San Mateo 27
27
Jesús bode'eke le' lona'a Pilato
(Mc 15.1; Lc 23.1-2; Jn 18.28-32)
1Kati guie'ani, yogote'a xan ka bxozi le'an ka bene waka kika judíos bega'anke regle te beguilhajke nakalha gotike Jesús. 2Beche'ake le' nogake le' te bode'eke le' ki Pilato, gobiarne romano.
Yelagoti ki Judas
3Judas, bene bode'e Jesús, nan gnisienhe chigleajbe'ake ki Jesús gati, beyagoya' le' te bode'e chirhoa domi lasi plata kika bene xanka bxozi le'an kika bene waka, 4Rhe le'ake
—Tamalha be'anha bodea' lo yelagoti to bene bibi dola' nape.
Te le'ake bochhike:
¿Xha tan bixha koenda kne'ato? ¡Tan rhon dola' kio'!
5Na'arhe Judas bzale domi lasi lo yo'o sdo'o te guiaje yajloe' do' lobe'e.
6Xanka bxozi besoke domi na, te rne'ake
—Domi ni noa rhen; labi gaka ko'orha lo gui'in ga' rgo'oke go'on.
7Na kan bega'anke regle yezi'ike le'an domi na to yo' ki bene we'an yeso yo', kinda gata' to lataj ga' skachike bene zito. 8Tanka, lichhileyo' na ne rzi lawe Lichhileyo' Rhen. 9Na kan goka kumplirhe ka' gne'a bene btzalaje laza Diozo grelawe Jeremías: Gde'alake chirhoa domi lasi de plata, le'a kanti rne'a ka bene Israel saka to bene, 10te le'an domi na bezi'ike lo guixi ki bene rhonhe yeso, ka' gochhi Xanha ne'adia.
Jesús zee lo' pilato
(Mc 15.2-5; Lc 23.3-5; Jn 18.33-38)
11Jesús gche'ake lo' gobiarne, te gnabene le':
—¿A loe' nakalho bene rne'abe'a kika bene judíos?
—Loe' chigne'alho kan —bochhi Jesús.
12Tzalaka ka xanka bxozi le'an ka bene waka rhagoke le' xhkia' ta labibi be'anhe, Jesús labigsla bi rhochhie'. 13Tanka pilato gnabene le':
—¿Alabi rhenlo yogote'a tan rpaguekene loe'?
14Te Jesús labi bochhie' nito' didza; na gobiarne na gokiene banachhi.
Jesús zue' rhoa yelagoti
(Mc 15.6-20; Lc 23.13-25; Jn 18.38—19.16)
15Dza rhaka lani, bene nake gobiarne yolawe yosle'e to bene dze'e lichhiguia, kon nolha yenaba ka bene yechhi. 16Na dze'e to bene lichhiguia rhelawe Barrabás; 17Te kati bedobike, Pilato gnabene le'ake:
—¿Nonolha rhe'anhelhe lén gsla': a Barrabás achen Jesús bene rne'ake nasela Diozo?
18Le'a Pilato gokiebene yelaxhe'a kie'ake bode'eke Jesús lone'e.
19Tzalaka Pilato rhie ga' rkanke regle, nigolha kie' gsele bene zajechhike le': Bibi gonhelho bene na, le'a bibi dola' nape, le'a bedoye'alha gneda ye'alha banachhi nia' kie'.
20Te ka xanka bxozi le'an ka bene waka glo'oyelake bene zen kinda snabake yebeaje Barrabás te gnabake gati Jesús. 21Gobiarne na' gnabekene le'ake tayobilha:
—¿Nolha de rhopake rhe'anhelhe gsla'?
Le'ake rne'ake:
—¡Barrabás!
22Pilato gnabene le'ake:
¿Na nobi gonha ki Jesús, no rne'ake kie' bene gsela Diozo
Yogote' bochhike:
—¡Bgale lo yaga krozo!
23Pilato rhe le'ake:
—Le'a ¿Nobi tamalha rhonhe?
Na le'ake tayobilha rbechhiya'ake rne'ake:
¡Bgale lo yaga krozo! 24Kati Pilato gokiebene labi rhaka ka' rhe'anhene, le'a rbete'azi ze'adi, na gsele zajxike nisa na gdibe ne'e loka bene dzake na, te rne':
Labi naka xhbagueda ki yelagoti ki bene ni; Lén gaka xhbaguelhe.
25Na yogote'a bene bochhike
—¡Ne'ato le'an ka xhi'into rhaka xhbagueto yelagoti ki bene ni!
26Na'arhe Pilato bosle'e Barrabás; na'arhe gochhie ka bene sgagodzake Jesús na bode'e le' kinda gdake le' lo yaga krozo. 27Ka bene rheajke lo dila zoake lona'a gobiarne beche'ake Jesús lo yo'o ga' rhe' pilato na botobike yogoka bene rheajke lo dila torhoe' ga' ze'e. 28Gde'alake xhe'e, bgakoke le' larhe xhna'a 29na bchhiake yikiaje to korhon nadiane le'an yechi' te ne'e tzala'a lhi' bgoake le' to xhisi. Dena'a bze'acho xhibike lawe, na rtitajkene le' te rhe'ake le':
—¡Bene rne'abe kika judíos! 30Le'aksikan rdake le' xhenhe, te le'an xhisi nagsizi rguinke yikiaje. 31De btitajkene le', gde'alake larhe xhnha naxoe', te bogakoke le' xhagse na gche'ake le' kinda gdake le' lo yaga krozo.
Yelagoti ki Jesús
(Mc 15.21-32; Lc 23.26-43; Jn 19.17-27)
32Nan broajke yechhi na, bedzagake to bene rhelawe Simón bene Cirene, rhe'anka rhe'anhe bene ni kon bgoake le' yaga krozo noa' Jesús.
33Bchhinke to lataj rhelawe Gólgota (o sne'arha "Lataj ki chhitagoti") 34te bdeke guia'aje xisa bedzolhi notze ta sla'a; te Jesús bnetaje le'atido, na labi go'onhene guia'aje. 35Kati bgalake le' lo laga krozo, ka bene rheajke lo dila bele'ekene xha Jesús.
36Dena'a gre'eke kinda guioke. 37Xhkodza yikiaj Jesús bdake to guichi, ga' nazoaj nobixhkia' be'atike le'. Guichi bdake rne'a: Bene ni Jesús, Bene rne'abe'a kika judíos. 38Le'aksikan be'atike lo yaga krozo le'an le' chopa bene we'an taxhinaj toe' tzala'a lhi' te yetoe' tzala'a yegalha. 39Bene rdeke rhe'a zi'ike le', rka rsidike yikiaje 40na rhe'ake le':
—¡Loe' zeajlho skinajlho yo'o sdo'o na yeyonlo non tzona dza! ¡Chen nakalho Xhi'in Diozo, bsla' kuinlo te beye'azi lo krozo na!
41Le'aksikan xanka bxozi ka muestro ki xhba'a, kan ka bene waka btitajkene le'. Rne'ake:
42—Bsle'e bene yobilha, na birhake gsle'e kuinhe. Nake bene rne'abe'a ki yechhi Israel: ¡Ka' rheye'azie lo yaga krozo na, te tzeajerha ye'a kie'! 43Chi bzoe kuinhe lona'a Diozo: Ka' rsla Diozo le' chen, chen tabalha rhe'akiene le'! ¿Le'a le' gne' nake Xhi'in Diozo?
44Te le'ante'a ka bene we'antaxhinaj dake lo yaga krozo le'an le', rhe'a zi'ike le'.
Yelagoti ki Jesús
(Mc 15.33-41; Lc 23.44-49; Jn 19.28-30)
45Nan gatzaj dzate'a bchhinte'a be'an tzona nan xhoelha, sdote'a lichhileyo' gchola. 46Tina'agsizi, Jesús grechhiye'e tazidzaj: Elí, Elí, ¿lemá sabactani? (Rhe'anhe sne'a: Diozo kia', Diozo kia', ¿nobixhkia' chi bsan na'alho ne'adia?)
47Balaka bene ze'ake na', benkene te gne'ake:
—Bene ni rledze bene btzalaje laza Diozo grelawe Elías.
48Tina'azi, toe' guiaje rze'aze yajtilhaje to xhilha, te bgazaje xisa bedzolhi zi, be'ague lo to yaga te bze gago rhoa' kinda guia'aje. 49Te bene yebalake rhe'ake le':
—Dokoeza, chen Elías yede desle'e le'.
50Tayobilha Jesús grechhiye'e tazidzaj, te gotie'. 51Tina'azi larhe na ze'a lo yo'o sdo'o greza na broaj chopalha, de rha'alha zeajte'a chhi'ilha. Gxho'o lichhileyo', te gla'aka guiaj yela 52te byalhaj ka ba kika bene natike; te tixeka bene bxenlachhike Diozo, bene gotike, beyasabebanke. 53Na berhoajke lo ba kie'ake, de beyasabeban Jesús, te beyo'oke lo yechhi Jerusalén, ga' ble'eke tixeka bene le'ake.
54Kati bene yajlo kan bene ze'ake ryoke Jesús ble'ekene bedoxho'o kan bikaka rhaka, bdzebikagaze te gne'ake:
—¡Tabalhaksi bene ni nake Xhi'in Diozo!
55Na' dzaka tixe nigolha, ryoke dezitolha, le'ake gdoke Jesús tagzate'a Galilea na gokale'anke le'. 56Na' notze María Magdalena, María xhna Santiago kan ki José, kan nigolha ki Zebedeo.
Rkachike Jesús
(Mc 15.42-47; Lc 23.50-56; Jn 19.38-42)
57Kati gchola, bchhin to bene rze'akie rhelawe José, bene Arimatea, le'aksikan gdoe Jesús. 58José guiaje yajyoe' Pilato te benabe kuerpo ki Jesús. Na Pilato gochhi ka bene yodeke kuerpo na, 59te José bezie kuerpo na, te bolachhie le' sabno tzawe ta naka chhia'a 60na gloe' le' lo ye'arhoba kobi, lo yo' ga' naka kie', ta gdidaje lo guiaj. De gxoe' to guiaj xhengolha rhoa ye'arhoba na, te beze'e. 61Te María Magdalena kan María yetoe' gre'eke rhoa ba na.
Bene ryoe lo ba ki Jesús
62Kteyo, o sne'arha, dza sabdo, ka xanka bxozi kan fariseos guiajke tzaxhen yajyoke Pilato, 63te gochhike le':
—Xanha, rhajneto bene gxhiye'a, kati ne nabanhe, gne' de gaka tzona dza rhala yeyasayebanhe. 64Tanka, gsela ka bene zajyoke lo ba na non tzona dza, te ka' tzeaj ka bene glachhile'anke le' te koanke kuerpo na, te ye'ake ka bene chibeyasabebanhe. Chen kan gonke, sikake ye'a banachhirhe kalha ta nerho.
65Pilato Gochhie le'ake:
—Na' napalhe bene rheajke lo dila zajyoke. Letzeaj te leguio chhia'a kon ta se'akielhe.
66Guiajke, te byoke ba na te be'agake guiaj nabaga ye'arho ba na; te boka'anke na' ka bene rheajke lo dila te guioke.
Currently Selected:
San Mateo 27: XDZPY
Highlight
Share
Copy
Want to have your highlights saved across all your devices? Sign up or sign in
Porciones en Zapoteco de Yalahui, Oaxaca, México © Sociedad Bíblica de México, A.C.
