Jeremías 30
30
Dan llchab Xanllon gak willjwani
1Di'll kin gull Xanllon Jeremíazen: 2Xanllon Dios ke Israelen, nee: Bzoj to le yich doxhente di'll dan ba gulla rwen, 3Le ba za lla wacha kan llak ke yell kia Israelen rente Judán. Nada' Xanle bakse bnia ka'. Nada' guna nench wayed re' yell-liw gan bia xa're ka', na siren banez.
4Di'll kin bnee Xanllon ke Israelen rente Judán. 5Xanllon nee:
Baren llak wesia kanaken ze da nxhollen
da llcheb, na bi llzoan le ake' wen.
6Lewnab, chetkarize
to be'nn biew wak sanee.
¿Bixhchen cha, llrera llwagoj be'nn biew ka'
ke to nor llak bes, na le sante'e cha'?
¿Bixhchen yoy akte bana' ake' llichdej cha'?
7Baza lla dan nsa da nxhollen,
ni yeto lla bi sakreben len.
Suyiach yell ke Jacoben keten llin llan,
axha nada' wasra le ake'.
8Nada' Xanle nap doxhente yelwaken, ba bnia:
Wasra be'nn yell kian rawe dan llsakzi le aken,
na bill gakll wsakzi be'nn zit ka' le ake'.
9Na gun ake' xchina ke nake nadan naka Xan ake' Dios, na xhi'nn xhasoa Daviden be'nn wnebian wsela keren.
Xanllon wasre'e yell ke'en
(Jer 46.27-28)
10Nada' Xanle ba bnia:
Bi lle'bo yell ke Jacob, le rwen lluno xchina,
bi lle'bo Israel,
le nada' wasra rwe' rente xhi'nno ka'
raw latj yell-liw zit gan ba jazoa ake' rwen.
Wayak wen ko'o rwe',
na suw nbaraz, na nutno wcheb rwe'.
11Nada' Xano bakse bnia ka',
na zerena rwe' nench'na wasra rwe'.
Wlleyia yoyte latj yell-liw ka'
gan beslasa rwen.
Axha bi wlleyia rwe',
wsakzia rwe' ke to llayal wsakzia rwe',
bi tegunen kaze dekse de wsakzia rwe'.
12Xanllon nee:
We ko'on bill wayaken,
damar ko'on bibi rmell ke dell.
13Nullno llra' welall ko'o rwe',
nullno llra' gun rmell we ko'on,
na bill wayako.
14Yoyte xtuw ka' ba gulall ake' rwe',
nullno llakzede rwe'.
Le nadan bena rwe' we, ke to be'nn llwiere rwe',
llebraz wsakzia rwe'
xtole daxhinj zan ka' ba benon,
to nike nbabze dol ko'o ka'.
15¿Bixhchen llawzo xhia dan llzakzion cha'?
Dan lleyllra'on bitbi rmell ke dell.
Xtol damar ko'o ka'
na daxhinj zan ko'o ka',
kelen'na ba benla rwe' ka'.
16Axha yoyte nu cheb rwe', lekse ka' wzoa da cheb le ake',
na yoyte be'nn ka' llwiere rwen wchach ake' le ake' yell,
guna ke wlan ake' da de ke be'nn ka' ba blan da ka' de ko'on,
na koan ake' be'nn ka' llban rwen.
17Wazoa rwe' wen,
guna rmell we ko'o ka',
lakse cha llebraz ne'e be'nn ka' llwiere rwen:
Yell xhen ke Sión'na ba nzanlallen,
nullno llra' welall kelen.
Nada' Xanle bakse bnia ka'.
18Xanllon nee:
Wacha kan llak ke latj yell-liw ke Jacoben,
wayachralla latj yell-liw ke'en,
yell xhen ka' wayakcha'on gan bayinj aken'na,
na yo'rao ka' wazu aksen gan naksen xlatjen.
19Na le aken gul ake' da we ake' yel lluxken,
to xill ake' kanaken cha ake' nbarazen.
Bi wayiach ake', le nada' guna nench'na wayian ake'.
Bi gun ake' le ake' kaze, le nada' gunxhena le ake'.
20Wayak lay be'nn Israel ka' kan nak akse batna,
wazella yell ke aken kone nada',
na wsakzia be'nn ka' llwiere le aken.
21-22Na radj ake' na lloj to be'nn wnebia le ake':
to be'nn wnebia lloj gan sjalla aken.
Guna ke wadbiy ake' kwitan,
na, ¿noxha wayaxhje wadse kwitan?
Le ake' gak ake' be'nn yell kia, na nada' gaka Dios ke ake'.
Nada' Xanle bakse bnia ka'.
23Yel llruk ke Xanllon naken ke yejw be zban,
ke to be zban kwis
da lltane' be'nn wednay ka'.
24Yel llruk ke Xanllon bi lljachien
xte akte kan llenle'en.
Wllin lla ket re'
chejnie re' ke da ki.
Currently Selected:
Jeremías 30: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios