Jeremías 32
32
Jeremíazen bayawe'e to yell-liw
1Xanllon bne'e Jeremíazen kan ba guk chi iz kan llnebia Sedequíazen gan nzi Judán, na ke guk chinchon iz kan llnebia Nabucodonosor'na. 2Na ke lla' ka', waka ya ke be'nn wnebia ke Babilonian llakdilrene Jerusalén'na, na be'nnen llayixjwe di'llen nzi Jeremías neyje'e lo rill ya dan zu lia yo'rao braon. 3Be'nn wnebian nzi Sedequíazen broe le'e lo rill ya, le Jeremíazen bnee: Xanllon nee: Guna ke yell xhen ni wayaken rallna be'nnen llnebia Babilonian, 4na be'nn wnebian nzi Sedequíazen bi ware'e raw be'nn caldeos ka', na wche ake' le'e nench'na lljasie'e raw be'nnen llnebia Babilonian. 5Nabucodonosor'na wche Sedequíazen Babilonian, na gana' gaye'e llinte lla' ket nada' lljarane'e. Na lakse re' tilrenle be'nn caldeos ka', bi gunle le ake' ga'n. Nada' Xanle bakse bnia ka'.
6Na bnee Jeremíazen: Xanllon bsele'e di'llen kone nada' na bnee: 7Bwiakero, be'nn bich loelljon nzi Hanamel xhi'nn Salum, yede'e wadchabe to yell-liw ke'e dan de Anatot nench'na wazi'on, le rwe' llayal wazi'on dan nake be'nn bich loelljo gawchoch. 8Na guk doxhente kan gull Xanllon nada', be'nn bich loelljan nzi Hanamel, bede'e badrane'e nada' lo rill yan, na gulle'e nada' cha wazia yell-liw lixen de gan nzi Anatot, yell-liw gan nbanle Benjamín'na, le nada' llayal wazian, na yeganrenan le dan nake be'nn bich loellja gawchoch. Na gukbera naken da za ke Xanllon, 9-10na bayawa yell-liw lix ke be'nn bich loellja Hanamelen. Na bie'e chinchop mell yaj plat keton be'to xtillen, na gukchaw xlichen na bioten sey, na bchichte xben be'nn ka' breren. 11Natell bxhia llopte yich ke yell-li'on, to dan yu chaw dan wewan, na ye ton da gak wia nuteze len, 12na le betian Baruken xhi'nn Nerías xhasoa Maaseías, na zete Hanamel be'nn bich loelljan llwie, na be'nn ka' bchich xben yich dan bayaw yell-li'on, na yoyte be'nn judíos ka' sjalli lia gan zu rill yan. 13Na raw lkoe le ake' gulla Baruken: 14Xanllon nap doxhente yelwaken, Dios ke Israelen, nee: Bxhi llopte yich ke yell-li'on, dan neij cha'on, na rente dan bi yu cha'on, brochaon lo lew de yun, nench'na sibian scha. 15Le Xanllon nap doxhente yelwaken, Dios ke Israelen, nee: Latj yell-liw ni wazuraw ake' wayaw ake' yo' ake', yu lix, na ga sjalla lba uvas.
Jeremíazen berenee Diozen di'll
16Natell ke bayull bayuna rallna Baruken yich ke yell-li'on, be'nnen nak xhi'nn Neríazen, na balwilla Xanllon, na gulle'e ki: 17Rwe' Xana, kone yelwak ko'on beno yeba rente yell-li'on, na bitbi da bni de ko'o rwe'. 18Rwe' llroero yel llayachrall ko'on raw mire be'nn ake', axha lekse ka' llsakziw be'nn nach ka' ni ke daxhinjen ben xa' ake' ka'. Dios xhen nap yelwak, ra'on naken Xanto nap doxhente yelwak. 19Xbab ko'on naken da nbaraz kwis, na lluno dazan kwis da llebaneto. Rwen llrero da ka' llun be'nn nach ka', na llixhj akoe kon kan llun aken. 20Rwen beno yelwak gan nzi Egipton, na lekse ka' ne' llunte'on xte na' lla' Israel ni, na yezikre kone be'nn nach sjalla raw yell-li'on, na le ba llze ko'o rwe'. 21Le kone yelwak xhen ko'on babejo yell ko'o Israelen Egipton, beno dazan yelwak, na bchebo yoy akte. 22Bew Israelen yell-liw ga dllirj lechen, na bllindaon kakse nis, beno konke da ka' bchabo kone xustaw ake' ka'. 23Axha kan byo ake' latj yell-liw ni, na guken ke ake', na bi bzenay ake' kan ba bzejniero le aken, na nike ben akze dan gullo le ake' gun aken. Kelen'na bselo da bsakzi le ake'.
24Kelen'na ba blis be'nn caldeos ka' ga chep ake', nench'na cho ake' yell xhen'na, na gat wdil, na win, na yillwe nench'na yell xhen'na yexjen rawna be'nn Babilonios ka'. Xana, ba brero ballakte kan bneon. 25Axha rwe' Xana, gullo nada' wayawa, na chixhja yu lixen raw lkoe be'nn ka', lakse cha yell xhen'ni wayaken rallna be'nn caldeos ka'.
26Natell Xanllon gulle'e Jeremíazen: 27Nadan naka Xanle, Dios ke yoyte da sjanap yelnban. Bitbi da bni de kia nada'. 28Kelen'na llepa rwe': Guna rallna Nabucodonosor'na yell xhen'ni, be'nnen llnebia Babilonian, na be'nn caldeos ka'. 29Be'nn caldeos ka' ba byo ake' raw yellen nench'na wzey aken, na wzeyren'akte yo' ka', le yichjo ke yo' ka' bzey ake' yar, nench'na beraw ake' loe lsaken nzi Baal, na lekse ka' brarj ake' zu ke uvas nench'na beraw ake' dios bi numbie akre. 30Le danellte, yell ke Israelen, na yell ke Judán ba ben ake' da bi llazralla, na be'nn Israel ka' bine' wsan akse gadyi ake' nada' kone loe lsak ka' ba ben ake' kone niana ake' ka', Nada' Xanle bakse bnia ka'. 31Yell xhen ni, ke llan bzoraw guk ake' to yell, xte na' lla bine' wsan akse dan lladyi' ake' nadan, na llcha ake' nada'. Ke len'na wachinj walanan, 32na kone yoyte da ka' ba godyi ben yell ke Israelen nada', na yell ke Judán, kan benkse be'nn wnebia ka', na xan ake' ka', bxus ke ake' ka', na be'nn ka' llayixjwe di'll, na yoyte be'nn ka' zajzu Judán na Jerusalén'na. 33Ba bayechj ake' nada', na bi llroe raw ake'. Lakse welse broe bsed akre, na bi llon ake' nada' kwent, na bi ne' yen akre wayo ake' nez. 34Bi bdap ake' baran lo yodao kian, le gana' bzoa ake' loe lsak sral ke ake' ka'. 35Na lekse ka' benchaw ake' raw bkuy ga beraw ake' diozen nzi Baal, na rach gan nbanle Ben-hinom bzey ake' xhi'nn ake' bi biew, na xhi'nn ake' bi nor ka', nench'na beraw ake' dios nzi Moloc, na kone ka' bxinj be'nn Judá ka', ben ake' to yel sral da bi gull ake' gun ake', na dani nike bdezen lo yich raxhdawa.
Da llcheba guna willjwani
36Nada' Xanle, Dios ke Israel, llnia ke yell xhen ni, kanake re' ba bnere ke wayaken rallna be'nnen llnebia Babilonian, xtol wdil, win na yillwe: 37Watupa be'nn wrall ke re' ka' raw yoyte latj yell-liw gan beslasa le aken, kan guklla, na dan bruka llebrazen, na na' guna ke wayed ake' latj yell-liw ni, nench'na su ake' nbaraz. 38Le aken gak ake' yell kia, na nada' gaka Dios ke ake'. 39Guna su wen lo yichj raxhdao aken, na tuchize gun ake' xbab werao ake' nada' raw doxhente yelnban ke aken, nench'na gak wen ke ake', na ke xhi'nn xhasoa ake' ka'. 40Guna kone le ake' to da wchajllato ke chnare: Chras bi wsanlalla guna dawen ke ake', guna ke sun yichj raxhdao aken nench werao ake' nada', na chras bi wsanlall ake' nada'. 41Nada' yewera guna wen ke ake', do yichj doralla guna da lixhej kone le ake', nench'na su ake' latj yell-liw ni. 42Na Xanllon bnete'e ye to: Kan benksa bsela damar xhen'na yell xhen ni, ka gunksa wsela da gun wen ke ake', na walarawa kedan ba bcheba gunan. 43Raw latj yell-liw ni, gan new wagan latj dach yu bill, ga bi cha be'nn, ni bayix ake', na wayaken ke be'nn caldeos ka', axha nada' llepa re', wazuraw re' dayubre wayawre yell-liw ake'. 44Wayawre yell-liw ake', na gakchawte xliche, choten sey, na wchichte xben be'nn ka' ba breren. Dani gaken latj yell-liw gan nbanle Benjamín'na to llwarawe gan nbanle Jerusalén'na, na yell xhen ka' nbanle Judán, raw ya' xhen ka', na rach ka', na yell xhen ka' sjanbanle Négueb, le nada' guna nench wayak lay ake'. Nada' Xanle bakse bnia ka'.
Currently Selected:
Jeremías 32: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios