Jeremías 27
27
Jeremíazen bxoe to yuk xkuye'e
1Kan ba guk tap iz kan llnebia Sedequíazen, xhi'nn Josías na, gan nzi Judán, na Xanllon balwille Jeremíazen, 2na gulle'e le'e: Ben to chop yid koyunt, na ye to yuk, na bxoan xkuyo. 3Na le bselte rson ke be'nn wnebia ka' sjalla Edom, Moab, Amón, Tiro na Sidón kone be'nn ka' llde di'llen, be'nn ka' ba bed Jerusalén'na badra'n ake' be'nn wnebian nzi Sedequías. 4Na gull ake' ye ake' xan ake' ka', nada' Xanle napa doxhente yelwaken, Dios ke Israelen nia: 5Kone yelwak kian bena doxhente yell-li'on, na be'nn nach ka', na bayix sjalla doxhente rawen, na wian kon'no llenla. 6Axha na', nada' ba bena latj yell-liw ka' rallna be'nn wen llin kian nzi Nabucodonosor, be'nnen llnebia Babilonian, xte rente bayix ka' bi nmaxhen ba bzoa akaba xnie'en. 7Yoyte be'nn ka sjalla latj yell-liw ka', gun ake' xchine, na ke xhi'nne, na ke xhasoe xte llinte lla' ke latj yell-liw ke'en wnebia zan latj yell-liw xhen gak len, na be'nn wnebia nap yelwak ake'. 8Na cha bal latj yell-liw ka' o cha be'nn wnebia ka' bi yen akre gun ake' kan llene Nabucodonosor'na, nada' wsakzia le ake' kone wdil, na wdia le ake' win, na kone yillwe, xte yoy akte wzenay ake' ke'e. Nada' Xanle bakse bnia ka'.
9Na kanake na', bi wzenayre ke be'nn ka' llayixjwe di'll wxhiye ka' o cha be'nn ka' llayixjwe dan llne'e akre yeren, na be'nn walla ka' llayixjwe da ze gak willjwani, na llkoyel akre nench'na bi wzenay ake' ke be'nnen llnebia Babilonian. 10Yoyte da ka' llixhjoe akren naken di'll wxhiyeze, na dan gunle gan'na kwej ake' re' raw yell keren, na guslas ake' re', na kweyi re'. 11Axha latj yell-liw ka' gun xchin be'nnen llnebia Babilonian, nada' wa latj yega'n ake' raw yell-liw ke aken nench'na su ake' rawen, na gasgan aken. Nada' Xanle bakse bnia ka'.
12Nada' Jeremías, gulla doxhente dani Sedequíazen be'nnen llnebia Judán, na lekse ka' gulltia le'e: Legun kon kan llenle be'nnen llnebia Babilonian, na yell ke'e na, nench'na gat yelnban ke re'. 13¿Bixhchen kweyizo rwe', rente be'nn yell ko'on raw wdilen, yel llbildun, na yillwen? Le Xanllon ba bnee ka gak ke yoyte be'nn ka' bi gun kan llenle be'nnen llnebia Babilonian. 14Bi chajlere ke be'nn ka' llayixjwe di'llen le kanaken llkoyel akre re' nench bi wzenayre ke be'nnen llnebia Babilonian, le di'llen llwe aken naken di'll wxhiyeze. 15Xanllon bakse bnee kere le'en bsele'e le ake', di'll wxhiyezen ne ake' llwe ake' xtill Xanllon. Na kone ka' wasyulle'e guslase re', na re' na be'nn ka' llayixjwe di'llen ba gull re' daki wlleyia re'.
16Na lekse ka balwilla bxus ka', na be'nn yell ka', na gull ake': Kin ba bnee Xanllon, bi wzenayre ke be'nn ka' llayixjwe di'llen, le lle ake' re' ke yechullze wayak rallna re' xchinlas lo yoda'on da ka' sjalla Babilonian. Dan lle ake' ren naken di'll wxhiyeze. 17Bi wzenayre ke ake'. Legun xchin be'nnen llnebia Babilonian, nench'na gat yelnban ke re', ¿Bixhchen kweyize latj yell xhen ni? 18Cha dali sjanak ake' be'nn llayixjwe di'll dan ba gulla le aken, na wnab akre nada' Xanle napa doxhente yelwaken, bi we ake' latj wasa ake' Babilonian xchinlas lo yoda'on da ka' ba baganen, na da ka' sjalla lo yo' ke be'nnen llnebia Judán, na Jerusalén'na.
19-21Kan be'nn wnebian nzi Nabucodonosor bachie'e Jeconíazen Jerusalén'na, xhi'nn Joaquim be'nnen llnebia Judán, na braje le'e yell ke'en kone be'nn braw ke Judán, na Jerusalén'na, na bi basa ake' wdup ka', na cha de yan nzi bronce dan llull nisen, ni xnie ka', ni yoyte da ka' bagan lo yoda'on. Xanllon nap doxhente yelwaken, nee ke da ka' bagan lo yoda'on, na lo yo'rao ke be'nnen llnebia Judán, na Jerusalén'na. 22Wasa aken Babilonian, na gana'ze yega'n aken xte llinte lla ket nada' yenla wasan dayubre latj ni. Nada' Xanle bakse bnia ka'.
Currently Selected:
Jeremías 27: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios