Isaías 42
42
Be'nn wen llin ke Xanllon
1Gani' ze be'nn wen llin kian, be'nnen llakrena,
be'nnen ba biazrallan, na kone le'e zoa nbaraz.
Ba bzoa yichj raxhdawen espíritu kian
nench'na gunee yel korchis ke yoyte be'nn lla' latj yell-liw.
2Bi gusie'e, bi wlep chie'e,
ni bi yen akre chie'en du tnez ka',
3bi wasyulle'e chichje'e ya xtir ka' ba nachjen,
na bi wasure'e dun llalwezen.
Daliyan nse'e yel korchisen.
4Bi waziralle ni dan llpe le'en bi gachjen,
llinte lla ket wzoe'e yel korchis ke'en raw yell-li'on.
Be'nn ka' lla' latj yell-liw ka' lli lo nista'on su ake' wzenay ake' kan wroe wsedren.
5Dios, Xanllon, benee yeban, na bchirjen,
na benee yell-li'on, na da ka' lliw rawen,
na llwe yelnban ke be'nn ka' lla' rawen,
lle be'nn wenllin ke'en:
6Nada' Xano, ba balwilla rwe'
na ba bexa tako,
nench'na guno yel korchis,
nada' benchawa rwe', le llenla gako
to sen kedan ba bchajllarena be'nn yell ka',
to beni ke latj yell-liw ka'.
7Llenla wsarjo raw be'nn lchul ka',
na wabajo be'nn ka' lla' lo rill ya,
gan zajzu ake' lo yell broj xchulen.
8Nadan naka Xanle, len'na nak ran,
na bi wia latj nullre yela si' yel baran kian
na bi wia latj chajrao loe lsak ka', tuze nadan werao ake'.
9Lewiakero ke ba gukte doxhente kan bdixjweran,
na na' chixjoera sre da kub ake',
llzenla re' ka' chega ke ne' gak ke daki.
Lluxken Diozen bene'e yel wasra ke'en
10Le gul ke Xanllon to da kub,
gazerawze nak zit ke yell-li'on le werawe,
be'nn ka' sjada raw nista'on
na bayix ka' lla' rawen,
na latj yell-liw ka' lla' llwa nista'on, na be'nn ka' lla' rawen.
11Le yawere re' llare' latj dach yu billen, na yell xhen ka',
na yoyte yell da nbanle gan nzi Quedar.
Le gul da wzoare' nbaraz re' llare gan nzi Selá,
le wlis chire gan zu rum ke ya' ka'.
12Le gun xhen Xanllon
na le werawe latj yell-liw lla' llwa nistaw.
13Diozen lloje'e ka to be'nn llze ke'e,
na gakdilrene kone yel llruk kan llun be'nn llaj raw wdil,
wlep chien, na gusie'e ka to be'nn llaj raw wdil,
na wlleyie'e be'nn ka' llwere le'en.
14Xanllon nee:
Daxhenkse tiemp bzoa lliteze,
bibi bneksa, bdawzeralla,
axha na' gusia ka' to nor le sute xhi'nn,
xub bich xhina, na wabanla.
15Wlleyia ya' ka', na rum ka',
wkoana yech doxhente gan sjade yix ka';
wayuna yeo ka', latj dach yu bill
na wachecha gan yull nis ka'.
16Wchia be'nn lchul ka' tnez
ga bi numbie akre.
Wayuna da xchulen to beni raw le ake',
na gan lla' sre yaj na wayunan rach.
Dani gunan nike le ake', na bi wsanlall ake'.
17Be'nn ka' nxenlall loe lsaken,
na be'nn ka' lle ake' loe lsak ka':
Ren nakre dios keto
wabiy ake' kanaken si' ake' yelsdon.
Yel lchul ke Israelen
18Be'nn nkoell ake', le wzenay,
be'nn lchul ake', lewiayian.
19Nutno llra' yeto be'nn nak be'nn lchul, na be'nn nkoell
ka be'nn wen llin kian, be'nnen bsela,
nutno llra' yeto nakll lchul, na nkoell
ka be'nnen nsa xtillan, be'nn wen llin ke Xanllon.
20Dazan da ba brere, axha bi llwie kan nak aken'na,
zu naye'e, axha bibi llenle.
21Xanllon, nike dan nake to Dios llasran,
gukralle'e gune daxhen ga zeraw yel llroe llsed ke'en;
22axha yell ni llban aken, na llrajchekw aken,
na yoy akte ba bro ake' le ake' lo rill ya',
ba bsaj ake' le ake' lo yell broj,
llnebia ake' le ake' na nutno llra' wasra le ake',
llban ake' le ake', na nutno llra' wasra le ake'.
23¿Nuxha re' llunle bare dani?
¿Nuxha re' zuyian yichj raxhdaore wzenayre da ka' ze gaken?
24¿Nuxhan be latj ke Israelen, yell ke Jacoben
gun aken gan, na koan aken?
¿Bi naken dali Xanllonan ba benee ka?
Le aken ba bxinj ake' raw le'e,
bi wen akre naw ake' nezen
ba broere le aken,
na bi bzenay ake' kan broe bsedren.
25Kelen'na guklle le ake', na bsakzie'e le ake'
konen to wdil xhen dan ben nench gulnin ake',
na lakse ka' biwen akre wzenay ake'.
Currently Selected:
Isaías 42: ZPUPAT
Highlight
Share
Copy
Want to have your highlights saved across all your devices? Sign up or sign in
