Jeremías 31
31
Be'nn Israelitas ka' wallin ake' latj gan gurj aken
1Xanllon bakse bnee: Ket llin lla'na nada' gaka Dios ke yoyte xhi'nn xhasoa Israelen, na le aken gak aken yell kia.
2Xanllon nee:
Gan nak latj dach yu billen broera re' yel nak lay kian,
kone be'nn yellen bara raw yelguten.
Kan Israelen bayirje'e to latj wazirallen,
3nada' jabiya kwit aken kan ze ake' ziten.
Ke chnare nlliera rwe',
kelen'na ne' llunla rwe' wen.
4Wazoa rwe' wen yell Israel.
To nbaraz wayedo dayubre guno wayia
kone panderetas ka'.
5Wayazo dayubre lba uvas
raw rum ke Samarian,
na be'nn ka' wayaz lba uvas ka'
le ake' si ake' banez daxhixh ka' kwia rawen.
6Le za to lla' ket be'nn ka' llap
gusia ake' raw rum ka' nbanle Efraín na:
Yoytere le da, nench'na chejllo lo yodao ke Jerusalén'na
lljerawllo Xanllon.
7Xanllon nee:
Legul na le yewe ke yell ke Jacoben,
dan nak da braw raw latj yell-liw ka' yela.
Legun llakia, na le gul da llweraore, na le ne':
Xanllon basre yell ke'en,
be'nn ka' bagan' ke Israelen.
8Guna ke wabi re' latj yell-li'on lli rale,
na watupa re' ga zerawze de yell-liw.
Kone le ake' yed be'nn lchul ka', na be'nn ka' biza wen,
nor ka' noa xhi'nn, na nor ka' ba bzu xhi'nn,
Be'nn zan kwis wayed.
9Zeyak ake' llweren ake' nada' di'll, na bell akte.
Nada' wchia le ake' ga de nis,
ga nak rach, ga bi lljachew ake'.
Le nadan naka xa' Israelen,
na Efraín'na nake'e xhi'nna bi bzu danell.
10Re' sjallare latj yell-liw ka', le wzenay xtill Xanllon,
na le chixjoe yell ka' sjalla llwa nistaw ka' sjalla zit:
Xanllon beslase Israelen,
axha watupe le ake', na gape'e le ake'
kan llun gup bayixen llape'e xhir ke'e ka'.
11Le Xanllon basre yell ke Jacoben,
na basre le'e to raw latj yell-liw da nap yelwak.
12To yawe akre yed ake' gul ake' gan nak yichjell ke Sión'na,
na si ake' banez yel nak lay ke Xanllon:
trigo, zu ke uva, na seit,
xhir ka', na rente bell ka'.
Na gak ake' ke to lo rej ga sjalla yay xhixh ga de gop,
na bill wnit ake' dan ndiprall aken.
13Bi nor weo ka' to yawe akrebe wyia akbe,
na lekse ka' bi weo ka', na be'nn gur ka'.
Nada' wayunxhen ake':
nada' wacha dan llbell aken, na wayaken da yawe akre,
na we ake' to da su ake' nbaraz kwis da nakll daxhenll kerke dan lleyllra aken.
14Nada' guna nench'na bxus ka' gaw ake' yelwao chaw,
na be'nn yell kian si ake' banez xhen yel nak lay kian.
Nada' Xanle bakse bnia ka'.
15Xanllon nee:
To ren kaze llusia ake' gan nzi Ramá,
ke to be'nn bell-lolje kwis.
Raquelen, le'en belle'e ni ke xhi'nne ka',
na bi llenle wayakxhenle
le ba gut xhi'nne ka'.
16Axha Xanllon lle'e le'e:
Bill koello Raquel,
bill wzar nis yej rao ka',
le de si raxhjo dan llalleyraon,
le xhi'nno ka' walloj akbe latj yell-liw ke be'nn ka' llwiere ren.
Nada' Xanle bakse bnia ka'.
17Gat to latj ko'o willjwani:
xhi'nno ka' wayed akbe latj yell-liw ke akben.
Nada' Xanle bakse bnia ka'.
18Ba benla llebraz bell yell ke Efraín'na llaw ake' xhia:
Nada' naka ke to bell nbiy ba bi nmaxh,
axha rwe' ba bmaxho nada',
baze nada' kwiton dayubre,
le rwen nako Xana, Dios kia.
19Nada' babiya kwiton,
axha nada' llayatra,
ba bazakra daxhinj kia ka',
na ba brallchacha xholljan,
na llebraz llayiera
xtol daxhinj ka' ba bena kan ne' naka biwe'on.
20Yell ke Efraín'na naken kia nada', ke to xhi'nna bi nlliera,
le'en nake xhi'nna bi llebraz llazralla.
Na lakse ket llunle'e snia,
na dekse de lljadinlalle'e,
nlliera le'e doyichj doralla
na llebraz llayiachralle'e
Nada' Xanle bakse bnia ka'.
21Israel, ben sen raw nezen,
nench'na walleleron to setegaze,
bwiayian gan brow nezen.
Ba'bi, yell ke Israel,
ba'bi raw yell xhen ko'o ka'.
22¿Batxha zeraw lljataw gateze
ke to xhi'nna nor da llakllajlall?
Nada' Xanle, ba bena to da kub raw yell-liw ni:
noren wabie'e kone xhiewen.
Gak dawen ke Israelen willjwani
23Xanllon nap doxhente yelwaken, nee: Keten nada' wacha kan llak ke be'nn Judá ka', na le aken su ake' dayubre raw yell-liw ke aken, na raw yell xhen ke ake' ka', na ne' ake' dayubre: Xanllon gonlaychgue ya' xhirall gan zu yel korchisen. 24Be'nn ka' zajzu Judán, na rente be'nn ka' sjalla yell xhen ka', na be'nn ka' llasllan, na gup bayix ka' su ake' gana'. 25Le nada' wa yajlaw da yej da gaw be'nn ka' lljaxaken, na be'nn ka bi ndiprallen.
26Na ke ba'banan, na bsarja yajrawa ka'. Na bawera ke yeren bneran.
27Xanllon ba bnee: Za to lla nada' guna ke chan be'nn nach ka', na bayix ka' gan nbanle Israelen rente Judán. 28Na kan benksa batna bzeteze bzia blalla, bllixa, bzala, blleyia, na bena dakenxhie ke ake', kakse guna na' seteza wia nench'na wayonchawa, na wayaza. Nada' Xanle bakse bnia ka'.
29Na ke lla' ka' bill ne' ake': Xa' xna ake' ka' llaw ake' uvas zichj, na xhi'nn ake' bra lay akbe. 30Bixhchen ket llaw ake' uvas zichj, na llra' lay ake'. Yoyte be'nn kweyie'e kone daxhinj ke'e ka'.
31Xanllon bakse bnee: Za to lla wchajlla to di'll kub kone Israelen na rente Judán. 32Di'll dan wchajllaren aken bi gaken, ke dan bchajllarena xustaw ake' ka', kan bexa tak aken, kan babeja le ake' Egipton, axha le aken bi balaraw ake' di'llen bchajllaton, lakse nada' naka xan ake'. Nada' Xanle bakse bnia ka'. 33Danin wchajllarena Israelen keten llin llan: Guna ke da ka' wroe wsed akren tan lo yichj ake', na kone len kon le ake' nez raw yelnban ke aken. Nada' gaka Dios ke ake', na le aken gak ake' yell kia. Nada' Xanle bakse bnia ka'. 34Na bill gunen bien wroe loelljre nench'na gumbiere nada', le surawzen be'nn wak xte llinte kone bidao gumbie akre nada'. Nada' wazixhena ke yoyte damar kere ka', na bill lljadinlalla daxhinj ke re' ka'. Nada' Xanle bakse bnia ka'.
35Xanllon bzoe'e willen nench'na wsenin tella
na beo, na berj ka' wseni aken tllele,
llune'e nench'na lltane'e nista'on, na llusian keten llasen'na,
na le'en nzie'e Xanllon nap doxhente yelwak, na nee:
36Cha to lla' re' wxinjre
ke di'll ka' ba bzajniera ren,
ke lla'na Israelen bill gaken yell kia.
Nada' Xanle bakse bnia ka'.
37Cha to lla' bix le yeban ke ton naken'na,
na wsed ake' ke ton nak ra'ne yell-li'on,
ke lla'na nada' walliya Israelen kale
kone yoyte da ka' ba benen.
Nada' Xanle ba bnia ka'.
38Xanllon ba bnee: Za to lla' ket yell xhen kian wayakcha'on, surawzen gan zu ze ton xhen'na nzi Hananel xte llinten gan zu skin ke reij xhen'na. 39Na gana' wayajen to lixhejze raw ya' ke Gareben natell wayachjen wallinten gan nzi Goá. 40Doxhente rach gan llkoach ake' be'nn wat ka', na gan llon ake' de'n, na yoyte yu lix ka' sjade kull yeon ke Cedrón na llinten gan zu skin ke reij ke kabay ka', na gan llra' willen, gana' werao ake' nada', na yoyte da ki chras bill kweyi aken.
Currently Selected:
Jeremías 31: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
