Jeremías 10
10
Loe lsak ake', na ga llwerao ake' Dios dogarj
1Yell ke yell Israel, le wzenay xtill Diozen. 2Xanllon nee:
Bi nawre gunle kan llun be'nn ka' sjalla latj yell-liw yubre,
na bi were latj wcheb da ka' llak le yeban re',
lakse daki llcheben be'nn ka' sjalla latj yell-liw yubre.
3Dan naw be'nn yell ka' llwerao aken, bitbi zaken.
Llzoy ake' to yay da zu ya' yeo,
to be'nn wenchao yay llunchawen kone skopl,
4na llayull'na llwasjen ya plat, na ya de oro,
na llyinten krab kone martiy
nench'na bi yalen.
5Loe lsak ka' nak akzen ke dan numbiallo be'nn che'n.
Da ka' lljazoa ake' lix gan naz ake' bi da gaw ake',
bi llak llne'e aken,
na ll-len aken, le bi llak za' aken.
Bi llebre ke da ka',
le bi llun aken ni dawen, ni damar.
6Xana, nullno zu ye to ke rwe',
zerawze rwen nako be'nn xhen,
ra'on naken daxhen, na napen yelwak.
7¿Nuxha bi lle'eb rwe' be'nn llnebia yell zan ake'?
Rwen llayal lle'eb ake'.
Raw yoyte be'nn sin ka', na be'nn wnebia ka' sjalla raw yell-li'on,
nullno zu ye to ke rwe'.
8Yoy akte sjanak ake' be'nn wednay,
bitbi yel llajnie nap ake'.
Bitbi de wzajniere to yay bchuyen le ake'.
9Loe lsak ke ake' sjanak aken de ya plat da za gan nzi Tarsis,
na ya dan nzi oro zan gan nzi Ufaz,
sjanak aken da ben wenchao yay ake', na da ben be'nn ka' llason ya,
na sjanoak aken rall sul, na da xna,
yoy akten sjanak aken nbaraz le nak aken da ben be'nn ka', nun akteksen xchin ake'.
10Xanllon nake Dios dogarj,
Dios ba'n, na llnebie'e ke chnare.
Na keten llaklle'en, yell-li'on xhizen,
na latj yell-liw ka' bi zoe akren keten llaklle'en.
11Re' be'nn yell, Israel, le ye be'nn ka' bi nxenlall Diozen: dios ka' bi ben yeban na bi ben ake' yell-li'on, waran ake' raw yell-li'on, na ni tich ake' bi yegan raw yell-li'on.
Da llul ake' da llwerao ake' Dios
(Jer 51.15-19)
12Xanllon, kone yelwak ke'en benee yell-li'on,
kone yel sin ke'e na brekw'lle'e yell-li'on,
na kone yel llajnie ke'en bchirje yeban.
13Kone chie'e zilljen, llchonch nisen zajze le yeban,
llelepe bej ka' sjade raw yell-li'on,
llune nench llep yez keten llak yejwon,
na llbaje'e ben gan ngochawen'na.
14Yoyte be'nn nach ka' sjanak ake' be'nn wednay, na bi llajnie akre.
Na loe lsak ka' llunen sdo ke be'nn ka' llunchaw len'na,
nak aken bxen da wxhiyeze, na bi sjanapen yelnban,
15nak aken da bibi zak,
na keten Xanllon gunee yel korchisen, kena wlleyie'e yoyten.
16Nllateksen nak Dios ke Jacoben,
le'en benee yoyte da sjade.
Le'en breje'e Israelen nench'na guken yell ke'e.
Xanllon nap doxhente yelwak, kan nzi le'en.
Di'llen be be'nnen llayixjwen rente be'nn ka' sjalla latj yell-liw yubre
17Re' zajzure latj yell-liw ni, bazak be'nn ka' chechj ake' re',
na le watup yoyte da sjade kere.
18Le Xanllon ba nee:
Na' wzala re' zit kwis
yoyte re' zajzure latj yell-liw ni.
Wzoa yiacha re',
na narachk cha kone ka' wallelere nada'.
19Niachraz naken kia nada' ke naken ba llalleyrawan.
We kia ka' bitbi rmell ke sjade.
Na nada' bena xbab ke
bi suera dan lleyllran.
20Yo' kian ba bayinjen,
yoyte du ka' ba blluy aken.
Xhi'nna ka' ba bsanlall akbe nada'
bill zu akbe.
Nullnu zu walis yo' de yid kia ka',
nullno zu wchirj rall ka'.
21Be'nn ka' llnebia yell ni, sjanak ake' be'nn wednay,
bi llayirj ake' Xanllon.
Kelen'na bi ben ake' ga'n
na yoyte xhir ke ake' ka' ba nazlas akba.
22Lewzenay. Ba bra to di'll da llixhjoe.
Latj yell-li'on lli rale zak waka ya ka' sjanap yelwaken,
na wayun ake' yell xhen ka' sjanap Judán
to latj dach yu bill ga cha bekw yiw ake'.
23Xana, nada' nezra ke be'nn nachen bi nak kwent ke'e yelnban ke'en,
na bi de latj ke'e wnebie'e raw xnezen.
24Bago neto' nez kon kan nak yel korchis ko'on,
kere kone yel llaklla, le wlleyiw neto' chet ka'.
25Boasj yel llaklla ko'on kone latj yell-liw ka'
bi llazake rwen,
raw be'nn yell ka' bi llalwill rwen,
le ba bdeb ake' yell ke Jacoben,
na ba blleyi ake' dokenaken
na ba bachinj balan ake' latj yell-liw keton.
Currently Selected:
Jeremías 10: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios