Jeremías 34
34
Di'll da bsele'e ke be'nn wnebian nzi Sedequías
1Kan Nabucodonosor, be'nnen llnebia Babilonian, na kone yoyte waka ya ke'e ka', be'nn ka' sjalla latj yell-liw yubre gan llnebien, na llakdilren ake' Jerusalén'na, na yoyte yell wrill ke'e ka', Xanllon bne'e Jeremíazen na gulle'e le'e: 2Nada' Xanle, Dios ke Israel, llnia rwe', biaj na gull Sedequías be'nnen llnebia Judán: Kin nee Xanllon: Nada' guna nench be'nnen llnebia Babilonian wla'ne yell xhen ni, na wzeyen. 3Na rwe' bigak waxhonjo, dekse de yexjo rawne'e, na wzap ake' rwe', na wayun ake' rwe' rallna le'e, natell keten ba jasan ake' rwe' gan ze'en, natell wche ake' rwe' Babilonian. 4Axha na' bzenay Sedequías, rwe' llnebiaw Judán, nada' naka Xanle, na bzenay kan yepa rwen: Bi koeyiw kone spaden. 5Nbaraz koeyiw, na wzey akte da la xhixh gan badew ba guto'n, kan ben akse bzey ake' da la xhixh kan gut xustawo ka', be'nn ka' bnebia danellte ke rwe', na ne' ake': Niachraz zuto le ba blleyi xanton. Nada' Xanle bakse bnia ka'.
6Na Jeremíazen gulle'e Sedequíazen be'nnen llnebia Jerusalén'na doxhente ke di'll ki. 7Na lekse kena be'nn waka ya ke be'nnen llnebia Babilonian llakdilrene Jerusalén'na, na yell xhen ka' nzi Laquis, na Azecá, le da ki sjanak aken yell xhen da sjanechj ze war ake', da nutno bine' gak bi gune le aken.
Bi bdap ake' baran dan be ake' xtille dan wasra ake' be'nn hebreos ka' llun xchin aken
8Xanllon gulle'e Jeremíazen kan bayull bchajlla Sedequíazen to di'll kone be'nn ka' sjalla Jerusalén'na nench'na wasra ake' be'nn ka' llun xchin aken. 9Di'll dan bchajlla aken naken ke be'nn ka' sjanap be'nn biew, na nor be'nn wen llin be'nn hebreos, na wasra ake' le ake', na ni yetich ake' bill gun ake' xchin be'nn Judíos ka' sjanak be'nn bich ake'. 10Yoyte be'nn ka' sjanak be'nn braw, na yoyte be'nn yell bcheb ake' gun ake' ke di'llen ba bchajlla aken, na ba basra ake' be'nn ka' sjallun xchin aken, be'nn ka' bi llixhj aken, na bill bchie akre le ake' nench gun ake' xchin aken. 11Axha kan bdena bayat akre dan basra ake' le aken, na bche akre le ake' nench bayun ake' xchin aken dayubre.
12Natell Xanllon, balwille Jeremíazen dayubre, na gulle'e le'e: 13Nada' Xanle, Dios ke Israel, bchajlla to di'll kone xustawre ka' kan babeja re' Egipton, gan llunle llin na bi llixj ake' re'. Na gulla le ake' 14ze gall iz wej wasan ake' nuteze be'nn sjanak be'nn hebreos, be'nn be't kwin ake' raw le aken, na gun ake' xchin ake' xop iz. Axha xustawre ka' bi ben ake' nada' kwent, na bi bzenay ake' kia. 15Na na' re', ba bachare yel kan llun keren, na ba benle kan llazrallan, kanake ba basanle be'nn wrall ke re' ka' sjallun xchinlen. Na ba bcheb re' gunle ke dan ba bchajllallo lo yodao kian. 16Axha ke bde na, na bachare kan nakren, na btitjere nada', na jaxhire be'nn ka' ba basanlen nench'na bayun ake' xchinle dayubre. 17Na na' nada' Xanle, nia: Re' bi bzenayre kia, le bi basanle be'nn wrall ke re' ka' sjallun xchinlen, na na' nada' wa latj nench'na gat wdil, gat yillwe, na gakre win da yej gawre, nench'na wcheben be'nn ka' sjalla latj yell-liw yubre kan llak keren. Nada' Xanle bakse bnia ka'. 18-19Be'nn wnebia ka' sjalla Judán, na Jerusalén'na, na rente be'nn wen llin ke ake' ka' sjallaren ake' lo yo'raon, bxus ka', na yoyte be'nn ka' bcheb walaraw ake' ke dan ba bcheb ake' rawan: na ben ake' choplare to belldao na bde ake' radjen. Axha bayullna btitj akre ke di'llen ba bchajlla aken, na bi balaraw aken. 20Kelen'na guna nench'na lljagon ake' rallna be'nn ka' llwiere le aken, na gut ake' le ake', na gaw chud le ake', na bayix snia ake'. 21Lekse ka' guna ke Sedequíazen be'nnen llnebia Judán, na be'nn ka' llnebiarenen yexhj ake' rallna be'nn ka' llene gut le aken, be'nn ka' llwiere le aken, natell lljagon ake' rallna waka ya ke be'nnen llnebia Babilonian, le na' ba bsane bill llakdilrene le ake'. 22Yepa be'nn ka' wayechj ake' yell xhen ni, na gakdilren aken, na wzey aken. Na lekse ka' guna nench'na latj yell xhen ka' sjanbanle Judán wayak aken latj dach yu bill, na nullno be'nn cha rawen. Nada' Xanle bakse bnia ka'.
Currently Selected:
Jeremías 34: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
