Jeremías 18
18
Be'nnen llunchaw benjen
1Xanllon bayechje'e llwie nada', na gulle'e nada': 2Betj, na biaj lo yo' rill be'nnen llunchaw benjen, na gana' guna' rwe' di'llen dan chixhjoeron. 3Nada' Jeremías, betja, na jadira be'nnen llunchaw benjen kone dan llechjen. 4Na keten bi lloj wen dan llunchawen, na llayune yeton kone benj nakse, xte lleganten kan llenle na.
5Natell Xanllon gulle'e nada': 6¿Bi gak guna ka' kone re', be'nn Israel ake', kan llun be'nn wenchaw benjen? Reksren nakre lo takan ke benjen yo' lo tak be'nnen llunchaw benjen. Nada' Xanle ba bnia ka'. 7Na chenak nada' llenla, wak wcheba to setegaze to latj yell-liw ga sjalla be'nn zan, o cha gan lli be'nnen llnebian, na chixjoe akre nadan llenla wlleyia dokenak ake'. 8Axha cha latj yell-liw gan sjalla be'nn ka' wabiy ake' raw damaren, natell nada' bi wsela dan wsakzi le aken dan ba nuna xniden. 9Na do willjwani, nada' cha llenla gunchawa, na waslliwa to latj yell-liw ga sjalla be'nn zan, o cha gan lli to be'nn wnebia. 10Axha cha latj yell-liw gan sjalla be'nn zan, na llun ake' damar, na bi llzoa ake' di'll dan ba bzen akren, nada' bill wsela yel gukre ke ake' dan ba nuna xniden.
11Na na', gull be'nn ka' sjalla Judán, na be'nn ka' sjalla Jerusalén'na, nada' Xanle ba lluna xbab wsakzia re'. Le wsanlall nez xhinj kere ka', na legun sre dawen. 12Na le aken ye ake' rwe': Bill gunbeyro neto'. Neto' llazrallto zuto kan zuksto ni, na nawsto gunto kon kan ne' raxhdaoto xhinjen.
13Na' kelen'na ne Xanllon:
Le wnabe be'nn ka' sjalla latj yell-liw yubre,
cha ba ben akre ke di'll ki.
Yell ke Israelen
ba ben ake' to daxhinj xhen.
14¿Ba bzu ke baran beyen
raw ya' sib de yaj ka' zajzu gan nzi Líbano cha'?
¿Wayechrize nisen
lletj le ya' ka' cha'?
15Axha be'nn yell kian ba gulalle nada',
na llia ake' yar raw dios ka' bayirjlall aken.
Ba bnit ake' nezen,
nez guren,
na naw ake' nez da bi numbie akre.
16Na kone ka' latj yell-liw ke aken ba baganen to latj dach yu bill,
na dani naken to da wabanello.
Na yoyte be'nn ka' te rawen
to yeban akre, na wta yichj aken.
17Nada' gaka ke le ake' ke to be da za gan lloj willen, nench'na guzlasa be'nn Israel ka',
na wxhonjdo ake' raw be'nn ka' llwiere le aken.
Nada' bi gakrena le ake'
keten llin lla sakzi aken.
Llun ake' xbab xhinj ke be'nnen llayixjwe di'llen
18Na be'nn ka' bnee ake': Gunchkllo xbab akre ke gunllo nench'na walliyllo Jeremíazen kale. Le be'nn zan bxus, na be'nn sin, na be'nn llayixjwe xtill Dios ba napllo. Wxoallo dol kulle'e nench'na gut ake' le'e. Bi gunllo bare ke di'llen yixjweren.
Jeremíazen berenee Xanllon Di'll
19Xana, bzenaychga xtillan.
Bzenay ke di'llen llwe be'nn ka' llwiere nadan.
20¿Na wayull gunllo to dawen'na, na wayullna wyie akre lliw cha'?
Le aken ba bche'n ake' to ga lljalo ake' nada'.
Jadinlall kan berena rwe' di'llen
na gulla rwe' gakreno le ake',
na yekao yel llaklla ko'on kone le ake'.
21Axha na' llnaba, guto xhi'nn ake' ka'
yel llbil dunze, na kone spad,
na yeyate xhi'nn ake' ka' kweyi akbe, na xhor ake' ka' yega'n ake' nor wazeb.
Na yillwen guten be'nn biew ka',
na biweo ke ake' ka' kweyi akbe kone spad gan llak wdilen.
22To setegaze bsel txhonj be'nn kone le ake',
txhonj be'nn bi llayachrall:
To gak llakia gusia ake' keten llin dan wcheb le aken.
Le ba bche'n ake' to yell ga wzap ake' nada',
na raw xnezan ba bzoa aken to ga lljabixa.
23Axha rwe' Xana, nezro yoyte xbab ka'
ba ben ake' nench'na gut ake' nada'.
Bi sixheno ke damar ke ake' ka',
na bi galallo daxhinj ka' ba ben aken.
Benchga ke yexhj ake' kwiton,
bsakzi ake' kone yel llruk ko'on.
Currently Selected:
Jeremías 18: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios