1 Korɛnti ye 12
12
Fundoori Pìicǎnni kaangi lè
1Ni senyɛ̀nnɛ, tɔ́ɔliw ni gee gi Pìicǎnni fundookaanra kéele kwɔ́ɔ lè, mii o caa yele í pye di kéeli sìnján ni í. 2Yele n gi cán àmɛɛ yele da pye lè sìndagabéle, pe maa yele pùuni, a yele kólogi yaʔa, níì taʔa yasunyi na yi lè yi o nyuu í. 3Gee bee na mii a gi joo fílige yele ma si yele pye syɔɔn o syɔɔn wi nyuu Kolocɔlɔɔ Pǐli báriga ni lè, wi a fɔ̀lɔ́ jo, «Zyezu n dánga» í. Wàa faala a wɔ́ɔ gbǎn jo, «Zyezu wi nyɛ Kàfɔw» í, kapye Pìicǎnni báriga ni ban í.
4 #
Wɔr 12:6-8
Fundookaanri féleye n nɛʔɛ, kàjáa Pìicǎnni i nyɛ nibin. 5Fáliw féleye n wɔ́ɔ̀ nɛʔɛ, kàjáa Kàfɔw i nyɛ nibin. 6A kapyegèle féleye wɔ́ɔ̀ nɛʔɛ, kàjáa Kolocɔlɔɔ nibin wi ke myɛ kpéʔele syɛ́ɛnbèle myɛ fúnyo ni. 7Pìicǎnni tɛ̀ɛnnɛ kèlē si n kaan syɛ́ɛnbèle myɛ nibin nibin ma pe myɛ nyɔɔmɔ kéele na. 8Níì cán Pìicǎnni n sícili-zyɛ́ɛnri kaan wàa ma. Loro li wɔ́ɔ̀ cánni syɛ́ɛnrɛ kaan wàa nikwɔɔ ma. 9Pìicǎnni bee wonijanna li tágali kaan wàa nikwɔɔ ma. Loro wonijanni li wɔ́ɔ̀ fǎngi kaan wàa ma waa yáabèle poori. 10Pìicǎnni bee li wɔ́ɔ̀ kakpoloyi kpéʔelele fanʔa kaan wàa ma, níì séew kaan wàa ma waa kérigèle nyaagi waa nyuu, níì pìígèle sɛʔɛwelele kaan wàa ma. Loro wonijanni li syɛɛnfeleraa kaan wàa ma waa nyuu, níì syɛɛnfeleraa kɔ́rɔ joolo kaan wàa ma. 11Pǐli bee wonijanna li kérigèle bee myɛ kpéʔele, níì syɛ́ɛnbèle myɛ nibin nibin fundooro kaan be ma n yɛlɛ ní li kínidɛnɛgi ní.
Céri i nyɛ nibin ní i nyɛ ní yasɛɛyɛ saʔa ní
12 #
Wɔr 12:4-5
Níì cán àmɛɛ céri nyɛ lè nibin, á di tɛ́ɛyi nɛʔɛ, á yi myɛ si pínɛ n pye cere nibin, ànbée Kirisi wɔ́ɔ̄ nyɛ. 13A pèle náà pye Zyefubéle yoo, Girɛkibéle yoo, pulobèlē yoo, wɔ́rɔbéle yoo, Pìicǎnni nibin li wolo myɛ batize n pye cere nibin, a wolo myɛ taa n gbaa Pǐli nibin na.
14Céri o wɔ́ɔ̄ nyɛ cere tɛ́ʔɛ nibin í, di tɛ́ɛyi n nɛʔɛ. 15Ní tɔ́lɔgi ga jo koro o nyɛ kɔlɔ̀ í, gee bee na koro o nyɛ céri tɛ́ɛgaa í, a gee bee a gi kaan lé ki a ní pye céri tɛ́ɛgaa í? 16Ní líigi ga jo koro o nyɛ nyapile í, gee bee na koro o nyɛ céri tɛ́ɛgaa í, a gee bee a gi kaan lé ki a ní pye céri tɛ́ɛgaa í? 17Kapye céri myɛ maa pínɛ n pye nyapile, sán ti mǎà dée ra lúro? Ba ti myɛ ga maa pye líige, sán ti mǎà dee ra nǔngi taagi? 18Kàjáa Kolocɔlɔɔ n céri tɛ́ɛyɛ myɛ nibin nibin tɛ́ʔɛ yi tɛ́ɛyi ni n yɛlɛ ní wi kínidɛnɛgi ní. 19Yi myɛ ga maa pye tɛʔɛ nibin, gìí ki a dée pye céri? 20Kányɛʔɛ ni céri tɛ́ɛyɛ n nɛʔɛ, kàjáa ti i nyɛ nibin.
21Nyapili a gbǎn gi joo kɔ́gi ma si jo: «Mii màko o nyɛ mɔ na í.» Nyǔngi a wɔ́ɔ gbǎn gi joo tɔ́lɔyi ma si jo: «Mii màko o nyɛ yele na í.» 22Alí céri tɛ́ɛyɛ wolo córo lè fànʔa fun, yoro na wolo màko nyɛ kányɛʔɛ ni. 23Wolo céri tɛ́ɛyɛ wolo sɔ̀ngí lè yi ga yɛlɛ ní kpɔʔɔrɔ ní í, wolo si n kpɔ́ʔɔri myɛ taʔa yi na. Tɛ́ɛyee si wolo làragí lè fɛ̀ɛ́ri kéele na, wolo i yee bee kpɔ́ʔɔgi n sɔ̀lɔ wozanyi na. 24Tɛ́ɛyi yi lè fɛ̀ɛrɛ fun, yoro màko o nyɛ kpɔ́ʔɔri bee na í. Kolocɔlɔɔ n céri sámaga tiyɛɛ na, tɛ́ɛyee na kpɔ́ʔɔri kólogo lè, a wi kpɔʔɔrɔ kaan yoro ma, 25koro ga pye láʔala a kɔ́ pye céri na í, kàjáa di tɛ́ɛyi yákirii í kòro yiyɛɛ na kanma nibin na. 26Céri tɛ́ɛgaa nibin ga ni wɔʔɔ, wozanyi n pínɛ ni wɔʔɔ ní gi ní. Koro ga jáa tɛɛgaa ga kpɔʔɔrɔ taa, wozanyi n pínɛ n pye fundaanra na ní gi ní.
27Yele i nyɛ Kirisi céri, yele myɛ nibin nibin i nyɛ wi céri tɛ́ɛyaa. 28#Efɛz 4:11 Kolocɔlɔɔ n pèle télege Egiliziw ni, wozelibèle be nyɛ pìitunbèle, siin wóbèle si i nyɛ kanyaajoobèle, taanri wóbèle si i nyɛ tamafɔbèle. Bele be taʔa lè poro be nyɛ kakpoloyi kpéʔelefɔɔlɔ, ní yaabɔʔɔbèle, ní dɛ̀ɛmɛfɔbèle, ní kakarigabèle, ní syɛɛnfeleraa joofɔɔlɔ ní. 29A pe myɛ i nyɛ lé pìitunbéle? A pe myɛ i nyɛ lé kanyaajoobéle? A pe myɛ i nyɛ lé tamafɔɔlɔ? A pe myɛ i nyɛ lé ni kakpoloyi kpéʔele? 30A yaabɔʔɔri fundooro i nyɛ lé pe myɛ ma? A pe myɛ i nyuu lé syɛɛnfeleraa ni? Ba pe myɛ i syɛɛnfeleraa kɔ́rɔ nyuu lé? 31Fundookaanree di pɔ́rɔ n sɔ̀lɔ lè, yaa toro caa.
Kólogee si gi nyɔɔ n sɔ̀lɔ yi myɛ na lè, koro mii a tɛ̀ɛn yele na.
Currently Selected:
1 Korɛnti ye 12: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
