Jeremías 12
12
Be'nnen llayixjwen balwille Diozen
1Xana, chenak nada' gakdilrenchka rwe',
do tiemp napo rwe' rson,
axha lakse nada' llenla wnabra rwe'
bixhchen llak ke da ki.
¿Bixhchen llakze wen ke be'nn wednay ka'?
¿Bixhchen zajzu be'nn ka' llayechjen nbaraz?
2Rwe' llazo le ake' ke to yay,
na le aken llyin ru' ake', lliw ake' na llbia akte daxhixh.
To lo llwa akzen llwal ake' rwe',
na lo raxhdao aken zen zit kwis kwiton.
3Axha rwe' Xana, rwe' numbiero nada',
rwe' llrero nada', na nezro
gakren nak yichj raxhdawan kone rwe'.
Bche be'nn ka', ke llche ake' xhir ka' zajze raw yay bsaj,
na bzoa llan llayal kweyi akban.
4¿Batxha zeraw gak yech raw yell-li'on
le ballkoad yix ka' raw yu lix ka'?
Bayix ka', na ba ka' zajzu xiren ba llat akba
yel wen damar ke be'nn ka' sjalla latj yell-liw ni,
bi llayun ake' xbab rwen llrero kan llun aken.
Diozen ballie'e di'llen
5Cha llebraz llajxakro keten llnaudow be'nn ka' keten llgudo ake' nez kon nia aken,
¿akre ke gunlizo naudow be'nn ka' sjallia kull kabay ka' keten llxhonjdo aken?
Cha llajche'o, na llyialo torazo gan nak wen'na,
¿akre guno keten tew lo din ka' nbanle Jordán'na?
6Le rentekaze bi bicho ka', na rente be'nn bich loelljo ka',
ba bayechj ake' rwe',
to llusia ake' llne'e ake' ko'o.
Bi wxenlallo le ake',
lakse cha llne'e ake' wen keten llweren akoe di'llen.
Xanllon zuyache kan llak ke yell ke'en
7Ba bsanlalla yell kian,
ba balliya kale dan guken kian.
Ba benan rallna be'nn ka' llwiere len'na,
latj yell-liw dan llebraz bllieran.
8Yellnin, guken kia,
na na' naken kia nada' keto bell yix ba da lo yixtao,
na llusiaba lluneba nada' snia, kelen'na llwieran.
9Yell kian naken ke to ba zu xir ba llia dob da nak nbaraz
na ba nechj chud ka' leba.
Leda yoytere bayix ba bi nmaxh,
lewadup wallay nench'na gawreba.
10Be'nn zan be'nn wnebia ba blleyi ake' gan sjalla lba uvas kia ka',
ba brajchekw ake' yu lix kian.
Ba bakoan aken ller llibze
latj yell-li'on llebraz nllieran.
11Bakoan akten ke to latj dach yu bill,
na na' ba llrera katken llayat akren.
Doxhente latjen ba naken ke to latj dach yu bill,
axha nutno llakzede len.
12Doxhente gan nak raw rum ke latj dach yu billen,
ba bra be'nn ka' dlleyin,
le nada' Xanle, noxa to spad
da wlleyi doxhente latj yell-liw gan sjallaren,
na nutno gak su nbaraz.
13Guzre trigo, na barapre yay yiech ake',
ba bendadsre yoyte llin ka'.
Ba blleyi dan llarapren
xtole dan llrukan.
Dan bcheb Xanllon raw yoyte yell wrill ke Israelen
14Kin ne Xanllon ke yoyte yell wrill wen damar ka' sjanechj Israelen, na ba blleyi ake' latj yell-liw dan be'e be'nn yell Israelen. Nada' walall ake' raw yell-liw ke aken, na wabeja Judán radj aken. 15Axha ket ba bayull blalla yoyte re', kena wayachralla le ake', na guna nench'na wabi ake' raw latj yell-liw ke aken. 16Daliyan le aken broe akre be'nn yell kian ke wal ake' ra loe lsaken nzi Baal, axha na' wak su ake' radj be'nn yell kia ka', cha dali llen akre wcheb ake' wzenay ake' kan llroe be'nn yell kian, na wcheb ake' wal ake' nada', na ne' ake': Kone yelnban ke Xanllon. 17Axha be'nn ka' sjalla latj yell-liw ka' bi wzenay kia, walana dokenak ake', na wlleyia le ake'. Nada' Xanle ba bnia ka'.
Currently Selected:
Jeremías 12: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios