Jeremías 26
26
Bcheb ake' Jeremíazen na llen akre gut ake' le'e
1Kan bzuraw llnebia Joaquim, xhi'nn Josíazen gan nzi Judán, Xanllon balwille Jeremíazen 2na gulle'e le'e: Jase lia yoda'on, na gull be'nn ka' doxhente kan ba gulla rwen, be'nn ka' zak yell xhen ka' sjanbanle Judán, kanaken werao ake' lo yodao ke Xanllon. Bdixjwe yoyte di'll ka' ba gulla rwen, ni tichen bi wdeo kaze. 3Narachk cha wzenay ake' kan ye akoen, na wsan ake' bill naw aklle nez xhinj ke aken, na nada' bill wsakzia le ake' yel kan llun ke aken, kan ba bena xbaben. 4Gull ake' nada' Xanle nia: Cha bi wzenay ake' kia, na bi walaraw ake' ke di'll ka' ba bzenla le aken, 5na bi llun ake' kwent ke di'llen ba be be'nn ka' llayixjwe xtillan le aken, le welsen ba bsela le ake', na re' bikse llzenayre, 6kelen'na guna lo yodao ni kan bena kone Siló. Guna de'e yell xhen ni, nench'na re're yoyte be'nn ka' sjalla latj yell-liw yubre len. 7Na bxus ka', na be'nn ka' llayixjwe di'llen, na be'nn yell ben akre ke di'll ka' bnee Jeremíazen lo yoda'on. 8Na ke bayull bdixjwere kan ba gull Diozen le'en, bxus ka', be'nn ka' llayixjwe di'llen, na be'nn yell ka' bex ake' le'e na gull ake' le'e: Na' kweyiw. 9¿Akre llunzo llayaxhjro llnew loraz Xanllon, na new yodao ni waganen kan nak ke Siló, na yell xhen ni kweyin, na nullno be'nn cha rawen? Na yoyte be'nn yell ka' badup ake' lo yoda'on, na biechj ake' Jeremíazen.
10Na ke benee be'nn ka' llnebia Judán kan llaken, na bllach ake' lo yo'rao ke be'nnen llnebian, na zaj ake' llwa reijen nzi da kub, na ke bllin ake' gana' le blle akte. 11Natell bxus ka', na be'nn ka' llayixjwe di'llen gull ake' be'nn ka' llnebian, na rente be'nn yell ka': Be'nn nach ni llayal kweyie'e le ba bne'e gak damar ke yell xhen'ni. Re' bakse benlere ke di'llen llwen.
12Jeremíazen gulle'e be'nn braw ka', na be'nn yell ka', na gulle'e le ake': Xanllo naksen bsele'e nada' nench'na chixjoera rawraze'e, na ba bnee kan gak ke lo yoda'on, na kan gak ke yell xhen ni doxhente dan bakse benere kone yell nayre ka'. 13Le wacha kan zu bexhren, na yel kan llun keren, le wzenay ke Xanllo Diozen, na le'e bill wsele'e da nxhull ka' ba bdixjweran. 14Na kanake nada', bakse yoa rawnaren le gune nada' konke llazrallre. 15Axha le neze dani: cha re' gutre nada', Re', na be'nn ka' sjalla raw yell ni naken dol ke re' cha ba blleyire to be'nn bi'bi dol nape'e, le daliyan Xanllon ba bsele'e nada' chixjoera re' ke di'll ki.
16Natell be'nn braw ka', na be'nn yell ka' gull ake' bxus ka', na be'nn ka' llayixjwe di'llen: Bitbi dol nap be'nn ni, na wlleyirislloe, le ba bne'e rawraz Xanllon Diozen.
17Bal be'nn gur ka' bzulla ake', na gull ake' be'nn yell ka' ba badup gana': 18Kan batna kan llnebia Ezequíazen gan nzi Judá, be'nnen nzi Miqueas gurj latjen nzi Moréset bne'e rawraz Xanllon, na gulle'e be'nn ka' sjalla raw yell ke Judán:
Xanllon nap doxhente yelwaken ba bnee:
Sión'na wayaken ke to yu lix ga gaz gan ake',
na Jerusalén'na wayaken bichteze
na raw rum ke yoda'on wagan yixe.
19¿Ezequías be'nnen bnebia, na yoyte be'nn yell ke Judán bet ake' Miqueazen cha'? Ka, bi guk ka': be'nn wnebian bllebe'e Xanllon, na bnabe'e wayachralle le ake'. Na Xanllon bi benee damar ke ake', ke dan ba bdixjwere le aken. ¿Wxoarizllo to dol kull'llo kanaken gunllo xhia xhen'na cha'?
20Leska Uríazen, xhi'nn Semaías be'nnen gurj yell xhen'na nzi Quiriat-jearim, bne'e loraz Xanllon da maren llwie gune ke yell xhen'na, na latj yell-li'on kan llunkse Jeremías ni. 21Be'nn wnebian nzi Joaquim, na rente be'nn ka' llnebiarenen ben akre kan ba gulle'e le aken, na' be'nn wnebian gukralle'e gute'e le'e. Axha ke benee Uríazen ka', bllebe'e na bxhonje jasute'e Egipto. 22Be'nn wnebian nzi Joaquim bsele'e be'nnen nzi Elnatán, xhi'nn Acbor, na ye to chop be'nn, 23na be'nn ki jaxhi ake' Uríazen Egipton, na jayen ake' le rallna be'nn wnebian nzi Joaquim, na be'nn ni blleyie'e le'e, na gulle'e be'nn ke'e ka' jazal ake' le'e gan lljachon ake' be'nn wat ka'.
24Be'nnen nzi Ahicam, xhi'nn Safán, gukrene Jeremíazen, na kone ka' bill guke'e rallna be'nn yellen, na bill bet ake' le'e.
Currently Selected:
Jeremías 26: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios