Jeremías 21
21
Llixjwen da sakzi Jerusalén'na
1-2Be'nn wnebian nzi Sedequías bsele'e be'nnen nzi Pashur, xhi'nn Malquías, na rente bxuzen nzi Sofonías, xhi'nn Maaseías, nench'na lljawia ake' Jeremíazen, na ye ake' le'e: Ben gukre bnab raw Diozen, bixhchen nawlloa be'nnen nzi Nabucodonosor, be'nnen llnebia Babilonian neto'. Narachk cha Diozen yenle'e, na gunee to yelwak ke'e ka', na le wchiere Nabucodonosor nench wabiye kale.
Natell Xanllon bne'e Jeremíazen, 3na ki ballie'e xtill be'nn ka' bsel Sedequíazen: Le ye Sedequíazen 4ki ne Xanllon, Dios ke Israelen: Nada' guna ke wabi be'nn waka ya ko'o ka', be'nn ka' dilren be'nnen llnebia Babilonian, na kone be'nn caldeos ka', be'nn ka' sjanechj to kull ze ka' nkoej rwen, na guna nench wadup ake' radj yell xhen'na. 5Kwinksa tilrena re', na gunan kone yelwak, na kone yel llruk, na kone yel llaklla kian. 6Guta' yoyte be'nn ka' sjalla latj yell xhen ni, ke be'nn nach, na ke bayix ake' kone yillwe war. 7Natell guna ke be'nnen llnebia Judán nzi Sedequíazen, na rente be'nn ka' llnebiarenen, na rente waka ya ke'e ka', be'nn ka' bagan kone yelnban kan ba bde yillwen, na wdilen, na yel llbildun. Kwinksa guna le ake' rallna Nabucodonosor'na rente be'nn ka' llwiere le aken nench'na gut ake' le kone spad, na bi wayachrall ake' le ake'. Nada' Xanle ba bnia ka'.
8Na lekse ka' bdixjwere be'nn yell ka', nadan Xanle nia: Guna' latj nench'na kwere nure'n nezen nawre, nezen nsa yelnban o cha nezen nsa yelgut. 9Nuteze be'nn yega'n latj yell xhen ni, kweyie'e raw wdilen o cha tie'e win, o cha kweyie'e kone yillwe. Axha be'nnen wallojen, na lljayien kwine rallna be'nn caldeos ka' sjalla raw wdilen, na bi kweyie'e, na wasra yelnban ke'en. 10Le nada' ba bachuyralla wsana damaren, loraz dawen'na raw yell xhen ni. Wayunan rallna be'nnen llnebia Babilonian, na le'e wdien yi'. Nada' Xanle ba bnia ka'.
Gani' llixjwen gakren gak ke be'nnen llnebia Judán
11-12Be'nn ka' sjanak xhi'nn xhasoa be'nn wnebian nzi David sjalla Judá, gullgall ake' nada' ki:
Bzenay xtill Xanllon:
Yeo lla ben yel korchis,
basra be'nn ka' llxhakzin raw be'nn ka' llsakzi le aken,
cha ne' nawllo lluno damar ka',
yel llaklla kian galninen ke to yi'
na galninen na nutno gak wasur len.
Gani' llixjwen dan walleyraw Jerusalén'na
13Re' be'nn sjalla Jerusalén llnebiare gan nak rachen,
na nakre ke to yaj da lli rachen,
nada' Xanle gakdilrena re'.
Re' lle loelljre: ¿Nuxha wayaxhje gakdilren lliw cha'?
¿Nuxha gakrize wadse gan sjallallo ni?
14Nada' wsakzia re' ke llayal yel kan llun kere na,
wdia yi' ya' yeo kere ka',
na yi'n wzeyen doxhente do yichjrawe.
Nada' Xanle ba bnia ka'.
Currently Selected:
Jeremías 21: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios