Jeremías 25
25
Rale zak be'nn ka' llwiere le aken
1Raw wdape iz kan llnebia Joaquim, xhi'nn Josíazen gan nzi Judá, Xanllon bne'e Jeremíazen, na bdixjwere le'e kan gak ke yell ke Judán. Iz nellnan llnebia Nabucodonosor'na Babilonian. 2Na be'nnen llayixjwe xtill Diozen nzi Jeremías, bdixjwere yoyte be'nn ka' sjalla yell ke Judán, na be'nn ka' sjalla Jerusalén'na. Na bnee: 3Ba guk chonalloa iz llixjwera xtill Diozen, na ke guk chi'nne iz kan llnebia Josías xhi'nn Amón'na gan nzi Judán. Nada' welse ba bdixjwera re', na bikse ne' chajlere kia. 4Na welse ba bsel Xanllon be'nn ka' llixhjoe xtillen kone re', na re' bine gunle bare, na bi llenere wzenayre. 5Le ake' ba gull ake' re': Lewsanlall daxhinj ka' nawre llunren, na kone ka' gak sure latj yell-liw ke Xanllon gan ba bene'e ren, na xustawre ka'. 6Bi nawre dios yub akre, na bi weraore le ake', bi wlukre Xanllon, na weraorizre dios da benle kone tak re' ka', na le'e bi wsele'e da wsakzi re'. 7Na na' Xanllon nee: Re' bikse llzenayre kia, na llweraore dios ka' ba benle kone nia'nare ka', na dani wayaken to damar ke re'.
8Kelen'na ne Xanllon nap doxhente yelwaken: Ke nake re' bine' yene're wzenayre da ka' ba bdixjwera ren, 9na ga'xha yoyte yell ka' sjalla rale, na be'nn wen llin kian nzi Nabucodonosor, be'nnen llnebia Babilonian, nench'na yede'e gakdilrene be'nn ka' sjalla latj yell-liw ni, na yoyte be'nn ka' sjalla rawen, na yoyte be'nn yell wrill ka'. Wlleyia dokenak re' na watach walantia re', na llebraz wcheben re', na si're yelsdo. 10Nada' walana yoyte lni' ka' sjallunlen, na lni' ka' llunle keten llak wachayna, na bill yenere kan llun molin ka' llakia, na wayur yi' ka' llseni lo yo' ka'. 11Doxhente latj yell-li'on yegane'n llerllibze, na to wcheben le ake'. Na be'nnen llnebia Babilonian wnebie'e le ake' wyon chi iz. 12Na keten dil wyon chi izen, wsakzia be'nnen llnebia Babilonian, na rente latj yell-liw gan nbanlen xtol daxhinj ke'e ka', na latj yell-liw ke be'nn caldeos ka' wlleyian ke chnare. Nada' Xanle bakse bnia ka'. 13Na guna ke gak latj yell-liw ni yoyte da ka' ba bdixjweran, na dan ba nyoj le yich ni, yoyte da ka' ba bdixjwe Jeremíazen rawraza kan gak ke yoyte latj yell-liw ka'. 14Na latj yell-liw xhen ake', na be'nn wnebia ka' nap yelwak leska wnebia ake' le ake'. Na kone ka' wsakzia le ake' yel kan llun ke aken.
Sakzi be'nn ka' sjalla latj yell-liw ka'
15Xanllo Dios ke Israelen, gulle'e nada': Bwiakero xbin dan noxan to yullchochjen yel llruk kian. Bexen, na bwejen be'nn ka' sjalla yoyte latj yell-liw gan wsela rwen. 16Na ket yej aken'na suraw ake' wayeb ake', na gun ake' ke be'nn bi zu lo yichj ake' wen, xtol wdilen wsela ke aken.
17Na bxhia xbin dan nox Xanllon lo take'en, na bian wej be'nn ka' sjalla yoyte latj yell-liw, gan bsel Xanllon nada'. 18Na bian wej Jerusalén'na len, rente yell ka' sjanbanle Judán kone be'nn ka' llnebia le aken, nench'na wlleyian, na wachinja dokenak aken, xte ke llan wej aken'na bllinte na' lla nak ake' to da zi lleb'llo, nak ake' sral, na zi ake' yelsdo, na nak akte de'e. 19Na lekse ka' bian wej faraón'na be'nnen llnebia Egipton, na rente be'nn wen llin ke'e ka', na' be'nn ka llnebiarenen, na yoyte be'nn yell ke'e ka', 20na yoyte be'nn zit ka' sjalla raw yellen, na yoyte be'nn wnebia ka' sjalla latj yell-li'on nzi Us, na gan nbanle be'nn filisteos ka': Ascalón, Gaza, Ecrón, na ye to chop be'nn ka' bagan gan nzi Asdod, 21Edom, Moab na Amón, 22na yoyte be'nn ka' llnebia Tiro, na Sidón, na yoyte be'nn wnebia ka' sjalla latjen nzi nistao Mediterráneo, 23na gan sjalla to kwen wej be'nn ka' gan nzi: Dedán, Temá, Buz, na be'nn yell ka' llun yidze yichj aken, 24na yoyte be'nn ka' llnebia Arabia, na yoyte be'nn wnebia ka' sjalla latj dach yu billen, 25na yoyte be'nn wnebia zajzu gan nzi Zimrí, Elam, na Media: 26na yoyte be'nn ka' llnebia latj yell-liw ka' sjalla rale, be'nn zajzu gawchochze, na be'nn zajzu zit, ke walle nello doxhenkse yell-li'on, na wayollna be'nnen llnebia Babilonian yeje'en.
27Na bayullna gull Xanllon nada': Gullgall ake' nada', Xanllon nap doxhente yelwaken, Dios ke Israelen, llchiera re' yejre, xte sulltere, na wayeb re', na yalre raw yu nench'na bill wayasre chras, xtol wdilen wsela keren. 28Na cha biyen akre yej ake' dan yull lo xbin dan noxon, gull ake': Xanllon nap doxhente yelwaken ba bnee: Dekse de yejren. 29Na' surawa wsela yel llsakzia kian raw yell xhen'na lloeraw ake' nadan. ¿Na llakere ke bi wsakzia ren? Bi tegunen kaze, le wsela da gakdilren yoyte be'nn sjalla latj yell-li'on. Nada' Xanle nap doxhente yelwaken, bakse bnia ka'.
30Rwe', Jeremías, bdixjwe rawraza yoyte daki. Gull ake':
Xanllon llusieꞌe kan llun yi' bzi'on gan nak
chkwia ralte, latj xhirall gan zoe'en.
Kone be'nn yell ke'en
llusie'e kan llun be'nn ka' llrajchekw uvas ka',
na kone be'nn ka' sjalla raw yell-li'on.
31Na dan llne'e zilljen llintekazen gazerawze de yell-liw,
le Xanllon gakdilrene be'nn ka' sjalla latj yell-li'on,
na gunee yel korchis ke be'nn nach ka',
na wlleyie'e be'nn wednay ka'.
Kan ba bakse bnee Xanllon.
32Xanllon nap doxhente yelwaken nee:
Da maren llinen
toaj toaj latj yell-liw gan sjalla be'nn ka',
to nxhullraz nak to bdon da ba llas
gan bayull yell-li'on.
33Yoyte be'nn ka' wlleyi Xanllon ke lla' na,
nitinj ake' gan zuraw, na gan bayull yell-li'on.
Nutno koell ke ake',
nutno walis be'nn wat ka' nench'na llajkoach ake' le ake',
llirj ake' raw yun ke xche bayix ake'.
34Le gusia dan lleyllraren yoyte re' gup xhir ake'.
Re' llgore nez xhir ka', le bixhtul raw yun.
Le ba bllin lla ke yel guten
na re' gut ake' re' ke llut ake' xhir yay xhen ake'.
35Be'nn gup xhir ka' bi gak wxhonjdo ake',
be'nn ka' llgo nez xhir ka' bi gak wara ake'.
36Be'nn gup xhir ka' llusia ake',
llusia be'nn ka' llgo nez xhir ka' dan lleyllra aken,
le Xanllon ba blleyie'e yix ka'.
37Xanllon guklle, na blleyie'e yu lix ka'.
38Bllojeꞌe ke to bell yix ba yo' lo rill,
na latj yell-liw gan zu aken baganen llerllibze,
le gulnin yel llruk ke Xanllon
na bsele'e to da nak nxhullraz da gukdilren le ake'.
Currently Selected:
Jeremías 25: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
