Jeremías 9
9
1Chenaga yej rawan aken to lgun ga yull nis,
na yajrawa ka' sjanaken ga llar nis xhen,
nench'na koella do lla do yere,
ke be'nn yell kia ka' ba guten.
2Chenaga nada' zu to ga
soa latj dach yu billen,
nench'na wxhonjra be'nn yell kian,
le yoy akten bi llap ake' nada' barane',
na ba sjanak ake' chkoe be'nn wen daxhinj.
3Zeteze ze ake' xnid nench'na siye ake',
llchekw rull aken ke to xhis waxit.
Gan llnebia di'll wxhiyen na bitbi dalixhej sjade rawen,
zajzeze llak damar rawen,
na Xanllon bakse ba bnee:
Bine' yen akre wayunbie akre nada'.
4Bi gak wxenlall'llo be'nnen nlliellon,
nigaze be'nn bichllon bi gak wxenlall'lloe,
le kone be'nn bich ake' kazen ziye loellj ake',
na be'nn ka' nlliere loelljen llxoa dol kull loellj ake'.
5Yoy akze lltitje loellj ake',
na nutno llra' we di'll lixheje.
Bayoraw ake' ziye ake',
sjanak ake' be'nn wednay, nike nak akze 6zi wacha kan llun aken.
Xanllon ba bnee:
Nxajteze nxaj loellj ake',
nawze kull loellj da wxhiye ka'.
Yell kian bi llen akre wazak akre nada'.
7Kelen'na nada' Xanle nap doxhente yelwak, nia:
Bike ye to gunla be'nn yell kian,
zerawze da wsakzia le ake', nench'na wacha ake' kan llun aken.
8Rull aken llunen we kan llun xhis da latit rawe,
na da ake' ziye ake'.
Nbaraz lloap ake' lliuxh be'nn ka' nllie akren,
axha dali, llzoa ake' ga dol akre le ake'.
9¿Na bi wsakzia le aken kan llun aken?
¿Bi llayal sakzi yellen llun ka' cha'?
Nada' Xanle ba bnia ka'.
10Le koell na le lljachell yiach raw ya' ka',
na le koell yiach gan sjade yix ka',
le billbi de rawen, na nullno lldekse rawen,
bill renkse cha llusia bell ka',
xte rentekaze ba ka' zajzu xiren, na bayix snia ka' ba baxhonj akba.
11Wayuna Jerusalén'na txhonj ga suya yaj ake',
ga gun rill bayix ake',
wayuna to latj dach yu bill, yell xhen ka' nbanle Judán,
na nullno be'nn cha rawen.
12¿Nuxha naktell be'nn sin nench'na chajniere ke da ki? ¿Nuxha bagull Xanllon kan nak daki, nench'na gak wzajniere be'nn ka' yela? ¿Bixhchen latj yell-liw ni ba nyinjen, na banaken ke to latj dach yu bill ga nuno lldekse?
13Na Xanllon ballie'e di'llen: Yoyte da ki ba guken xtol be'nn Israelitas ka' le bsanlall ake' da ka' broe bsedra le akren, na bi bzenay ake', na bi ben ake' kan naken'na. 14Bnao akse ben ake' daxhinj, na ben ake' kon kan nak raxhdao aken, na beraw ake' dios wxhiye ka', kan broe xa' ake' ka' le aken. 15Kelen'na nada' Xanle nap doxhente yelwaken, Dios ke Israelen, llnia: Wa to da sla gaw ake', na we ake' nis yerb da yej ake'. 16Na guslas ake' latj yell-liw ka' yela gan bi numbie akre, na ga bi bembie xa' ake' ka', guna nench'na wray ake' re' kone spad, na ni tich re' bill waga'n.
Bell yiach ake' Jerusalén'na
17Xanllon nap doxhente yelwaken nee:
Lewzenay. Legaxh nor ka'
nun xchin lljachell yiach.
18Awa, yedtega ake'
na koell yiach ake' ke lliw,
na wzar ake' nis raollo,
na yej raollo ka' koell-lolj aken.
19Doxhente latj yell-liw ke Jerusalén'na lla ake' bell ake' dan lljel akren:
Niachraz naken ke lliw kanaken ba blleyi ake' lliw,
sdo kwis naken kello kanaken ba llxhakzillon.
De wsanlallo latj yell-liw kellon,
na yo' kello ka' ba bayinj aken.
20Nor ake' le wzenay xtill Xanllon,
le wzenayian kan llenle ye'e ren.
Le wroe xhi'nnre ka' ke koell akbe,
na nor ka' nlliere ren le wroe akre ke koell yiach ake':
21Yelguten ba biazen lo yo' rill-llon,
na ba biorenten yo'rao kello ka',
lluten bidao kello ka' do tnezen,
na bi weo kello ka' do lawya ka'.
22Be'nn wat kello ka' ba nllirj ake'
ke xche bayix da sjade lix,
ke to daw da ba brechj
na nutno llra' wazi len.
Kan ba bnee Xanllon.
23Xanllon nee:
Bi wlan be'nn sin'na dan ba nezren,
na be'nnen nap yelwaken bi wla'ne kone yelwak ke'en,
na be'nn wnian bi wla'ne dan nape yelwnian.
24Chet ka' nu llene wlan,
naktellen wen wla'ne dan nombiere nada',
na nezre nadan naka Xane,
na llroera yelnllie kian raw yell-li'on, na lluna yel korchis da zajze lixhej,
le danan naken da llawera.
Nada' Xanle ba bnia ka'.
25Xanllon ba bnee: Za' lla ka' wsakzia yoyte be'nn ka' sjalla raw yell ka' llzoa sen kwin ake' dan nzi circuncisión. 26Be'nn Egipto ka', Be'nn Judá ka', Be'nn Edom ka', na be'nn Amón ka', na be'nn Moab ka', na yoyte be'nn ka' llchib yich xay sjalla latj dach yu billen. Le yoyte yell ka', na yoyte be'nn ka' sjalla raw yell Israelen, bi nxenlall ake' do yichj dorall ake'.
Currently Selected:
Jeremías 9: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
