Jeremías 14
14
To boa xhen
1Xtol dan bzoan boan, Xanllon balwille Jeremíazen, na gulle'e le'e:
2Bell yiach Judán,
yoyte be'nn ka' sjalla yell xhen'na zu yiach ake',
na be'nn ka' zajnit ake' raw yu.
Na be'nn yell ke Jerusalén'na llusia ake' kanaken lleyllra aken.
3Be'nn wnia ka' llsel ake' be'nn wen llin ke ake' ka' nench'na lljaxi ake' nis,
na be'nn ki llaj ake' lloa bejen, axha bitbi nis yull aken,
na llabiren ake' lew dach ke ake' ka',
to bitkran llak akre, llebraz llayie akre,
to llox yichj ake'.
4Be'nn wen llin yix ka' to nike zu akze wen
to llox yichj ake',
ke naken bibi yejw llak
na yell-li'on ba bayechen.
5Rentekaze bllin yix ka' sjalla lixen,
llsanlall xhi'nn akba ka' le llarjten,
le bibi yix de gaw akba.
6Burr ka' bi nmaxhen,
zajze akba raw rum yech ka'
llkallew xhin akba, kan llun bekw yiw ka',
na ba zajze llchul akba
le bitbi yix de gaw akba.
Jeremíazen llne'e raw raz be'nn yell ka' kone Xanllon
7Xanto, daxhinj keto ka' ba badxhenen neto',
broechga neto' yel wen dalixhej ko'on.
Dazan raz bine' gakto be'nn wen dalixhej kone rwe',
na ba bxinjto kone rwe'.
8Yel xhenlall ke Israel,
wasra keto keten llalleyrawton,
¿bixhchen llunzo keto be'nn zit latj yell-liw ni,
ke to be'nn lladeze, na llaye'e tlleꞌze?
9¿Bixhchen llunzo ke to be'nn llakchixe,
ke to be'nn waka ya, na bikse llakrene neto' cha'?
Axha Xana, rwen zew radjto ni,
yoyte be'nn nez akre neton nakto be'nn yell ko'o,
bit wsanlallo neto'.
10Xanllon gulle'e be'nn yell ka' sjalla Israelen: Be'nn yell ki le llawe akre ta ake' gateze. Kelen'na bi llre akre wen. Na na' walljadinlalla ke daxhinj ke ake' ka', na wsakzia le ake'.
11Na Xanllon gulle'e nada': Bi wnabo nench'na gakrena be'nn yell ki. 12Lakse cha llebraz gun ake' was, bi wzenaya xtill aken, lakse cha wzey ake' bayix, na yedoa ake' da zerall ake', bi reran wen. Wlleyia le ake' kone wdil, kone win da yej gaw ake', na kone yillwe.
13Na nada' ballia xtillen: Xana, be'nn ka' llayixjwe di'llen lle'e ake' be'nn yell ka' bitbi wdil gat, na bibi win gat, le rwe' weo latj su ake' nbaraz latj ni.
14Natell Xanllon ballie'e xtillan: Cha be'nn ka' llayixjwe di'llen llne'e ake' rawraza, ziye akzen. Bit ne' wsela be'nn ka', na bitbi ne' yepa le ake' bi gun ake', na nike ne' weren akze di'll. Da wxhiyezen llredao akre, da llayirjlall toraz akzen. Di'll kenxhien da ake' llixhjoe akre. 15Le nada' Xanle, nia ke be'nn ka' llayixjwe di'llen be'nn ka' llne'e rawrazan, nada' bine' wsela le ake', na da ake' ne ake' bi gat wdil, na bi gat win latj yell-liw ni, axha le aksen te ake' win, na kweyi ake' keten gat wdilen. 16Na be'nn yell ka' llzen akre kan, lekse ka' te ake' win, na kweyi ake' keten gak wdilen rente xhor ake' ka', xhi'nn ake' bi biew ka' na' xhi'nn ake' bi nor ka'. Be'nn wat ka' walljazal ake' le ake' tnez ka' sjade Jerusalén'na, na nutno wkoach le ake' lo yu. Kone ka' chixhj ake' damar ka' ba ben aken. 17Ki gullgall be'nn yell ka':
Nike llbexhze yajrawa ki
llbellen do lla do yere,
xtol dan llalleyraw be'nn yell kian,
ke we xhen'na nak aken.
18Keten lla lixen, na llrera be'nn wat ka'
be'nn ka' ba gut raw wdilen,
keten llwa yell xhen'na, na llrera be'nn ka'
llbeyi ake' kanake llde ake' win dan llbil dun aken,
na rente be'nn ka' llayixjwe di'llen, na bxus ka'
ba zajze ake' latj yell-liw ga bi numbie akre.
Be'nnen llayixjwe di'llen lle'e Xanllon.
19Xana, ¿ba balliyo dokenak Judán kale cha'?
¿Ba jachiero latj yell xhen ke Sión'na cha'?
¿Bixhchen beno neto' to we da bi wayake?
Llbexhto gak wen keto,
axha bitbi dawen ne' gak keto.
Llbexhto wayakto,
axha to llchebzen neto'.
20Llezaketo, Xanto, damar keto ka',
na dol ka' bdap xustawto ka',
ba bento daxhinj raon.
21Nike yel baran ko'on bi walliyo neto' kale,
bi gunlo kaze latj yell xhen ni
gan llnebiareno yelwak ko'on.
Jadinlall ke di'll ka' bchajllareno neton,
balaraon.
22¿Zajzurize loe lsak
gun ake' yejw cha'?
¿Toraze yeban llselen nis yejw cha'?
Ka', Xana Dios keto.
Rwen llselon
rwen lluno yoyte da ka',
kelen'na nxenlallto rwe'.
Currently Selected:
Jeremías 14: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
