Jeremías 22
22
Di'll da llwen kan gak ke be'nn ka' llnebia Judán
1Xanllon gulle'e nada': Betj lo yo'rao braon, na bdixjwe ke di'll ni 2raw be'nnen llnebia Judán, be'nnen lli gan blle Daviden kan bnebie'en, na raw be'nn ka' llnebiarenen, na raw be'nn ka' sjalla latj yell xhen'na: Lewzenay xtill Xanllo. 3Legun yel korchis da zajze lixhej, le wasra be'nn ka' llsakzi ake' raw be'nn ka' llune le ake' ka', bi gune're be'nn zit ka' kaze, na bi wsakzire le ake', be'nn ka' bill zu xa' xna, na nor wazeb ka'. Bi wlleyire be'nn zit ka' latj ni. 4Cha dali ba llunle kan ba gulla ren, zajzelle kwe be'nn wnebia gan blle Daviden kan bnebie'en, na cho ake' lo karret ka' nsa kabay ka' llin akte lloa reij ka' zajzu lloa yo'raon, na gunte be'nn ka' llnebiarenen le'e txhen, na rente be'nn yell. 5Axha cha bi gunle bare ke di'll ki ba bzenla ren', yo'rao ni wayinjen chet ka'. Nada' Xanle ba bnia ka'.
6Le Xanllon ba bnee kan gak ke yo'rao gan lli be'nnen llnebia Judán:
Rwen nako kia nada' ke to ya' ke Galaad,
ke to rum ke Líbano,
axha kwinksa ba bnia wayuna rwe' to latj dach yu bill
ga bi sjalla be'nn.
7Wsela be'nn waka ya nench'na tilren ake' rwe',
na wlleyi ake' rwe'.
Na wzoy ake' wdup da ka' sjanak nbaraz de yay sedr ko'o ka',
na wde akten yi'.
8Be'nn zak latj yell yub akre, ket te ake' yell xhen ni, na ye loellj ake': ¿Bixhchen benze Xanllon yell xhen ni ki lla? 9Na walli ake' di'llen ne' ake' ki: Le bsanlall ake' di'll dan bchajlla ake' kone Xanllo Diozen, na beraw ake' dios yub akre.
Di'll dan be Jeremíazen ke be'nnen nzi Salum (Joacaz)
10-11Bi koellre ke be'nn wnebian nzi Josías,
bi koellre kanaken ba guten,
wenlle naken cha koellre ke xhi'nne Salum'na,
le be'nn ni chaje'e, na bill wabie'e chras,
bill warellre latj yell-liw gan gurjen.
Na Xanllon ne ke Salum, xhi'nn Josías, be'nnen llnebia Judán, le le'en le blliate bnebie'e kan bayull bnebia xe'en, na blloje'e latj ni, bill wabie'e chras, 12le kweyie'e latj yell-liw gan bche ake' le'en, na bill warellre latj yell-liw ni.
Di'll da llwen ke Joaquim
13Niachraz naken ko'o rwe', ke naken kone damar, na kone yel korchis da binak dalixhej
llunchaw yo'rao ko'on, na yo' xhen ko'o ka',
na llguno be'nn ka' llin
na bi yixh'go le ake'.
14Na rwe' new: Guna to yo'rao xhen kia,
na gunan da ray xhen raw wllope kwian.
Na wzoatian reij be,
na le ze ka' yeyasjten yay sedr
na wabenten da xna.
15¿Llakro cha dan ba nechjo bray sedr kazen
banakteo to be'nn wnebia cha'?
Xa'on bxhie'e banez raw yelnban ke'en,
le le'en benee yel korchis dalixhej,
na kelen'na guk wen ke'e.
16Le'e benee yel korchis dalixhej ke be'nn yiach ka', na be'nn ka' llalleyraw,
na' kelen'na guk wen ke'e.
Daran ne' nombiere nada'.
Nada' Xanle bakse bnia ka'.
17Axha rwe' llize'e yichjo
akre gak guno gan mellen,
dlleyiw be'nnen bibi dol napen
na llsakziw, na ziw niana be'nn yell ko'on.
18Na Xanllon ba bnee ke Joaquim na, xhi'nn Josías, be'nnen llnebia Judán.
Nutno koell keten kweyie'en.
Nutno be'nn koellrize, na ne'e:
Niachraz ko'o rwe' bicha. Niachraz ko'o rwe' za'na.
Niachraz ko'o rwe' be'nn wnebia, Niachraz ko'o rwe' be'nn braw.
19Wkoach ake' le'e ke to burr,
koellewxexj ake' le'e, na lljazal akte le'e
llwa yell Jerusalén'na.
Di'll da llwen ke Jerusalén'na
20Judá, biep le ya' Líbanon, na besia.
Blis chi'on raw ya' ka' sjanbanle Basán na.
Besia raw rum ka' sjanbanle Abarim na,
le yoyte xtuw ka' ba blleyi ake'.
21Nada' berena rwe' di'll kan ne' llak wen ko'o,
axha bi wenlo wzenayo kia.
Kan benkso ke ne' naktew bi weo,
bi ne' yenlo wzenayo kia.
22Ben wachachen yoyte be'nn ka' sjanak xano ka',
na xtuw ka' wchach ake' le ake' yellen.
Gak yelsdo ko'o rwe'
xtol daxhinj ko'o ka'.
23Na na' rwe' zuw nbaraz lo yo' rillon,
nechjo bray de sedr ake' da za gan nzi Líbano,
axha walleyra'o keten baza dan wsakzi rwen,
walleyra'o ke to nor le sute xhi'nne.
Xtill Dios dan bzenle be'nn wnebian nzi Jeconías
24Xanllon ba gulle'e Jeconíazen, xhi'nn Joaquim na, be'nnen llnebia Judán: Nadksa kwinan ba bnia: Lakse rwe' nako ke to anillo da ngo xbena da llchicha sey kone taka chaoren, na walalla rwe' gana' 25nench'na wayuna rwe' rallna be'nn ka' llwiere rwen, raw be'nn ka' llebraz llcheb rwen. Guna rwe' rallna Nabucodonosor be'nnen llnebia Babilonia na raw be'nn caldeos ka'. 26Na wzala rwe' rente xnaon raw yell-liw ga bi gurjre, na gana' kweyi llopte re'. 27Na le aken bill wabi ake' raw yell-liw dan llebraz serall ake' wabi aken.
Be'nnen llayixjwe lloa xtill Diozen bnee
28¿Nak Jeconíazen ke to ye'n da ba bra', na bill llak gunlen aken llin,
ke to ye'n da nullno llenle cha?
¿Bixhchen ba jazal ake' le'e kone xhi'nne ka'
to yell-liw ga bi numbie akre?
29Yell-liw, yell-liw, yell-liw,
bzenay lloa xtill Xanllon.
30Xanllon nee:
Le wzoj ra be'nnen le yichen
ke to be'nn bi sjalla xhi'nn,
ke to be'nn bi'bi de da benee raw yelnban ke'en.
Le ni tich xhi'nn xhasoe ka'
bi gak llajche ake' gan blle Daviden bnebie'e
nench'na wnebia ake' dayubre gan nzi Judán.
Currently Selected:
Jeremías 22: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
