Jeremías 33
33
Llixjwen gat yel nak lay
1Llakte ne' yu' Jeremíazen lia rill ya dan zu ke be'nn ka' llapen, Xanllon bne'e Jeremíazen dayubre, na gulle'e le'e: 2Nada' Xanle, bena yell-li'on, na benchawan, na brekw'llan gan llayal sun'na, llnia rwe': 3Balwill nada', na wallia xtillon, na wruera rwe' biteze da sjanak daxhen, na da ngach da bi nezro. 4-5Nada' Xanle, Dios ke Israel, de to di'll da llnia ke yo' ka' sjanap Jerusalén'na, na yo' ka' sjanap be'nn ka' llnebia Judán, na da ki wayinj aken. Dan lloj ake' lljatilren ake' kone spad be'nn caldeos ka', be'nn ka' blis yay ka' nench'na biep ake' gukdilren ake' yell xhen'na, na gunen llin nench chan be'nn wat ka'. Rawe gan llrukan, wlleyia re', le bill zerena yell xhen ni, xtol daxhinj xhen ka' ba benlen. 6Axha guna re' rmell, na wazoa re' wen nench'na si re' banez dan llzoa nbarazen. 7Nada' wacha dan zuyach Judán, na Israelen, na wayunlaya yell ka' nench'na wayak re' kan nakre batna. 8Wayuna re' yall raw yoyte daxhinj ka' benle kone nadan, na wazixhena ke re' raw yoyte damar ka' ba benle dan bayechjre nadan. 9Jerusalén'na gaken to da wzoa nada' nbaraz le nsan da llajraw, na yel baran, raw yoyte latj yell-liw ka' yela. Na keten yen' akre ke dawen'na lluna ke be'nn ka' sjalla Jerusalén'na, na yoyte yel nak lay dan we aken, na wcheben le ake'.
10Xanllon nee: Re' lle loelljre, latj ni naken to latj dach yu bill, na nutno be'nn nach sjalla rawen, ni bayix ake', na nez ka' sjade Jerusalén'na, na yell xhen ka' sjanbanle Judán ndach aken, ni be'nn nach, ni bayix bi zajzu rawen, axha na' cha', gani' wazuraw ake' wayen akre 11gak lni', na cha ake' nbaraz gul ake', na gul ake' ke be'nn ka' llchoyna, na ne' ake': Lewe yel lluxken ke Xanllon nap doxhente yelwaken, le Xanllon nake be'nn wen, le yel nllie ke'en naken ke chnare. Na wadoa ake' lo yoda'on da llazarall ake'. Awa nada' wayunlaya latj yell-liw ni, nench'na wayaken kan naksen danellte. Nada' Xanle bakse bnia ka'.
12Xanllon nap doxhente yelwaken nee: Latj yell-liw ni na' naken to latj dach yu bill, na bi llan be'nn nach, ni bayix ake', na yoyte yell xhen ka' sjanbanlen'na, wazuraw wayaten yix nench'na be'nn ka' llap bayix ka', wche ake' bayix ke ake' lljawau akeba gana'. 13Yoyte yell xhen ka', na ya' yeo ka', na gan nak rach, na yell xhen ka' sjanbanle Négueb, na yell-liw gan nbanle Benjamín'na, na doxhente gan nechj Jerusalén'na, na yoyte yell xhen ka' sjanbanle Judán, wazuraw be'nn gup bayix ka' warab ake' bayix ke ake' ka'. Nada' Xanle bakse bnia ka'.
14Xanllon ba bnee: Wllin lla ket nada' walarawa yoyte yel nak lay ka' bcheba guna kone Israelen, na Judán. 15Ket llin lla ka', na lekse kena guna ke Daviden su to xhi'nne xhasoe bi nak dogarj, na gumbe'e yel korchis, na dalixhej raw yell-li'on. 16Na ke lla' ka', Judán waran, na Jerusalén'na nutno gunbeye len. Na ki ne' ake': Xanllon nake'e yel wasra kello. 17Nada' Xanle llnia: Do tiemp kwia be'nn wnebia Israelen, be'nn nak xhi'nn xhasoa David, 18na lekse ka' do tiemp su bxus ake', be'nn sjanak xhi'nn xhasoa Leví, be'nn wzey nbas, na gunxhen ake' nada', na wzey ake' bayix ake'.
19Xanllon bne'e Jeremíazen, na gulle'e le'e: 20Nada' Xanle, nia: Chras bigak yella kan ba bdichjbian, kan banunksa ke tellan, na ke tllelen, le llinkse hor gak tellan, na tllelen. 21Na kaksen naken bni wsana bi guna ke dan ba bcheba guna kone be'nn wen llin kian nzi David, ke naken kwia xhi'nn xhasoen wnebie'e, na lekse ka' bigak, bi walarawa ke dan ba bcheba guna kone bxus ka' sjanak xhi'nn xhasoa Levín. 22Na xhi'nn xhasoa be'nn wen llin kia Daviden, na be'nn wen llin kia ka' sjanak xhi'nn xhasoa Leví, na guna nench'na gak ake' be'nn zan kwis, keksen nian berj ka' sjallia le yeba, na kan sjanak yuxh ka' zajnit llwa nista'on, dan nutno llak llrab len.
23Xanllon balwille Jeremíazen, na gulle'e le'e: 24¿Bine' gakbero kan llwe be'nn ka' di'll, nada' balliya kale chop kwe be'nn yell biazralla, Israel na rente Judá? Kelen'na llun ake' kaze yell kian, na billkse llak akren to latj yell xhen. 25Axha nada' Xanle, llnia: Ke nake nada' ba bdichjbia kan nak ke tellan, na ke tllelen, na lekse ka' da ka' bchajlla kone da ka' llnebia le yeban na kone yell-li'on, 26na chras bi walliya kale xhi'nn xhasoa Jacoben, na David be'nn wen llin kian, na lekse ka' bi walliya kale xhi'nn xhasoa Abraham, Isaac, na Jacob. Le nada' wayachralla le ake', na wayak lay ake'.
Currently Selected:
Jeremías 33: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios