Jeremías 35
35
Jeremías na rente be'nn ka' nzi recabitas
1Ke lla ka' llnebia Joaquim, xhi'nn Josíazen gan nzi Judá, Xanllon balwille nada', na gulle'e nada': 2Biaj rall be'nn recabitas ka', na be'ren ake' di'll. Na bche ake' to lo yo' daoriz ka' zu lo yoda'on, na be ake' yej ake' zu ke uvas. 3Nada' Jeremías, bia jadirja Jaazanías xhi'nn ye to be'nn nzi Jeremías, xhasoa Habasinías, na be'nn biche ka', na xhi'nne ka', na yoyte be'nn yell ke recabitas ka', 4na bchia le ake' gan zu yoda'on gan sjalla xhi'nn Hanán, bin nak xhi'nn Igdalías, na be'nn ni llunee xchin Dios. Na yo' daorizni zun kwite ke be'nn ka' llnebia lo yoda'on, na kullre yichj yo' daoriz ke Maaseías na, be'nnen nak xhi'nn Salum, be'nnen llap llwa yoda'on. 5Na bda' da yej be'nn recabitas ka', na basllatia lew ka', na lekse ka' xbin ka', na gull ake': Le yej rat zu ke uvan.
6Na le aken bnee ake': Bi llejto zu ke uvas, le Jonadab, xhi'nn Recab, be'nn xustawton bllune chras kone neto' rente xhi'nn xhasoato ka' bi yejto zu ke uvan. 7Na lekse ka' bllune gunto yo', gaz ganto yu lix, gazto yay xhixh, o cha gazto lba uvas. Na gulle'e neto' gunchawto yo' de rall ga suto chull wej, nench'na gat yelnban keto raw yell-liw ni, gan dato ke be'nn zit. 8Neto' ba bzenayto yoyte dan gull xustawton nzi Jonadab, na chras bi llejto zu ke uvas, ni neto', ni xhorto ka', ni xhi'nnto ka', 9ni bi llunchawto yo' nench'na suton, ni bi llazto lba uvas, na bi llazto yu lix. 10Zuto yo' de rall ake', na llunto doxhente kan bnee xustawto Jonadab na. 11Axha kan Nabucodonosor'na, be'nnen llnebia Babilonian, blanee latj yell-liw ni, kenan bento xbab yedto Jerusalén'na, nench'na xhonjeto waka ya ke be'nn caldeos ka', na be'nn sirios ka', na kelen'na zuto Jerusalén'na.
12Natell Xanllon balwille Jeremíazen na gulle'e le'e: 13Nada' Xanle nap doxhente yelwak, Dios ke Israelen llnia rwe' nench'na chejo lljazenlo be'nn Judá ka', na be'nn ka' sjalla Jerusalén'na: Lewsed kan wzenla ren, na' le wzenayen. Nada' Xanle nia: 14Bi ka' sjanak xhi'nn xhasoa Jonadab, xhi'nn Recab, ba ben akbe kan gulle'e le akben dan bi yej akbe zu ke uvan, na xte na' lla bine' yej akben, le ba bzenay akbe ke xustaw akben. Na' leskakse nada' ba gulla re' welse bixhan gunle, axha re' bine' wzenayre kia. 15Welse ba bsela be'nn ka' llixhjoe llwa xtillan nench'na lle ake' re': Lewsan yel kan llun keren, na daxhinj ka' llunlen. Bill nawre dios ka' yela, na bill weraore le ake', nench'na gat yelnban ke re' raw yell-li'on ba bena' ren, na rente xustawre ka'. Axha re' bi wenere gunle nada' kwent, na bine wzenayre kia. 16Xhi'nn xhasoa Jonadab, be'nnen nak xhi'nn Recab, ba ben ake' kan gull xustaw aken le ake', axha yell ke Israelen bine' wzenay ake' kia. 17Kelen'na nada', Xanle nap doxhente yelwak, Dios ke Israel, nia: Nada' guna nench'na wadtan Judán, na be'nn ka' sjalla Jerusalén'na yoyte damar ka' ba bdixjwe akren. Le nada' welse ba berena re' di'll, na bine' gunle nada' kwent, ba balwilla re', na re' bine' wallire xtillan.
18Na lekse kakse Jeremíazen gulle'e be'nn recabitas ka': Xanllon nap doxhente yelwaken, Dios ke Israelen nee: Kanake re' ba bzenayre ke xustawre Jonadaben, ba benyianre doxhente kan gulle'e ren, 19nada' Xanle nap doxhente yelwak, Dios ke Israel, llepa re' daliyan chras bi yallj to xhi'nn xhasoa Jonadaben bi gun xchina.
Currently Selected:
Jeremías 35: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios