Isaías 43
43
Tuze Xanllon nape'e yel wasran
1Axha na', Israel, yell ke Jacob,
Xanllon ben rwen, lle'e rwe':
Bi llebo, nada' basra rwe',
nada' balwilla rwe' konen ra'on, rwen nako kia.
2Chetka terizo gan de nis, nada' serena rwe',
chetka rwe' wlayo yeo ka', bi wkoane'n rwe' gana'ze,
chetka rwe' terizo raw yi', bi cheyo,
yi' llalninen bi wzeyen rwe'.
3Le nadan naka Xano, wasra ko'o,
Dios Xhirall ke Israel.
Nada' ba wewa rwe',
nada' ba bdixhja Egipton, Etiopía, na yellen nzi Sabá.
Nench ba got yel wasra ko'o,
4le nlliera rwen,
daxhen zako rwe', na nada' nlliera rwe'.
Nench'na gako kia, na wasra yel nban ko'on
bia be'nn nach ake', na latj yell-liw xhen ake'.
5Bi llebo, le nada' zerenksa rwe'.
Xte gan lloj willen, na xte gan llagach willen
guna wabi be'nn ko'o ka' nench wadup ake'.
6Yepa ralen: Basan ake',
na lle'len: bi wzayo le ake'.
Le dadsan xhi'nna biew ka', na xhi'nna nor ka'
zit kwis, gan llayull yell-liw nate,
7yoyte be'nn ka' llazake nadan,
be'nn ka' bena, na benchawa,
be'nn ka' bena nench'na gun xhen ake' ran.
8Le wayaxh yell kian,
zu yajrao ake' axha nchul ake',
zu nay ake' axha nkoell ake'.
9Yoyte yell ake' le wadup,
le wadup latj yell-liw ake'.
¿Nuxha radje daki ba bdixjwe dani,
na ba bdixjwe da ka' ba guk cha?
Lewzoa be'nn ka', na wacheb ake', na ne' ake' cha naken kan ba bnee aken,
nench'na yen akre, na ne' ake' cha naken dali.
10Xanllon ba bnee:
Re llrere yoyte da ka' lluna,
nada' breja re' nakre be'nn wen llin kia,
nench'na gumbiere nada', na wxenlallre nada',
na chajniere ke tuza nadan naka Dios.
Nutno dios ne' su ke nada',
na chras nutno sukse du willjwani.
11Tuza nadan naka Xanle;
tuza nadan gaka wasra re'.
12Xanllon ba bnee:
Nadan ba bdixjwera ke nadan wasra re',
kere yeto dios yubre,
na ne'zere kan naken.
13Kan batnate nadan naka Dios.
Nutno gak wara raw yelwak kian.
Nutno gak wachinj da ka' lluna.
14Xanllo, Dios Xhirall ke Israelen,
le'en be le ake' yel wasran, nee:
Nench'na gak wasra re' wsela be'nn Babilonian,
na wsarja yoyte reij ka',
na yel llawere ke be'nn caldeos ka' wayaken da chey'la ake'.
15Nada' naka Xanle, be'nnen ben Israelen,
Dios Xhirall, na llnebia re'.
16Xanllon bsarje to nez radj nista'on,
to nez radj nis da bi llbe lli,
17benee nench'na blloj be'nn waka ya nap yelwak,
konen karret ke ake', na kabay ake' nench blleyie'en.
Bial aken, na bi guk wayas ake';
baran ake' ka to du da zu raw seit da llal.
18Na na' Xanllon lle'e yell ke'en:
Bill llajdinlallo dan guk kan batna
bill guno xbab da ka' baguk kan najnase.
19Nada' guna to da kub,
na na' rekero ke wroe rawe.
Wsarja to nez radj latj dach yu billen
na guna nench gat yeo raw yu billen.
20Bayix snia ka' gunxhen akba nada',
ba ka' sjanak ke bekw, na ba ka' nzi avestruz ake',
le lluna nench'na llra nis latj dach yu billen,
yeo ake' raw yu yechen,
nench'na yell kian ba biazrallan we ake' da yej ake',
21yellen ba bxian ba benan kia
nench'na weraon nada'.
22Axha rwe' Israel, yell ke Jacob,
bi balwillo nada', axha ba jachiero nada'.
23Bi bzeyo xhir ake' nench werawo nada',
nike betzo bayix nench'na werawo nada'.
Nike ne' bnabza da wazarallo nada',
na nike bensra rwe' zed nench wzeyo yar.
24Na nike ne' gawzo da la xhixh
nench guno'n nada' ka da llazarallo,
nike ne' gunzo kan llenlan
konen za ke bayix ka' lluto.
Axha ba benzo sichjre ba beno nench ba jachiera daxhinj ko'o ka',
ba benbeyro nada' kone damar ko'o ka'.
25Axha nada', nike dan naka Dios ko'on, llalana damar ko'o ka'
na bill llajdinlalla daxhinj ko'o ka'.
26Chetka bide ko'o konen nada', cho nench'na gak yel korchis ke len.
Bex da ka wroeron, na narachk cha wroen nako be'nn wen dalixhaj.
27Xustawo nellen benee daxhinj,
be'nn ka' broe rwen bayechj ake' nada',
28be'nn ka' llnebia rwen btitj akre yodao kian,
kelen'na bena nench'na Israelen, yell ke Jacoben,
blleyi aken, na godyi aken.
Currently Selected:
Isaías 43: ZPUPAT
Highlight
Share
Copy
Want to have your highlights saved across all your devices? Sign up or sign in
