Jeremías 36
36
Baruken brabe di'llen ba nyojen lo yoda'on
1Kan ba guk tap iz llnebia Joaquim na, Xhi'nn Josías be'nnen llnebia Judán, Xanllon balwille Jeremíazen, na gulle'e le'e: 2Bxhi to bnuk yid xha bayix ga wzojo, na bzoj gana' yoyte dan ba gulla rwe' kan gak ke Israelen, na Judán, na latj yell-liw ka' yela, kan bzorawtia balwilla rwe' kan llnebia Josíazen, xte na lla'. 3Narachk cha keten ne'ze be'nn Judá ka' yoyte damar ka' ba bena xbab wsela ke aken, na wsan ake' bill gun ake' damar ka' llun aken, na nada' wazixhena damar ka' naw ake' llun aken, na daxhinj ke ake' ka'. 4Jeremíazen guxhe'e Baruken, be'nnen nak xhi'nn Nerías, na gulle'e le'e wzojge doxhente kan ba gull Xanllon le'en, na Baruken bzojguen. 5Natell Jeremíazen gulle'e Baruken ki: Bwiakero, nada' yoa lo rill ya ni, na ll-llunen cha lo yodao ke Xanllon. 6Na na' biaj, na brab di'll ka' ba gulla rwe' wzojon, keten gun ake' wazen, nench'na wzenay yoyte be'nn yell ka' len, na' yoyte be'nn ka' sjalla yell xhen ka' nbanle Judán, be'nn ka' ba bed gani', na wzenay ake' xtill Xanllon. 7Narachk chetkarize le aken walwill ake' Xanllon, na wayat akre, na wsan ake' nez xhinjen naw aken, le rawe gan llruk Xanllon ba bchebe'e le ake'. 8Na Baruken benee kan gull Jeremíazen le'en: Biaje lo yoda'on na brabe gan ba sjallia llwa xtill Xanllon. 9Raw ga beo iz gaye' kan llnebia Joaquim na, xhi'nn Josíazen, be'nnen llnebia Judán, gulle'e be'nn ka' sjalla raw yell Jerusalén'na, na rente be'nn ka' zak yell xhen ka' sjanbanle Judán, nench'na gun ake' was, na walwill ake' Xanllon. 10Na Baruken biaje lia dan de yichj yoda'on dan nzi lloa rej kuben, na gan zu yo' ke Guemarías, xhi'nn Safán be'nn wazoj na, na brabe gan sjallia di'll ka' gull Jeremíazen le'e wzojge.
Baruken brabe di'll ka' raw be'nn wnebia ka'
11Na Micaías xhi'nn Guemarías xhasoa Safán na, benle doxhente xtill Xanllon dan brab Baruken, 12na biaje lo yo' rill be'nn wnebian, lo yo' dao riz ke be'nn wazojen, gan sjalla be'nn wnebia ka': Elisamá, be'nn wazoj na, Delaías xhi'nn Semaías, Elnatán xhi'nn Acbor, Guemarías xhi'nn Safán, Sedequías xhi'nn Hananías, na ye txhonj be'nn llnebia. 13Na Micaíazen be di'll doxhente ke di'll dan brab Baruken, raw lkoe be'nn yell ka'. 14Na be'nn wnebia ka' bsel ake' be'nnen nzi Jehudí, be'nnen nak xhi'nn Netanaías xhasoa Selemías xhi'nn xhasoa Cusí nench'na lljalle'e Baruken goxe'e gan sjallia di'll ka' dan brabe raw be'nn yellen. Natell Baruken bxhie gan sjallia di'llen, na biaje gan sjalla aken, 15na le aken gull ake' le'e:
—Bllekero, na brab ke di'llen llia le dan noxon.
Na Baruken braben, 16bixha ke bayull ben akre di'llen blleb ake' kwis, na bayechj ake' llwie raw loellj ake', na bnee ake':
—Llayal chixjoello doxhente dani raw be'nn wnebian.
17Natell gull ake' Baruken:
—Berenchk neto' di'll akre guken bzojo doxhente dani.
18Na Baruken ballie'e xtill aken:
—Kwinkse Jeremíazen gulle'e nada' doxhente dani, na nada' bzojan le dani.
19Natell gull ake' Baruken:
—Rwe', na Jeremíazen lechaj le llajkoach, na nutno ne'ze garen lljasure.
Joaquim be'nnen llnebian bzeye'e gan sjallia di'll ka'
20Be'nn braw ka' llnebian bkoan ake' gan sjallia di'llen lo yo' dao riz ke Elisamá, be'nn wazojen, na biaj ake' jatixjwe akre doxhente dani raw be'nn wnebian. 21Na be'nn wnebian gulle'e be'nnen nzi Jehudí lljaxie'e gan sjallia di'llen yu lo yo' dao riz ke be'nn wazojen nzi Elisamá, na ke ballinen, na braben raw be'nn wnebian, na raw yoyte be'nn braw ka' llnebian nechj le'en. 22Na ke lla ka' naken beo ke da zay, na zu be'nn wnebian lo yo' ke'en ga nunchawe ket llbe da zay, na llie'e llwa yi'. 23Na ket llayull llrab Jehudín chon tap kwen wej gan sjallia di'll ka', be'nn wnebian le llzoyten kone kuchiy, na le llzalten lo yi'. Na ka benee bzeye'e yoyte gan nyoj di'll ka'. 24Nike bllebze be'nn wnebian, ni be'nn braw ka' llnebian, doxhente ke di'll ka' ba ben akren, na nike broe aksre cha jel akre. 25Elnatán, Delaías, na Guemarías gotyoe akre be'nn wnebian nench bi wzeye'e gan sjalla di'll ka', axha le'en bi wenle'e wzenaye, 26na bsele'e Jerahmeel bin nak xhi'nnen rente Seraías xhi'nn Azriel, na Selemías xhi'nn Abdeel na, nench gox ake' Jeremíazen rente wazoj ke'e Baruken, nench lljalo ake' le ake' lo rill ya. Axha Xanllon bkoache le ake'.
Jeremíazen bzoje'e ye to kwen di'll ka'
27Na ke bayull bzey be'nn wnebian gan sjallia di'll ka' gull Jeremíazen Baruken, na gull Xanllon Jeremíazen: 28Bxhi ye to ga wzojo dayubre, na bzoj doxhente kan nyoj danellen, dan bzey Joaquim be'nnen llnebia Judán. 29Na gulle'e: Ki ne Xanllon: Rwe' bzeyo gan nyoj di'll ka', na benlo Jeremíazen snia dan bzoje'e ke be'nnen llnebia Babilonian yede'e, na wlleyie'e latj yell-liw ni, na watach walane be'nn nach ka', na bayix ka'. 30Na kelen'na nada' Xanle llepa rwe' Joaquim be'nn llnebia Judá, bi su xhi'nn xhasoaw zjachia gan bnebia Daviden. Llit wat ko'on gaten raw will, na sin da zay ke tllelen. 31Na rwe', na rente xhi'nn xhasoaw ka', na lekse ka' be'nn ka' llnebiarenon, wsakzia re' xtol damar kere ka'. Guna nench'na sakzi re', na yoyte be'nn sjalla Jerusalén'na, na rente Judá, guna yoyte damar ka' ba bdixjweran kanaken bi bzenay re'.
32Natell Jeremíazen bxhie'e ye to ga bzoj be'nn wazoj ke'en nzi Baruc, na bzoje'e doxhente kan ba gull Jeremíazen le'en, yoyte ke di'll ka' nyoj dan bzey be'nn wnebian nzi Joaquim na, na bzojte'e ye to chop di'll da nak ke walle kelen.
Currently Selected:
Jeremías 36: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios