1 Korɛnti ye 14
14
Kafɔngèle kèle tɛ̀ɛnnɛ Pìicǎnni fundookaanra kéele na
1Yaa tàmagi caa kányɛʔɛ ni, yé wɔ́ɔ yaa Pìicǎnni fundooro caa. Gee si yele yɛlɛ bàā caa bi sɔ̀lɔ ti myɛ na lè koro gi nyɛ kanyaajoori fundooro. 2Níì cán syɔ́ɔnwee wi ga ni nyuu lè syɛɛnfeleraa ni, syɛ́ɛnbèle ní ban wi nyuu í, fwɔɔ Kolocɔlɔɔ ní wi nyuu, níì cán syɔɔnwaa faala ga wi syɛ́ɛnri kɔ́rɔ cán í, wi pǐli li kalaragèle nyuu. 3Wee si wi kérigèle nyaagi ni nyuu lè, woro màʔá i nyuu ní syɛ́ɛnbèle ní ni kàa taari be tágali na, ní i be tama ní i be kɛɛlɛ. 4Wee wi ga ni syɛɛnfeleraa nyuu lè, wee bee i kàa taari wiyɛɛ tágali na. Wee si wi kérigèle nyaagi ni nyuu lè, wee bee i kàa taari Egiliziw tágala na.
5Mii i caa yele myɛ í gbǎn ra syɛɛnfeleraa nyuu, kàjáa yele ga ni kérigèle nyaagi ni nyuu, gee bee a mii dɛ́nɛ bi sɔ̀lɔ. Wee wi ga ni kérigèle nyaagi ni nyuu lè, wee bee n kpɔ́ʔɔ n sɔ̀lɔ syɛɛnfeleraa joofɔlɔ na, kapye syɛɛnfeleri bee joofɔlɔ o di kàragí yele syɛ́ɛnri ni í, koro ga pye kàa í fàra Egiliziw tágala na í. 6Ni senyɛ̀nnɛ, mii ga kári yaà yele ma n sa ni nyuu syɛɛnfeleraa ni, mii si ga Kolocɔlɔɔ kalaralaa tɛ̀ɛn yele na í, mii ga wɔ́ɔ̀ cánna tɛ̀ɛn yele na í, mii si ga wɔ́ɔ̀ kérigèle nyaa n joo í wàlá n yele tama í, nyàʔá gee bee a nyɔɔ yele na?
7Kánmi bee na pìle fun yáriri be wíi lè, ní dee be kpúmɔn lè, gee gi máani ní kɔ̀ríw kéele kwɔ́ɔ lè, ti syɛ́ɛnri ga pye ti o cángi ni láʔala í, wìí wi a gbǎn di kɔ́rɔw cán? 8Ba búruw wìimɛ ga ni súrugu, wìí syɔ́ɔn wi a wiyɛɛ zámaga kapɛɛnni kéele na? 9Anbée gi wɔ́ɔ̄ nyɛ. Kapye yele nyɔɔsyɛɛnri o fíligi í, dee yele nyuu lè, mɛ̀ɛ́ pe a gbǎn di cán bi sɛ́ɛ? A yele nyuu ni wáa wii gbanzan. 10Syɛɛnjóori féleye n nɛʔɛ dulunyanw ni, ti tàa faala si o nyɛ kɔ́rɔ fun í. 11Gee bee na mii ga pye mii ga syɛɛnjóoraa kɔ́rɔ cán í, syɛɛnjóow bee a pye mii nyɛ́nɛ na táraa syɔ́ɔn, mii si wɔ́ɔ pye táraa syɔ́ɔn syɛɛnjóow bee nyɛ́nɛ na. 12Yele si na, àmɛɛ yele Pìicǎnni fundooro caa lè gbanʔama, yaa di caa wonɛʔɛrɛ ní, koro ga pye kàa í da fàrá Egiliziw tágala na.
13Koro na wee wi ga ni syɛɛnfeleraa nyuu lè, ki n yɛlɛ waa nyɛ́ɛri koro ga pye woro í gbǎn ra di kàragí. 14Níì cán mii ga ni nyɛ́ɛri syɛɛnfeleraa ni, mii pǐli li nyɛ́ɛri, mii sɔ̀nguri lɛɛlɛ si o nyɛ gi ni í. 15Nyàʔá si mii yɛlɛ bi kpéʔele? Mii a ra Kolocɔlɔɔ nyɛ́ɛri ní mii pǐli ní, si wɔ́ɔ ra wi nyɛ́ɛri ní mii sɔ̀nguri ní. Mii a ra ŋúu ní mii pǐli ní, si wɔ́ɔ ra ŋúu ní mii sɔ̀nguri ní. 16Kapye koro ban í, mɔ ga ni Kolocɔlɔɔ kpɔ̀ʔɔrɔ́ ní mɔ pili yagana ní, syɔ́ɔnwee wi nyɛ lè yele níngi ni ki kɔ́rɔw sìnján ni, mɛ̀ɛ́ wee bee a gbǎn amiina joo bi sɛ́ɛ mɔ kpɔʔɔrɔli kéele na níì cán wi ga mɔ wojoori cán í? 17Mɔ n Kolocɔlɔɔ sámaga n kpɔ̀ʔɔrɔ, koro i nyɛ kányɛʔɛ, kàjáa mi gi cán mɔ ga yafyɛn taʔa mɔ syɛɛnnyɛnw tágala na í.
18Mii i bariga kaangi Kolocɔlɔɔ ma àmɛɛ mii nyuu lè syɛɛnfeleraa ni n sɔ̀lɔ yele myɛ na. 19Koro ní ki myɛ ní mii ga syɛɛnjóokánya kagunɔ joo Egiliziwaa ni ní mii cánni ní bi be tama, koro n mii dɛ́nɛ n sɔ̀lɔ syɛɛnjóokánya selebingéle kagunɔ joolo na syɛɛnfeleraa ni.
20Ni senyɛ̀nnɛ, yele a kɔ́ pye pìibēle kútiiw cerile kabaan na í, kàjáa ki n yɛlɛ ye pye pìipiigéle kakolobyeri kàbaan na, yé pye wolɛɛbèlē kútiiw cerile kabaan na. 21#Eza 28:11-12 Ki n sɛ́bɛ Mowizi làlwaw sɛ́bɛ ni níì jo:
«Kàfɔw n jo:
‹Mii a joo ní syɛ́ɛnbèle naa ní syɛɛnfeleraa ni.
Nibɔnbéle nyɔ́ɔyɔ ni si mii a joo ní be ní.
Koro ní ki myɛ ní pe a sèʔé lóʔo mii ma í.› »
22Gee bee na syɛɛnfeleri joolo i nyɛ fɛ̀ɛ sìndagabèle ma, tágafɔbèle má ban í. Kanyaajoori si i nyɛ fɛ̀ɛ tágafɔbèle ma, sìndagabèle má ban í.
23Egiliziw myɛ ga wiyɛɛ gbóʔoro ye myɛ si i nyuu syɛɛnfeleraa ni, ní pèle ga jée yele níngi ni, bele be lè kéeli bee sìnján ni, koro ga jáa sìndagabèle pèle, pe a jo yele n cúro ì? 24Kàjáa yele myɛ ga ni kérigèle nyaagi ni nyuu, poro wàa ga jée yaà, yele wojoori myɛ a kolomɔ kaan wi ma, si kútii kúun wi na. 25Koro a wi fúngi kalaragēle yirige kàfugi na. Tɛ́ɛgi bee ni wi a too bi yɛ́ɛgi cíbele tári na, sáā Kolocɔlɔɔ kpɔ̀ʔɔrɔ́, si jo: «Kolocɔlɔɔ tɔ̀nɔ i nyɛ yele níngi ni kányɛʔɛ ni.»
Kérigèle kpéʔeleganma Egiliziw ni
26Ni senyɛ̀nnɛ, nyàʔá si yele yɛlɛ bi kpéʔele? Yele ga yeyɛɛ gbóʔoro lǎlee ni lè, fali i nyɛ yele myɛ nibin nibin ma, ŋúnugo yoo, tamana yoo, kalaragèle tɛ̀ɛnnɛ yoo, syɛɛnfeleri joolo yoo, syɛɛnfeleri kàrigala yoo, gee bee myɛ n yɛlɛ gi kpéʔele bi gbǎn kàa fàra yele tágali na. 27Pèle ga ni syɛɛnfeleraa nyuu, ki n yɛlɛ be pye syɛ̀ɛnnɛ siin wàlá taanri, pe a kɔ́ sɔ̀lɔ taanri na í. Pe myɛ n yɛlɛ paa nyuu pe làrijoogèle ni, wàa sáā be syɛ́ɛnri kàragí. 28Kapye di kàrigafɔlɔ o yaà í, ki n yɛlɛ be pyèri Egiliziw ni, páā di nyuu be fúnyi ni Kolocɔlɔɔ ma. 29Kanyaajoobéle siin n yɛlɛ paa nyuu, wàlá taanri, wozanbèle sáā be syɛ́ɛnri sɛʔɛ. 30Keelaa ga tɛ̀ɛn tɛ́ɛnfɔwaa na, wee wi da ni nyuu lè, woro n yɛlɛ wi pyèri. 31Níì cán yele myɛ nibin nibin a gbǎn ra kérigèle nyaagi da nyuu taʔalagèlē taʔalagèlē koro ga pye yele myɛ í tamana taa, sáā yeyɛɛ kɛɛlɛ. 32Kanyaajoobèle i be pìígèle kàragí. 33Níì cán Kolocɔlɔɔ o nyɛ kanyaʔamiri kaanfɔlɔ í, fwɔɔ katimanagèle kaanfɔlɔ.
Amɛɛ gi kpéʔele lè Kolocɔlɔɔ syɛɛncanbèle egilizibéle myɛ ni, 34cébèle n yɛlɛ paa pyèrí gbooli nínge ni, pe ga yɛlɛ paa nyuu í. Fwɔɔ be pyèri páā lúro, àmɛɛ làlwaw wɔ́ɔ̀ gi joo lè. 35Kapye wàa i caa bi keelaa cán, ki n yɛlɛ wi sa wi tiimaa nǎnw yíbe be kpaʔa ma. Níì cán ki i nyɛ fɛ̀ɛrɛ kéele cɔlɔɔ í da nyuu egilizi ni.
36A yele sɔ̀ngí lé yele má Kolocɔlɔɔ syɛ́ɛnri da yìri? Ba yele jo lé yele yagana na di nan? 37Ki ga pye wàa fúngo ni a wi jo woro i nyɛ kanyaajooo, wàlá Pìicǎnni kôdanʔaɔ, ki n yɛlɛ wi gi cán gbanʔama bi cán, syɛ́ɛnri naa mii sɛ́bɛ n tórigo yele ma lè, ti i nyɛ Kàfɔw tundunraa. 38Wee si ga pye wi ga di córo lè í, Kolocɔlɔɔ a wɔ́ɔ wee bee córo í.
39Gee bee na ni senyɛ̀nnɛ, yaa kanyaajoori fundooro caa kányɛʔɛ ni. Yele si a kɔ́ pèle yérige syɛɛnfeleri joolo na í. 40Kàjáa ki n yɛlɛ yaa kérigèle myɛ sámagi yaa kpéʔele ke kpéʔeleganmi na.
Currently Selected:
1 Korɛnti ye 14: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
