Isaías 13
13
Llixjwere da wsakzi Babilonian
1Di'll da ze gak willjwani kone Babilonian, da bredawe Isaías be'nnen nak xhi'nn Amós:
2Ne' wlis to raw ya' llerllib to sen ke wdil.
Leye waka ya ka' chaj ake' raw wdil.
Le wlis takren nench'na ko ake' nez chaj ake'
llwa reij ke be'nn braw ka'.
3Ba guxha be'nn war kia ka',
ba gulla be'nn xhirall kia ka' llaj raw wdilen dan gun aken,
be'nn ka' llawere keten lluna ga'n,
nench'na gun ake' kan nak yel llaklla kian.
4Raw ya' ka', ba ren llak llakia
ke ga lla' be'nn zan.
Ba ren llun ake' llakia, be'nn latj yell-liw ka',
yell ka' ba badupen.
Xanllon nap doxhente yelwaken llade'e ra' ake'
waka ya ke'e ka' ba ze ake' xnid nench'na lljake raw wdil.
5Za ake' to raw latj yell-liw zit,
za ake' gazerawze nak zit ke yell-li'on.
Xanllon kone yel llaklla ke'en,
ze'e nench'na wlleyie'e doxhente yell-li'on.
6Le kuell yiach, le gawlluze baze lla ke Xanllon,
zan ka to da lldin zi, ke Diozen nap doxhente yelwaken.
7Natell yoyte be'nn ka' lla' raw yell-li'on to gak yid akze,
yoy akte bill gat da gundiprall le ake',
8na wcheben le ake' kwis.
Wzoayiachen le ake', na cheyra ake' kwis
kakse to nor le sute to bidao ke'e.
Wia raw loellj ake' na yeban akre,
na cheynin llwarao aken nike dan wayie akren.
9Ba zaa lla ke Xanllon,
to lla da llichnieraz, da nsa yel llaklla na yel llruk,
da wakoan yell-li'on to latj yu dach,
na wasiaten be'nn wen daxhinj ka' lla' gana'.
10Berj ka', na da ka' llia le yeban
bill wseni aken,
to wayullze lloj willen, na le wsanten bill wsenin,
na be'on bill wen beni.
11Xanllon nee:
Wsakzia yell-li'on xtol damar ka' llak rawen,
na be'nn mar ka' dan llun ake' xhia ka'.
Wchochja yelyia ke be'nn yarall ka',
wtitjra be'nn raxhdao sib ka', na be'nn ka bi llap baran.
12Guna nench'na bill chan be'nn nach ka'
na gak ake' win kakse yaj cha'on nzi oro da za gan nzi Ofir.
13Natell yeban xizen
na yell-li'on tane'n gan zun'na,
dan wroera yel llaklla kian ka lla'na,
nike yel llruk kian.
14Be'nn ka' gak ake' ke ban nzi gacela ba nawlloa ake',
o cha ke txhonj xhir dao ket llaslas akba
na nutno zu watup le akba.
Toaj toaj ake' wabi ake' rall ake',
waxhonj ake' wayaj rall ake'.
15Kon nu dol akre gad ake' le'e da latit,
na yoyte be'nn we latj gox ake' le'e na gut ake' le'e.
16Ze akte llwia ake' kone yej rao ake' ka'
keten wtat ake' bidao ke ake' ka' raw yun,
na koan ake' da ka' lla' lo yo' ke ake' ka'
na gatren ake' nor ke ake' ka'.
17Wkoyela be'nn yell ke medos ka',
be'nn ka bi gun len nike mell plat, lakse cha wchab akren le ake'
na nike zerall akze ya cha'on nzi oro.
18Kone xhis waxit ke ake' ka' wda ake' biweo ka'
Bi llayachrall ake' bdao ka' ze gurjen, na nike llayachrall akze bidao ka'.
19Babilonia yell xhen nbaraz, na da nap yelwak
da llunxhen be'nn caldeos ka',
waganen ka Sodoma, na Gomorra,
kan blleyi akan'na.
20Nullno be'nn chakse rawen,
nullno gakse llajso rawen.
Be'nn árabes ka' bill lljachen ake' gana',
ni be'nn ka' llap bayix ka' bill llajlla bayix ke ake' gana'.
21Gana' lljacha xhid yix ka',
na bdid ka' gun akba rill akba gana',
na ba ka' nzi avestruz llajsu akba gana',
na leskakse chib ka' xitga akba gana'.
22Bekw yiw ka' koell yiach akba gan zu yo'rao ka',
na raw yo' wen ka' sjanak nbarazen cha bekw yiw ka'.
Gaolluze ba ze lla ke Babilonian,
ba nbabze lla ke ka'.
Currently Selected:
Isaías 13: ZPUPAT
Highlight
Share
Copy
Want to have your highlights saved across all your devices? Sign up or sign in
