Isaías 14
14
Diozen wayachralle Israelen
1Awa, Xanllon wayachralle Jacoben. Dayubre wzoe'e Israelen ka be'nn ba biazralle'e, na gunee nench'na be'nn israelitas ka' walla ake' raw yell-liw ke aken dayubre. Be'nn zit ka' lljabiy ake' kone le ake', na wayak ake' tuze kone yell ke Jacoben. 2Zan yell ka' si' ake' be'nn Israel ka' na chajren ake' le ake' yell ke aken, na be'nn Israel ka' si' ake' le ake' ka' be'nn wen llin ke ake' latj yell ke Xanllon. Be'nn Israel ka' ko ake' rill ya be'nn ka bro le ake' rill ya, na wsaksi ake' be'nn ka bsakzi le ake'.
Wtitj akre be'nn wnebia ke Babilonian
3Yell Israel, keten Xanllon gune'e yel wxhirall ko'o raw dan lley llra' ko'o, raw da ka' llzakzion, na dan bgun ake' rwe' llin da bi bdixhj ake' rwe', 4gulo diꞌll ki, nench'na wtitjro be'nnen llnebia Babilonian:
Lewiakero gare ba badgon be'nnen llsakzin.
Lewiakero gare ba badgon yel yarall ke'en.
5Xanllon bdichje yel wak ke be'nn maren
bxhoxjtine xhis ke be'nn maren
6be'nnen bsakzi yell ka' yela konen yel llruk
na bdine le ake' gazerawze
na bchochj blane yell ka' konen yel llaklla,
na bnawe le ake' na nike bayachrallze le ake'.
7Doxhente yell-li'on zajzu ake' nbaraz, na zu ake' wen,
na llusia ake' kanaken llawe akren.
8Rente yay dud ka', na yay cedr ka' zajlla Líbanon
llawe akren kanaken ba guk dakenxhie ko'on,
na ne ake': Ke llan bialo nate
nutno ne' wzoylle neto'.
9Gan lla' be'nn wat ka', llak dane' kwis
na lloj ake' wze niana ake' rwe'.
Be'nn wat ka' ba ban ake',
yoyte be'nn braw ke yell-li'on lloj ake' yedtil ake' rwe'.
Yoyte be'nn wnebia ke yell ka'
zulla ake' rawe gan lli ake' llnebia aken.
10Yoy akte llne'e ake',
na lle ake' rwe':
Leskakse rwe' ba bnito dan llundiprall rwen,
ba guko ka neto'.
11Gani' badgon yel yarall ko'on
na ba bsan dan nzi cítaras bill llunen llakia.
Na bezoy ka' ba llaren akba rwe' gan llxhoaw,
na bel dao ka ba nak akba ke to sab da ba nllelo.
12Ba wexjo le yeban,
berj sire.
Ba bayexjo raw yu,
rwe' beno gan latj yell-liw ka'.
13Beno xbab torazo:
Chepa le yeban,
na wzoa to ga kwia wnebia
raw berj ka' nak ke Diozen,
llajchia rale gan nak zit kwisen,
raw ya' ka' gan lladup dios ka'
14Chepa chkwia kullre gan zajze bej ka' zajze ralte,
gaka ka Diozen ze rale kwisen.
15Axha daliyan ba betjo gan llnebia yel guten,
gan nak zitj kwisen.
16Be'nn ka' ze llwia rwen,
na zeyan ake' llwia ake' rwe', ne ake':
¿Be'nn nin llxis yell-li'on,
na dlleyie'e latj yell-liw ka',
17na bakoane raw yell-li'on ka to latj yu dach,
na dlleyie'e yell xhen ka',
na bi llasane be'nn ka' yo' rill-yan cha?
18Yoyte be'nn ka' bnebia latj yell-liw ka', bkoach ake' le ake' nbaraz,
toaj toaj ake' lla' ake' lo ba ke ake' ka',
19axha rwe', lljazal ake' rwe' zit gan sjade ba ka'
ka beb da nak sral,
ka to kwerp ke be'nn wat da ba brajchekw ake',
radj be'nn bet ake', be'nn bchuy ake' yen,
na jazal ake' le ake' gazeraw nak zitj ga lla' yaj ake'.
20Bi wkoach ake' rwe' ka be'nn wnebia ka' yela,
le bchinjo latj yell-liw ko'on,
na blleyiw be'nn yell ko'o ka'.
Xhi'nn xhasoa be'nn wen damar ka'
bi sibia ake' ke chnare.
21Le waze xnid nench'na gutre xhi'nn
be'nn ka' ben xhia ka', nike xhia ke xa ake' ka,
nench'na bill gun ake' xbab wnebia ake' raw yell-li'on,
ni bill waslla ake' yell-li'on kone yell xhen ake'.
22Xanllon nap doxhente yelwaken ba bnee:
Tilrena le ake',
wlleyia dokenak Babilonian,
na konen dan wagan rawen,
konen xhi'nne ka', na xhasoe ka'.
23Wayunan to lo gull,
ga lljacha ba ka' nzi bdid ake'.
Wlleyia doxhenten.
Xanllon nap doxhente yelwaken ba bnee ka.
Asirian kweyin
24Xanllon nap doxhente yelwaken ba bnee kan gunen:
Ka dan ba bnian, da gunksan,
ka da ba bena xbaben, da gaksen
25Wlleyia be'nn yell asirios ka raw latj yell-liw kian,
wchochja le ake' raw ya' kia ka'.
Yuk ke aken bill wsakzin be'nn yell kian,
waga dazi ka' bxoa ake' kull yell kian.
26Danin ba bachuyralla guna raw doxhente yell-li'on.
Taka ni llcheben yoyte latj yell-liw ka.
27Xanllon nap doxhenten yelwaken ba bnee kan gaken,
na nutno gak ye le'e bi guno ka,
Taken bazen llcheben,
na nutno gak wacha xbab ke'en.
Kan gak konen be'nn filisteo ka'
28Yizen gut be'nnen llnebian nzi Ahaz, Isaíazen bnee kan gaken:
29Bi yewero latj yell-liw ke Filistea,
dan ba guchj xhis dan llsakzia rwen,
le gan blloj to bel, gana' lloj yeto bel snia,
ba naktell snia ba zu xire.
30Gat raw yu lix kia ka', yixh da gaw bayix ke be'nn yiach ka',
na be'nn ka' bitbi de ke ake' wazirall ake' nbaraz.
Axha, nada', guna nench'na be'nn ko'o ka' kweyi ake' yel llbildunze,
na guta be'nn ko ka' llagan yeraten.
31Le koellyiach, yell xhen filisteas ake'
le gusia dan lljalere, le xis yel lleb.
Le rale za to kwen be'nn waka ya, na zak ake' kakse to bej de lleen;
ni to be'nn bi llalloje gan baze ake' chnezen.
32¿Bixha ka gak yello be'nn ka' ba bsel latj yell-li'on cha?
Ke Xanllo ba brekw'lle'e Jerusalén'na,
na gana' wkoach be'nn yell ke'e ka' zu yiachen.
Currently Selected:
Isaías 14: ZPUPAT
Highlight
Share
Copy
Want to have your highlights saved across all your devices? Sign up or sign in
