Jeremías 8
8
1Xanllon ba bnee: Ket llin lla'na, wachach ake' lo ba ka' llit wat ke be'nn wnebia ka', na be'nn braw ka' blla Judán, na bxus ka', na be'nn ka' bayixjwe xtill Diozen, na be'nn ka bzu Jerusalén'na, 2na wchirj aken raw will, raw be'o, na raw berj ka', dan bnao ake' bxenlall aken. Nutno watup le aken nench'na wkoach aken. Yega'n aken raw yu, ke to xche bayix. 3Na be'nn mar ka' ne' sjade yelnban ken, na gateze sjalla ake' gan ba beslasa le aken, serall ake' yelguten kerke yelnban'na. Nada' Xanle ba bnia ka'.
Sakzi Israelen
4Rwe' Jeremías, bdixjwe nada' dani be'nn yell ka':
Ket to be'nn llyale'e, na le llayaste'e,
na ket llnite'e nezen, na llabie'e dayubre.
5Na rwe' Israel ¿bixhchen ba bayechjzo nada'?
¿Na rwe' Jerusalén, bixhchen ba balliyo nada' kale?
¿Bixhchen llawero gako wednay
na bi llenlo wabiw?
6Ba bzenaya ke llwere di'll,
axha bi ne' yenla ni to re'
wayatere ke damar ka' llunlen,
na ne' ake' doyichj dorall ake':
¿Bixhan ba bena cha'?
Yoy akte zajzedo ake' rres,
ke to kabay ba zajze raw wdil.
7Xte rente ba nzi cigüeña da raw llan
nezeba bat wabiba.
Chintrgoyen, na liye'n, na bzuz yeon
nez akeba bat chej akba latj yubre.
Axha rwe', yell kia,
bi numbiero xtilla ka' ba bdichjbian.
8¿Akre llunlizre nere nakto be'nn sin,
na napre xtill Xanllon dan ba bdichjbie'en?
Le be'nn ka' llzoj di'll wxhiye ka'
ba baxoatere ke ake'.
9Axha be'nn sin ka' si ake' yelsdo,
na lle'eb ake' ke to bayix ba'ba bdol.
¿Ganxha yel sin ke aken,
le ba balliy ake' kale lloa xtillan?
10Kelen'na nada' wa xhor re' ka' be'nn yub akre, nench'na suren ake' le ake',
yell-liw kere ka' wayaken ke be'nn yubre.
Le yoytere ke be'nn gur, na bi nak bidao,
tuze ke llunle xbab, zerallre da binak kere,
ka be'nn ka' llayixjwe di'll ka', na bxus ka',
yoy akte ziye.
11To kullze llun ake' rmell we ke be'nn yell kian,
na ne ake' yoyten zajzen wen,
axha ziye akzen, le yoyten binak aken wen.
12Llayal wayere
kanake llunre da ka' bi llazrallan.
Axha bikse llayere,
bill neze re' bi dan ne' wayere.
Kelen'na, keten wsakzia ren,
sjachew re', na yalre kan llyial be'nn ka' yela.
Nada' Xanle ba bnia ka'.
13Xanllon ba bnee:
Wzoya yell kian kan llzoye trigo.
Ni tich uva bill waga'n gan sjanaz ake' lba uvas ka',
ni tich higo bill waga'n le yay higon.
Zerawze lay da ba nkoad yega'n.
14Na be'nn yell ka' ne' ake':
¿Bixhchen wagansllo gani'?
Yoytello chejllo yell xhen war ka',
na gut'tega ake' lliw tuchize.
Le Xanllo Diozen ba bdichjbie'e kan kweyillon,
gune'e nis yerb yajllo,
le ba bxinjllo kone le'e.
15Llbexhllo gak wen kello
axha bitbi dawen ne' gak kello.
Llbexhllo gakllo rmell,
axha sjallasllo lleb'llo.
16Baza be'nnen llwiere lli'on.
Ba rentekaze latjen nzi Dan, llgo bich xhin kabay ka'.
Na keten llusia akban to xhis yell-li'on.
Zak ake' lladlleyi ake' latj yell-liw ni, na rente da ka' sjade rawen.
Yell xhen ka', na yoyte be'nn ka' sjalla rawen.
17Xanllon ba bnee:
Wsela kone re' bel snia ka',
na chi'n akba re',
na bitbi gat da wasra re'.
Jeremíazen lljelere ke yell ke'en
18Bitbi de rmell ke dan lljeleran,
raxhdawan zu yiachen.
19Doxhente latj yell-liw ni
ba'ren bell be'nn yell kian.
¿Bill zu Xanllon Sión'na cha'?
¿Bill zu be'nn wnebia ke'en gana' cha'?
Na Xanllon ballie'e xtill aken:
¿Bixhchen gudyire nada' kanake llweraore loe lsak ka',
dios ka' bi numbieren, na da sjanak nllare?
20Ba bde boan, na ba bde wrapen
na bine' gat da wasra lliw.
21Llrera llalleyraw be'nn yell kia ka',
na len nzoa yiachen nada', na llcheben nada'.
22¿Bide to rmell gan nzi Galaad?
¿Nuno wen rmell zu gana'?
¿Bixhchen be'nn yell kian bi llak ake' rmell?
Currently Selected:
Jeremías 8: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios