1 Cányi kèlē 5

Wurubɛn yòdaʔayi

1 # Sél 35:22; 49:3-4 Isirayɛli pìiseliw, Wurubɛn jáabèle be nyɛ bele naa níì cán woro wi pye pìiseliw, kàjáa àmɛɛ wi baa wi tóow yasinɛgɛ nɔ́nʔɔ lè, a wi lɛ́ɛgi tɔ̀nɔ fíige n kaan Isirayɛli jáaw Zyozɛfu jáabèle ma. Kánmi bee na Wurubɛn mɛ́ɛgi ga sɛ́bɛ n yɛlɛ ní wi lɛ́ɛgi tɔ̀nɔ ní í. 2#Sél 49:8-10 Zyuda séew si wi da kpɔ́ʔɔ n sɔ̀lɔ wi senyɛnbèle wóo na. Woro ni kùndigi baa yiri, kàjáa lɛ́ɛgi tɔ̀nɔ maa pye Zyozɛfu wóo.

3Wurubɛn wi lè Isirayɛli pìiseliw, woro jáabèle be nyɛ: Henɔki, ní Palu, ní Hesurɔn, ní Karimii.

4Zyowɛli jáaw si i nyɛ Syemayeya, Syemayeya jáaw si i nyɛ Gɔgi, Gɔgi jáaw si i nyɛ Syimeyii, 5Syimeyii jáaw si i nyɛ Mika, Mika jáaw si i nyɛ Ereyaya, Ereyaya jáaw si i nyɛ Baali, 6#2Fàn 15:29 Baali jáaw si i nyɛ Beyera, woro wee Asirii fànʔafɔw Tiligati-Pilezɛɛri da cò n kári lè puloo, woro wi pye Wurubɛn ye fànʔafɔbili.

7Beyera senyɛnbèle n yɛlɛ ní be túluyi ní, àmɛɛ pe be córo lè n yɛlɛ ní be nariduluyi ní. Wozeliw Yeyiyɛli ní Zakarii, 8ní Azazi jáaw Bela, Azazi wi lè Syema jáaw, Syema wi lè Zyowɛli jáaw. Pe maa pye wodɛ́ɛnbéle ní Aroyɛɛri ni n kári fwɔɔ n sáà nan Nebo, ní Baali-Meyɔn na. 9Pe maa tɛ́ɛn canʔafolomɔ ma, níì kári fwɔɔ n sáà nan fìími tára nyɔ́ɔ na, nlaa yaà Ufurati cábigi nyɔ́ɔ na. Níì cán pe yaweeri maa nɛʔɛ Galaadi tári ni. 10Sawuli lǎli ni, a be kapɛɛnni kpúmɔn ní Hagari ye ní a poro jée be kɔ́yi ni a be tɛ́ɛn be fànikpaayi ni, Galaadi canʔafolomɔ kabangi myɛ na.

Gadi yòdaʔayi

11Gadi yòdaʔayi maa tɛ́ɛn pe zǐnmi na Basyan tári ni n kári fwɔɔ n sáà nan Salika na. 12Zyowɛli wi pye wozeliw, Syafami si i nyɛ wi siin wów, ní Yayenayi, ní Syafati, Basyan ni. 13Pe senyɛnbèle be nyɛ bele naa n yɛlɛ ní be narigbaayi ní: Mikayɛli, ní Mesyulami, ní Syeba, ní Yorayi, ní Yayekan, ní Ziya, ní Ebɛɛri, a poro pye kɔrɔsiin. 14Bele naa be nyɛ Hurii jáaw Abihayili jáabèle Hurii wi pye lè Yarowa jáaw, Yarowa wi pye lè Galaadi jáaw, Galaadi wi pye lè Mikayɛli jáaw Mikayɛli wi pye lè Yesyisyayi jáaw Yesyisyayi wi pye lè Yado jáaw, Yado wi pye lè Buzi jáaw. 15Gunii jáaw wi lè Abidyɛli, woro jáaw Ahii wi pye pe narigbaayi nyúngo na. 16A be tɛ́ɛn Galaadi ni, Basyan tári ni, ní gi tɛ́nɛmi kèpiigéle ni, ní Sarɔn taana tɛ́ɛyi myɛ ni fwɔɔ n sáà nan pe tɛɛ̀laʔagèle na.

17Pe n pe myɛ córo tofɔlɛɛyi mɛ́ɛyɛ sɛ́bɛ ní, Zyuda fànʔafɔw Yotami lǎli ni, ní Isirayɛli fànʔafɔw Zyerobowami lǎli ni.

18Báriga syɛ̀ɛnnɛ maa pye Wurubɛn ye, ní Gadi ye, ní Manase syɛɛnfelegi tíla wòolo ni, bele pe da ni tunmɔzige-yáriyi, ní ŋɔséebèle lée lè, ní i nyɛ sedeŋɔɔbéle, níì kapɛɛnni cán, pe maa pye sirakamayɛ siin ní selebingéle siin ní saala taanri ní togoye kɔrɔtaanri bi gbǎn ra syée kapɛɛnni ma. 19A be kapɛɛnni kpúmɔn ní Hagari ye, ní Yeturi, ní Nafiisyi, ní Nɔdabi ye ní. 20A Kolocɔlɔɔ be dɛ̀ɛmɛ n Hagari ye ní be pínɛnyɛnbèle myɛ le be kɔ́yi ni. Níì cán lǎli ni be pye kapɛɛnni na lè, pe maa yákpogèle wáa Kolocɔlɔɔ kurugo, a wi be nyɛ́ɛrigi lóʔo, àmɛɛ pe da be sɔ̀ngumi taʔa wi na lè. 21A pe be yaweeri cò. Ti n pye: Fàlibaaya sirakamayɛ siin ní selebingéle kagunɔ, ní yaweeyiligēle sirakamayɛ kɛɛ ní siin ní selebingéle kagunɔ, ní jòfanibēle selebinnɛ n fàra syɛ̀ɛnnɛ sirakamayɛ kagunɔ na. 22Níì cán syɛ̀ɛnnɛ saʔa maa kùu, àmɛɛ kapɛɛnni da yìri Kolocɔlɔɔ ma lè. A be tɛ́ɛn be sìndɛɛgi ni fwɔɔ n taa n baa nan pe cò-mí-kárili na púlori na.#5:22 cò-mí-kárili púlori na: Púlori làrigárila kéele wéle 2 Fàn 15:29.

Manase yòdaʔayi Zyuridɛnw jelige na

23A Manase syɛɛnfelegi tíla yòdaʔaya tɛ́ɛn tári ni, n séli Basyan na fwɔɔ n sáà nan Baali-Hɛrimɔn, ní Seniiri, ní Hɛrimɔn nyanbelegi na. Pe maa nɛʔɛ. 24Pe narigbaayi kùndigibéle be nyɛ bele naa: Efɛɛri, ní Yisyeyi, ní Eliyɛli, ní Aziriyɛli, ní Zyeremii, ní Hodavya, ní Yadyɛli. Nànniribēle be pye, ní lɔrɔfɔɔlɔ, ní mɛ́ɛyɛ fɔɔlɔ, ní i nyɛ pe narigbaayi kùndigibéle.

25Kàjáa pe maa kolo be tofɔlɛɛyi Kolocɔlɔɔ ma, ní i kanɔnʔɔri kpéʔele ní tári bee syɛɛnfeleye kolocɔlɔbèlē ní, yoro yee Kolocɔlɔɔ da kálagi be yɛʔɛ̀ ma lè. 26#2Fàn 15:19,29; 17:6 A Isirayɛli Kolocɔlɔw Asirii fànʔafɔw Puli, ní Asirii fànʔafɔw Tigilati-Pilezɛɛri sɔ́ɔn, a Tigilati-Pilezɛɛri Wurubɛn ye, ní Gadi ye, ní Manase syɛɛnfelegi tíla cò n kári ní be ní fwɔɔ Hala, ní Habɔɔri, ní Hara, ní Gozan cábigi ma, beè be yaà fwɔɔ n baa nan cángi naa na.

Levii yòdaʔayi: Sáriga-wòlobèle Kàfɔɔlɔ

27Levii jáabèle be nyɛ: Gerisyɔn, ní Kehati, ní Merarii. 28Kehati jáabèle si i nyɛ: Amirami, ní Yisehari, ní Heburɔn, ní Uzyɛli. 29Amirami jáabèle si i nyɛ: Aarɔn, ní Mowizi, ní Miriyami. Aarɔn jáabèle si i nyɛ: Nadabi, ní Abihu, ní Eleyazari, ní Itamari. 30Eleyazari wi Fineyasi see, á Fineyasi Abisyuwa see, 31á Abisyuwa Bukii see, á Bukii Uzii see, 32á Uzii Zeraya see, á Zeraya Merayɔti see, 33á Merayɔti Amariya see, á Amariya Ahitubi see, 34á Ahitubi Sadɔki see, á Sadɔki Ahimaasi see, 35á Ahimaasi Azariya see, á Azariya Yohanan see, 36á Yohanan Azariya see, woro wi da ni sáriga-wòlori fáli kpéʔele Kolocɔlɔɔ kpɔ̀ʔɔrɔli kpaʔa ni, gee Salomɔn da faan Zyerusalɛmi ni lè, 37á Azariya Amariya see, á Amariya Ahitubi see, 38á Ahitubi Sadɔki see, á Sadɔki Syalumi see, 39á Syalumi Hilikiya see, á Hilikiya Azariya see, 40á Azariya Seraya see, á Seraya Yehosadaki see. 41Lǎli ni Yawe Nebukadinezari yaʔa a wi Zyuda ní Zyerusalɛmi ye cò n kári lè, Yehosadaki maa wɔ́ɔ̀ kári.

Currently Selected:

1 Cányi kèlē 5: CB10

Highlight

Copy

Compare