Jeremías 23
23
Da ze llbexh ake' gak do willjwani
1Xanllon ba bnee: Niachraz naken ke be'nn ka' llgo xneze raw yell kian, na llwe ake' latj llaslas ake', na llnit ake'.
2Xanllon nak Dios ke Israelen lle'e be'nn ka' llnebia yell ke'en: Re' ba beslasre xhi'nna ka', na ba bxhonj ake', na bi bdapre le ake'. Axha na' nada' wia akre ke guna ke re' nench'na wsakzia re' ke daxhinj ke re' ka'. Nada' Xanle bakse bnia ka'. 3Nadksa kwina wadsana xhi'nna ka' bagan yetxhonjen, latj yell-liw gan beslasa le aken, watupa le ake' nench'na lljazoa le ake' dayubre latj yell-liw ke aken, nench'na cha bizan xhi'nn ake'. 4Nada' wzoa be'nn wnebia gape'e le ake', nench'na nutno wcheb le ake', na ni tich ake' bi nit, Nada' Xanle bakse bnia ka'.
5Xanllon ba bnee:
To lla guna
nench'na Daviden su to xhasoe bi gak dogarje,
to be'nn wnebie'e kone yel sin
na gunee yel korchis dalixhej raw latj yell-li'on.
6Doxhente lla ka' wnebien, Judán yeran,
na lekse ka' Israelen bi sun da nxhull.
Na ki wsi aken:
Xanllon nake yel wasra kello.
7Na Xanllon ba bnee: Za lla ka' bill ne' ake': Dali raw Dios le'en babaje'e yell Israelen Egipton, 8Na suraw ake' ne' ake': Dali raw Diozen babaje'e xhi'nn xhasoa Israelen, latj yell-liw dan lli rale, na latj yell-liw yub akre gan beslase le aken. Na su ake' raw yell-liw ke ake' nakse.
Di'll da llwen ke be'nn ka' llayixjwe
9Gani' llwen di'll ke be'nn ka' llayixjwe di'llen:
To zu'ze llak kaza,
to doxhentia xhistit,
llunteksa ke be'nn we zure,
ke to be'nn ba nej daxhen zu ke uva,
xtol Xanllo nan,
na rente lloa xtille xhirallen.
10Doxhente yell-li'on ba zjallan, be'nn daren ake' be'nn bi nchoynaren ake',
yoyte be'nn ka' ba zajze ake' gan ze damaren,
na kone dan llnebia aken bi llun ake' yel korchis da nak dalixhej.
Kelen'na Xanllon benee de'e yell-li'on,
na yell-li'on ba bayechen,
na yix ka' de latj dach yu billen ba byey aken.
11Xanllon bakse bnee:
Rente kaze be'nn ka' llayixjwe di'llen, na bxus ka sjanak ake' be'nn wednay,
na lo yodao kia naksen ba brera le aken llun ake' damar.
12Kelen'na xnez aken
gaken sllchochj, na xchul,
nada' guna nench'na wlliy ake' le ake' nechj na llajyal ake'.
Keten wazi ake' kwenten,
guna ke gak damar ke ake'.
Nada' Xanle bakse bnia ka'.
13Nada' ba brera be'nn ka' llayixjwe di'llen sjalla Samarian
llun ake' da bi llzoa nada' wen:
Ba llne'e ake' raw raz Baal
na ba bro ake' be'nn yell kia ka' raw nez xhinj.
14Nada' ba brera be'nn ka' llayixjwe di'llen sjalla Jerusalén'na
llun ake' dazeraw nak daxhinj,
nzoa xtu ake', na llkoaj ake' be'nn ka' mell,
na llpe akre be'nn wednay ka'
nench'na bi wabiy ake' raw damaren.
Le ake', na rente be'nn ka' sjalla yell xhen'na,
nak ake' kia nada' ka be'nn Sodoma ka', na rente Gomorra.
15Kelen'na nada' Xanle nap doxhente yelwaken,
llnia ke be'nn ka' llayixjwe di'll wxhiyen:
Wa da gaw ake' da nak sla kwis,
we ake' nis da yej ake' na wlleyin le ake',
le kone be'nn ka' llayixjwe di'llen sjalla Jerusalén'na
ba bllirj damaren raw doxhente latj yell-li'on.
16Xanllon nap doxhente yelwaken nee:
Be'nn Israel ake', bi wzenayre
ke di'llen lloe be'nn ka' llayixjwe di'llen.
Le sre di'll wxhiyezen llwe ake',
da llayirjlall toraz akzen,
kere di'll da be aken.
17Na be'nn ka' bi llazrall xtillan
lle ake' le ake': Bi welallre.
Na be'nn ka' naw llun
kan ne' raxhdao ake' xhinjen,
na lle ake' le ake': Bitbi damar gak ke re'.
Jeremíazen bnee
18Axha ¿nuxha ba jase kwit Xanllon cha'?
¿Nuxha ba bre, na ba benle xtillen?
¿Nuxha ba bzenay ke le'e cha'?
19Yel llaklla ke Xanllon naken ke to yejw be zban,
ke to be bdon
da lltane' be'nn wednay ka'.
20Yel llaklla ke Xanllon bi lljachien
xte llinte lla keten gak kan ba benee xbaben.
Za lla ka' ket re' wayonle xbab
na chajniere ke da ki.
Di'll da be Xanllon kan gak ke be'nn ka' llayixjwe di'll wxhiyen.
21Nada' bi bsela be'nn ka' llayixjwe di'llen,
na nike be'ren akze di'll,
axha le aken bllojdo ake'
na bne'e ake' rawraza.
22Chenak le aken bze ake' kwitan,
na bdixjwe ake' lloa xtillan raw be'nn yell kian,
na ben ake' nench'na babiy ake' raw nez xhinjen,
na wsanlall ake' damar ka' naw ake' llun aken.
23Xanllon bnee:
Nada' naka Dios, na zia zit, na zetia gawchoch.
24¿Nuxha gak koachre nada'?
Nadan llaslla yeban, na rente yell-li'on.
Nada' Xanle bakse bnia ka'.
25Ba benla di'll wxhiye ka' llwe be'nn ka' llayixjwe di'llen, na llen akre wne' ake' rawraza, na da ake' ne ake' ki ba bnera yere. 26¿Batxha zerawkse wsan be'nn ka' llayixjwe di'll wenlall ke ake' ka', na bill ta ake' we ake' di'll wxhiye ke ake' ka' cha'? 27Kone di'll wxhiye ke ake' kan, llen akre nench be'nn yell kia ka' galall ake' nada', kan benkse xustaw ake' ka' gulall ake' nada', na beraw ake' loe lsaken nzi Baal. 28-29Cha be'nnen llayixjwe di'll wxhiyen ne're yere, na ne'e yerzen ba bnere, axha cha ba bdixjwere xtillan na chixjoeksren kan naken'na, le bi gak wsakrebllo trigon rente yixhen. Le lloa xtillan naken ke yi', ke to martiy da llxhoxjtin yaj war. Nada' Xanle bakse bnia ka'.
30Kelen'na bi zurena wen be'nn ka' llayixjwe di'llen, le llban loellj ake' xtilla ka'. Nada' Xanle bakse bnia ka'. 31Gani' llnia nadan ba bayechja be'nn ka' llayixjwe di'llen, le da ake' ne ake' nadan ba gulla le ake' chixjoe akre xtillan, le da ba bayirjlall toraz akzen. 32Nada' ba bayechja be'nn ka' llayixjwe di'llen, le dan llne'e aken naken yer da wxhiyeze, na kone ka' be'nn yell kian llun ake' daxhinj. Nada' bine wsel ake', na nike ne' yep akze bi gun ake', na bitbi gukre llun ake' ke yellen. Nada' Xanle bakse bnia ka'.
Akre ke nello ke di'll ka' ba bsel Xanllon
33Jeremías, cha to be'nn ka' zajzu raw yellen o cha to be'nnen llayixjwe di'llen o cha to bxus wnab akre rwe': ¿Bixhan ba gull Xanllon rwe' guno cha'? Na gull ake': Xanllon ba bnee wsanlalle re'. 34Na cha to be'nnen llayixjwe di'llen o cha to bxus o cha kon to be'nn raw yellen ne'rize, ke di'll nin ba bnee Xanllon, nada' wsakzia le'e rente be'nn ka sjallarene lo yo' rillen. 35Keten wnab akre be'nnen nllie akren o cha kon to bich loellje ake' ka', na gak ne' ake': ¿Bixhan ba bnee Xanllon cha'? ¿Bin bnee cha'? 36Axha bill nellre di'll ni, kin ba bnee Xanllon, le cha nu'rize ba bnee ka', guna di'll ki wayaken to yoa ke ake'. Re' ba bchukre xtill Dios ban'na, Diozen nap doxhente yelwaken.
37Jeremíazen bnabre be'nn ka' llayixjwe di'llen: ¿Bixhan ba bnee Xanllon cha'? ¿Bin bnee cha'? 38Na cha ba bnee ake', Kin ba bnee Xanllon, na walliw xtill aken: Xanllon ba bnee: Re' nerawre llnere ke di'llen ba bllunan, 39nada' galalla re' chras, na walliya re' kale, lekse ka' wsanlalla yellen bena' ren, na dan bia xustawre ka'. 40Na ke chnare wtitj akre re', na sire yelsdo, aken to da bi galall re'.
Currently Selected:
Jeremías 23: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios