1 Korɛnti ye 13
13
Tàmagi kéele
1Alí mii ga ni nyuu syɛ́ɛnbèle syɛ́ɛnrɛ ni, ní wɔ́ɔ i nyuu nyɛ̀ʔɛni tundunbéle wóro ni n gi yaʔa tàmaga o nyɛ mii fúngi ni í, mii i nyɛ mɔ a jo kanyɛɛnrɛ be kpúmɔn, wàlá wèlege be tìngí. 2#Mat 17:20; 21:21; Mar 11:23 Alí kanyaajoori fundooro ga pye mii ma n náà fàra kalaragèle myɛ ní kérigèle myɛ cánna na, àlí mii tágali ga kpɔ́ʔɔ kanma o kanma na fwɔɔ bi gbǎn nyanbeleyi myɛ yìrige yi tɛɛ̀tɛ́nɛyi ni n gi yaʔa tàmaga o nyɛ mii fúngi ni í, mii o nyɛ yafyɛn í. 3Alí mii ga mii kɔ́lɔ yáriri myɛ tíla tíla n kaan foomɔfɔbèle ma, níì mii céri kaan a be di sórigo, kapye tàmaga o nyɛ mii fúngi ni í, gee bee a yafyɛn nyɔɔ mii na í.
4Tàmagi i fûnnyinge kpéʔele, níì nyìn kacànbyeri na, nyabɛɛnnɛ o nyɛ tàmagi ni í. Tàmagi o kiyɛɛ nyɛ́nɛ í, ki o kiyɛɛ gbɔ́ʔɔgi í, 5ki o kanaa-sìnzinre kpéʔele í, ki o kiyɛɛ nyɔɔmɔ caa í, ki o fundanʔara kpéʔele í, ki o kapeele sɔ̀ngí í, 6ki o fundaanra kpéʔele kakolobyeri na í, ki si i di kpéʔele kányɛɛgi na. 7Ki i kérigèle myɛ kùsulugo syoo, níì tága kányɛɛgi myɛ na, ní wɔ́ɔ̀ gi cán kàa faala a gbǎn sàa í. Ki i kpàracogo kpéʔele kérigèle myɛ na.
8Tàmagi o kwóo nyáana í. Kanyaajoori si a kwɔ́ɔ, syɛɛnfeleraa joolo a wɔ́ɔ sàa, cánni a wɔ́ɔ kwɔ́ɔ. 9Cɛɛri yagana wolo cán, cɛɛri si wolo wɔ́ɔ̄ nyuu kanyaajoori ni. 10Gee gi nyɔɔ n foro lè, gee bee ga pan, gee gi nyɛ lè ki ga nyɔɔ n foro í, gee bee a kwɔ́ɔ.
11Mii pìími làla ni, mii maa ni pìisyɛɛnri nyuu, ní wɔ́ɔ i pìími sɔ̀ngurɔ sɔ̀ngí, ní i pìími kèlē tímana. Nlaa si mii baa lɛɛ lè, a mii pìími kèlē yaʔa. 12Tɔ́ɔliw ni wolo i nyaagi wúuro wúuro, àmɛɛ syɔɔn wiyɛɛ wéle lè dùbale ni, lǎli ga baa nan, wolo a ra sámagi da nyaagi. Tɔ́ɔliw ni cɛɛri yagana mii cán, kàjáa lǎli bee ga baa nan, mii a ki myɛ cán àmɛɛ Kolocɔlɔɔ mii tiimaa cán lè.
13Kányɛʔɛ na yatɛɛyi naa taanri yi kòro, yoro yi nyɛ tágali, ní sɔ̀ngumi tɛɛtaʔaga, ní tàmagi ní. Kàjáa gee gi kpɔ́ʔɔ n sɔ̀lɔ lè, koro gi nyɛ tàmagi.
Currently Selected:
1 Korɛnti ye 13: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
