Jeremías 13
13
Da llsakreb dan bi guk Israelen wen dalixhaj
1Xanllon gulle'e nada': Biaj, na wew to baydun de rall cha'on nzi lino, na bchelen lsino, axha bi wazbison kone nis. 2Nada' bxhia baydun'na, kan gull Xanllon nada', na bchelan lsina. 3Natell bne'e Xanllon nada' dayubre, na gulle'e nada': 4Bxhi baydun'na yo' lsinon, na biaj gan de yeo ke Éufratezen, na gana' bkoachen radj tin ke yajen. 5Natell bia gan nzi yeo ke Éufratezen, na bkoachan kan ba gull Xanllon nada' guna.
6Scha ba guk ket Xanllon gulle'e nada': Biaj gan de yeo Éufratezen, na jaxhi baydun'na dan gulla rwe' lljakoachon. 7Na bia gan de yeo Éufratezen, na babeja baydun'na gan bkoachan'na, axha ba bayullen, na bill naken wen.
8Natell Xanllon balwille nada' dayubre, 9na gulle'e nada': Kayanse guna wlleyia yel yarall ke Judán rente ke Jerusalén'na. 10Be'nn yell ki nak ake' be'nn wednay bi llen akre wzenay ake' kan ba gull aken, na naw akse llun ake' kan ne' raxhdao ake' xhinjen. Na ba naw ake' llwerao dios yub akre, na ba llchekw xhib aken rawe da ka'. Na ba nak ake' ke baydun dan bill nak wen'na. 11Kan llchajllallo baydun'na lsinllo, ka bzapa yell Israelen, na yoyte be'nn yell ke Judán, tuze naka rente le ake', nench'na guk ake' be'nn yell kia, na wroe akre noxhan naka nada', na gunxhen ake' ran, na gap aken baran. Axha bi bzenay ake' kia. Nada' Xanle ba bnia ka'.
Ye to da llroen da wsakzi willjwani
12Lekse ka' gull akte ye to: Xanllon, Dios ke Israelen nee: Yoyte lew ka' llayal chull aken zu ke uva. Na be'nn Israel ka' ne' ake': ¿Bixha bi nezeto kon to lew gak chullen zu ke uva cha'? 13Na rwe' ye'e akoe: Xanllon ba bnee: Wsullra be'nn ka' zajzu latj yell-liw ni, be'nn wnebia ka' sjache gan bnebia Daviden, na bxus ka', na yoyte be'nn ka' llayixjwe xtill Diozen, na yoyte be'nn ka' zajzu Jerusalén'na. 14Na wayullna guna ke wxhoxj loellj ake', xhi'nn ake' kone xa' ake'. Bi wayachralla le ake', wlleyia le ake', bi sixhena ke ake'. Nada' Xanle ba bnia ka'.
Llixjwen kan gak ke Israelen
15Be'nn Israel, Xanllon ba bnee.
Bi gakre be'nn yarall, le wzenayian ke'e.
16Le gap Xanllo Diozen baran,
che'ga bine' wsele'e daxhchulen,
na sjachew re' raw ya' zichnieraz ka',
che'ga ke ne' wayune'e xchul gasjwi
na ka xhur ke yelguten,
yel benin llbexhren.
17Na cha re' gunle kaze,
de ngachze koella xtol yel yarall keren,
na yinj nis rawan
kanaken wchach ake' xhi'nn Xanllon raw yell gan zajzu aken.
Di'll dan bsel Diozen ke be'nn wnebian
18Gull be'nnen llnebian, na rente xne'en:
Le wayetj gan llire llnebiaren, na le kwe raw yu,
le ba baga dan ndos yichjren
corona dan llnebiarenlen.
19Yell xhen ka' sjanbanle Négueb, ba sjalla ake' to lloarawe,
na nutno llakse llde gana'.
Yoyte be'nn ka' sjalla Judán ba bchach ake' le ake' yell ke aken,
do kenak ake' ba bchach ake'.
20Le wlis yichjren, na le wia
kan bazak be'nn ka' sjalla ralen, be'nn ka' llwiere ren.
¿Ganxha be'nn ka' bkoana rallnaon nench'na gap akoe,
be'nn ka' llun rwe' xhen'na?
Gani' llixjwen koej ake' Israelen yellen
21¿Akxha ke ne'rizo Jerusalén,
keten ba llnebia ake' rwen
be'nn ka' ba broe bsedron?
Kena walleyra'o
ke to nor le sute xhi'nn.
22Na cha llnabrize kwino bixhchen llakrize ko'o ka,
le xtole daxhinj ka' ba benon,
kelen'na ba bkoan ake' rwe' galyidzo,
na ba benle akre rwe'.
23¿Wakrize to da gasj wacha klor ken cha'?
¿Wakrize waka ban nzi leopardo manch ka' daban cha'?
Kaksen naken ke re', kanaken bayorawre llunle damar,
na bi llak llunle dawen.
24Kelen'na guzlasa re'
ke to yixh da llwa be.
25Kan gak ko'o rwe' Israel,
len'na nak raxhjo da lluna' rwen.
Nada', Xanle ba bnia ka'.
Le gulallo nada',
na bzoaw yel nxenlall ko'on raw loe lsak ka'.
26Leskakse nada' guna ke ta galyidzo
na guna yelsdo ko'o.
27Ba brera dan llaktonron, na dan dan llgo xtuon,
yelsdon lluno ke naken nako nor reen,
yel'sral ka' lluno
raw rum ka', na lix ka'.
Niachraz naken ko'o rwe' Jerusalén,
¿ye arke ne' yallj nench'na yeyako yall cha'?
Currently Selected:
Jeremías 13: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios