Jeremías 29
29
Jeremíazen bdixjwere be'nn ka' bchach ake' raw yellen
1-2Ke bayull balloj be'nn wnebia nzi Jeconíazen raw yell gan bche ake' le'en, kone xne'en, na be'nn ka' llun llin lo yo' ra'on, be'nn ka' llnebia Judán na Jerusalén'na, na be'nn ka' llab yer, na be'nn wallekw ka', na be'nnen llayixjwe xtill Xanllon nzi Jeremíazen bsele'e Jerusalén'na to yich ga llwen di'll raw be'nn gur ka' be'nn ka' bagan' bchach ake' raw yellen, na bxus ka', na be'nn ka' llayixjwe di'll, na be'nn ka' bache Nabucodonosor'na Babilonian, raw yell Jerusalén'na. 3Na yich gan nyoj di'll ka' bsel ake' kone Elasá, xhi'nn Safán, na rente Guemarías xhi'nn Hilquías, na Sedequías be'nnen llnebia Judán bsele'e be'nn ki gan nzi Babilonian, nench'na llajse ake' raw Nabucodonosor'na. Na ki llwe yichen di'll:
4Ki ne Xanllon nap doxhente yelwaken, Dios ke Israelen, ke yoyte be'nn ka' bchach ake' Jerusalén'na, na bche ake' le ake' Babilonian. 5Legunchaw yo', na le su rawen, le gaz yay xhixh ake', na le gaw dan kwia rawen. 6Lewchuyna, na cha xhi'nnre bi biew, na bi nor ake', na le we xhor akbe, na xhiew akbe nench'na cha xhi'nn akbe, na le gak be'nn zan, na bi wayachre. 7Legun llin nench'na gak wen ke gan ba jagunren, na le wnab nench'na gak layen, le cha ba llak wen ke yell xhen'na, ka gakse wen ke re'. 8Nada' Xanle napa doxhente yelwak, Dios ke Israelen llzenla re' ki: Bi were latj siye ake' re', be'nn ka' llayixjwe di'llen, na be'nn wane'ya ka' sjallarenlen, bi chajlere cha bi yeren ba bne'e akren. 9Le ziye akzen kanaken llne'e ake' raw razan. Nada' bine' wsel ake', Nada' Xanle, bakse bnia ka'.
10Xanllon nee: Keten ba bdil wyon chi iz ke naken ba zure Babilonian, nada' wadrana' re', na walarawa ke dan ba bchaba raw ren, nench'na wayedre latj ni. 11Nada' nezra ke xbaben ba nuna keren, xbab da gak dawen ke re', kere da gak damar ke re', nench'na gak dawen ke re' willjwani. Nada' Xanle ba bnia ka'. 12Na kena, re' walwillre nada', na werenle nada' di'll, na nada' wzenaya ke re'. 13Wayirjre nada', na walleltere nada', le wayirjre nada' doyichj dorallre. 14Awa, nada' guna' latj wallelere nada', na guna nench'na wacha kan llak keren: Yebaj'ga re' yoyte latj yell-liw ka' beslasa ren, na watupa re' nench'na wadzure latj gan bchacha ren. Nada' Xanle bakse bnia ka'.
15Re' nere: Xanllon ba bene'e lliw be'nn zan be'nn llayixjwe di'll Babilonia ni. 16Xanllo nee ke be'nnen llia gan bnebia Daviden, na be'nn ka' sjalla latj yell xhen ni, bich loelljre ka' bi bllach kan bchach ake' re' yellen. 17Nada' Xanle nap doxhente yelwak, llepa re': wsela da gakdilren re', guna re' win da yej da gawre, na wsela yillwe ke re'. Guna ke yega'n re' ke higos ka' banull, dan nutno llak llaw len. 18Nawlloa re' kone wdil, win na yillwe. Guna ke wcheben be'nn ka' sjalla latj yell-liw yubre keten re akre ren, na gakre to da llroe da nak de'e na yel sdo, to da wcheb yoyte latj yell-liw gan ba beslasa ren. 19Le bi bzenayre kia kan bsela be'nn ka' llayixjwe xtillan, le welsen ba bsela le ake', na re' bi wenere wzenayre ke di'llen bnee aken. Nada' Xanle ba bnia ka'. 20Na' le wzenay xtillan, yoyte re' bchacha yell ke Jerusalén'na, na jazoa re' Babilonian.
21Xanllon nap doxhente yelwak, Dios ke Israelen nee ke Ahab xhi'nn Colaías, na Sedequías xhi'nn Maaseías, le be'nn ki da ake' llixhjoe akre di'll da bi bnee Xanllon: Guna ke yexjre raw yelwak ke Nabucodonosor be'nnen llnebia Babilonian, na re're keten gute'e le aken. 22Na keten be'nn ka' bchach ake' Judán, be'nn ka' zu Babilonian ye'en akre gun ake' de'e kon to be'nn, na ne' ake': Xanllon gune ko'o kan ba benee kone Ahab rente Sedequíazen, be'nn ka' bzey be'nnen llnebia Babilonian. 23Le be'nn ki ben ake' dazerawze damar gan nzi Israelen: bdaren ake' nor ke be'nn loellj ake' ka', na bnee ake' di'll wxhiye da bi gulla le ake' ne'e ake'. Nada' nesran kwasru. Nada' Xanle bakse bnia ka'.
Di'll da bsele'e ke Semaías
24Xanllon gulle'e Jeremíazen ye'e Semaías be'nnen gurj gan nzi Nehelam: 25Xanllon nap doxhente yelwaken, Dios ke Israelen, nee: Kwinkso bzojo to ga llwen di'll gan llew be'nn yell ka' sjalla Jerusalén'na, na bxus Sofoníazen xhi'nn Maaseías, na yoyte bxus ka' yela. Na gana' llew Sofoníazen: 26Xanllon ba bzoe'e rwe' ke to bxus rawraz Joiadá, nench'na gak rallnao yodao xhen'na. Chetkarize ba dlloj to be'nn bi zu lo yichje wen, na surawe'e wne' ke to be'nn llayixjwe di'll, rwe' lljalowe lo rill ya, na wchajtewe gden. 27¿Na na' bixhchen bine' goxo Jeremíazen be'nnen za gan nzi Anatot, le be'nn ni ba llne'e re' ke to be'nn llayixjwe di'll cha'? 28Xte bselte'e Babilonian to ga llwen di'll, na ki ren: Dazan iz chare gan ba badgonren, legunchaw yo' na le su rawen, legaz yay xhixh ake', na gawre daxhixh ka' kwia rawen.
29Bxus Sofoníazen brabe gan llia di'll dan bsel Jeremíazen. 30Natell Xanllon gulle'e be'nnen llayixjwe di'llen: 31Gull be'nn ka' bchach ake' yellen, nada' Xanle nia: Le kanake Semaías be'nnen za gan nzi Nehelam, ba bne'e rawraza, na nada' bine' wsele'e, na ba bxenlalle'e re' sre da nak da wxhiye. 32Nada' Xanle ba bnia nadan wsakzia Semaías na xhi'nn xhasoe ka'. Nutno xhi'nne cha radj yell kian, na nike size'e banez da ka' wa be'nn yell kian, le kone lloa xtillen ba benen nench'na re' llwiere nada'. Nada' Xanle bakse bnia ka'.
Currently Selected:
Jeremías 29: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios