1 Korɛnti ye 11
11
1 #
1Kor 4:16; Filip 3:17 Yaa mii tɛ́ɛlɛ àmɛɛ mii tiimaa Kirisi tɛ́ɛlɛ lè.
Cɔlɔɔ n yɛlɛ wi wi nyúngi tɔ́n sériw làla ni
2Mii i yele sòoló àmɛɛ yele sɔ̀ngí ni taagi mii na lè kérigèle myɛ ni, ní àmɛɛ yele tamani cò lè lee na mii da yele tama lè. 3Kàjáa mii sèʔé i caa yele í gi cán bi cán nǎnbèle myɛ nyùngofɔlɔ wi nyɛ Kirisi, céw nyùngofɔlɔ si i nyɛ nǎnw, Kirisi nyúngi fɔ́lɔ si i nyɛ Kolocɔlɔɔ. 4Nàɔn o nàɔn wi nyɛ́ɛri lè, koro ga jáa a wi i kérigèle nyaagi ni nyuu ǹdɔnnɔ si i nyɛ wi nyúngi ni, wee bee n wi nyúngi fɔ́lɔ faʔa. 5Cɔlɔɔ o cɔlɔɔ si ga ni nyɛ́ɛri, koro ga jáa a wi i kérigèle nyaagi ni nyuu n gi yaʔa wi ga wi nyúngi tɔ́n í, wee bee n wi nyúngi fɔ́lɔ faʔa, ki i nyɛ mɔ a jo wi n wi nyúngi kùnu. 6Kányɛʔɛ ni cɔlɔɔ nyúngo ga pye ki ga tɔ́n í, ki n yɛlɛ wi wi ǹjoori cɛnɛ. Kàjáa ǹjoori cɛnɛnɛ ní nyùngunugi ga pye fɛ̀ɛrɛ wi na, ki n yɛlɛ wi wi nyúngi tɔ́n. 7#Sél 1:26-27 Nàɔn ga yɛlɛ wi wi nyúngi tɔ́n í, níì cán woro wi nyɛ Kolocɔlɔɔ niwiriw, ní i Kolocɔlɔɔ nìjanri tèé, céw si i nǎnw nìjanra tèé. 8#Sél 2:18-23 Níì cán nǎnw ga yiri céw ni í, céw wi yiri nǎnw ni. 9Nǎnw si da faan céw kéele na í, céw wi da faan nǎnw kéele na. 10Koro na ki fɛ̀ɛ́w yɛlɛ wi pye céw nyúngo na nyɛ̀ʔɛni tundunbéle kéele na bi gi tɛ̀ɛn wi i nyɛ wi nǎnw fànʔa láara ni. 11Koro ní ki myɛ ní àmɛɛ wo nyɛ Kàfɔw ni lè cɔlɔɔ a gbǎn foro nàɔn fun ni í, nàɔn a wɔ́ɔ gbǎn foro cɔlɔɔ fun ni í. 12Níì cán àmɛɛ céw yiri lè nǎnw ni, ànbée céw wɔ́ɔ̄ nǎnw sii, koro myɛ si n yìri Kolocɔlɔɔ ma.
13Yele tiimaa ye gi sɔ̀ngi ye wéle, a gi yɛlɛ lé cɔlɔɔ í da nyɛ́ɛri Kolocɔlɔɔ ma wi nyúngi sìndɔn ni? 14Amɛɛ Kolocɔlɔɔ yáriri faan lè, gee bee ga gi tɛ̀ɛn yele na ǹjootɔnɔrɔ ga pye nàɔn nyúngo ni, koro i nyɛ wi faʔara kéele ì? 15Njootɔnɔrɔ si ga pye cɔlɔɔ na, gee bee o nyɛ wi nìjanri kéele ì? Níì cán ǹjootɔnɔri n kaan cɔlɔɔ ma di pye wi ma nyùndɔn-yáriga. 16Wàa si ga ni caa bi gi kábala, ki n yɛlɛ wi gi cán kalɛɛlaa nikwɔɔ ní o nyɛ wolo ma í, wàlá Kolocɔlɔɔ egilizibèle ma í.
Kàfɔw lìizanna kéele
17Syɛ́ɛnri mii a joo yele ma lè, ki o nyɛ bi yele sòolo wii í, níì cán yele o yeyɛɛ gbóʔoro yele nyɔɔmɔ kéele na í, fwɔɔ yele kálagili kéele na. 18Wozeligi gi nyɛ mii n gi lóʔo yele Egiliziw ga wiyɛɛ gbóʔoro lǎlee ni lè, yele n wàli yeyɛɛ na fúnyi ni, mii si n tága di tàa na. 19Fwɔɔ funwaliyi si wɔ́ɔ pye yaà yele ma, koro ga pye bele be síngi ni táanri lè yele níngi ni, poro í cán. 20Yele ga yeyɛɛ gbóʔoro tɛʔɛ nibin ni, Kàfɔw lìizanna na ban yele gáà pye kányɛʔɛ ni í. 21Níì cán yele bele ga nan yaà lè ní lìíli ní, yele n fala n séli ni yele tiimaa lìíli líi bele sìnzige ni, kateegi n pye pèle na, pèle mɛ̀ɛ́ tín sínmi na. 22Kpaaya o nyɛ yele ma yele í da líi sáā gbo yaà ì? A yele i caa lé bi Kolocɔlɔɔ Egiliziw faʔa? Wàlá a yele i caa lé bi fɛ̀ɛrɛ wáa fɔ̀ngɔfɔbèle na? Nyàʔá mii a joo yele ma? Mii í yele sòolo lé kéeli bee na? Mii a gbǎn yele sòolo gee bee na í.
23Níì cán dee mii lóʔo lè Kàfɔw ma, toro mii wɔ́ɔ̀ joo yele ma. Yébiligee ni pe Kàfɔw Zyezu le lè wi nigoobèle kɔ́yɔ ni, sáni be wi cò lè a wi búruw láa 24níì bariga kaan Kolocɔlɔɔ ma níì wi kabagi níì jo: «Wee naa wi nyɛ mii céri, dee mii a kaan lè yele kéeli na. Yaa gee naa kpéʔele yáā sɔ̀ngí yaa taagi mii na.» 25#Yir 24:6-8; Zyer 31:31-34 Kánmi bee wonijanma na, lìíli kàdoʔo ma, a wi yagbaagi láa níì jo: «Yagbaagi naa gi nyɛ joogaanvɔnni, li n taa mii sìsyaanw báriga ni. Yele ga ni gee naa gbo làla o làla ni, yaa sɔ̀ngí yaa taagi mii na.» 26Yele ga ni búruw naa líi, ní i yagbaagi naa gbo làla o làla ni, yele i nyɛ ni Kàfɔw kùu kéele nyuu bi taa wi lúru pan.
27Gee bee na syɔ́ɔnwee faala wi ga Kàfɔw búru lìi lè, ní wɔ́ɔ̀ wi yagbaagi gbaa sìnzin ni, wee bee n kolo Kàfɔw cére ní wi sìsyaanw ma. 28Syɔɔn o syɔɔn n yɛlɛ wi wiyɛɛ zɛʔɛ gbɛnʔɛnɛ si náa lìi búruw na, si gbaa yagbaagi na. 29Níì cán wee wi ga ni líi ní i gbo lè Kàfɔw cére kéele sìndimana ni, wee bee i kútii taari wiyɛɛ na kéeli bee ni. 30Koro na syɛ̀ɛnnɛ saʔa nyɛ yele níngi ni yaabèlē, ní báriga fun, á pèle kùu. 31Kapye wolo i kútiiw kúunri woyɛɛ na, Kàfɔw a ní kútii kúun wolo na í. 32Kàjáa wi ga kútiiw kúun wolo na, wi a wolo wɔʔɔ bi kàriga, koro ga pye wolo a kɔ́ pínɛ kálagi ní dulunyanw syɛ̀ɛnnɛ ní í.
33Ni senyɛ̀nnɛ, koro na yele ga yeyɛɛ gbóʔoro lìíli na, ye yeyɛɛ zige. 34Kateʔe ga pye wàa na, wee bee fɔ́lɔ n yɛlɛ wi lìi yaà wi kpaʔa ma, koro ga pye yele a kɔ́ yeyɛɛ gbóʔoro si kútiiw yaʔa wi too yele na í. Mii ga nan yaà, mii a náa kasangèle cɔɔnri.
Currently Selected:
1 Korɛnti ye 11: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
