: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
