San Mateo 26
26
Guio'oke toloelhe kinda senke Jesús
(Mc 14.1-2; Lc 22.1-2; Jn 11.45-53)
1Kati beyochhi yogote'a tan rse'adie Jesús ka bene, gochhie bene lachhile'anke le':
2—Ka' chigsi nezelhe, dia ye chopa dza gala lani ki Pascua, te Xhi'in bene bguio' yodeke le' lona'a ka bene kinda gotike le' lo yaga krozo
3Dza nateka, ka xanka bxozi le'an ka bene waka kika judíos bedobike lo yo'o ga' zoa Caifás, bene yajlo kika bxozi, 4Beguilhajke nakalha siekene ye'a Jesús, te senke le', na gotike le'. 5Te rne'ake:
—Labi rhala gonrha kan nan rhakateka lani, kinda ka' sdza'a ka bene.
To nigolha bgazaje nisa rlaa zixi yikiaj Jesús
(Mc 14.3-9; Jn 12.1-8)
6Jesús zee yechhi Betania, lo yo'o ki Simón, bene gchhie yedzo'; 7te to nigolha guiaje ga' zee noe' to xhoaga nadzate'a nisa rlaa zixi ta rzakagazi. Latzaka Jesús rhie lo ga' rhagoke yeta, nigolha na bxitie yikiaje nisa rlaa zixi. 8Bene lachhile'anke le', nan ble'ekene, bdza'ake te gzolhoke rne'ake:
—¿Nobixhkia' rhonditajene nisa rlaa zixi ni? 9Wenkalha ka' beyotie' yezie taxhengolha, kinda gonhe yodarhe ka bene ye'achi.
10Jesús benhene, te gochhie le'ake:
—¿Nobixhkia' rhonhele ze'adi nigolha ni? Tachhia'a chi be'anhe kia'. 11Le'a ka bene ye'achi tolizi se'ake le'an lén, zan ne'adia laga tolizi sea le'an lén. 12Tan be'an nigolha ni, nan bgazaje ne'adia nisa rlaa zixi, kinda sgachia. 13Talite'a rhapa lén gatite'azi lo lichhileyo' ga' rguixaje'eke rson wen ki Diozo, le'aksikan gtzalajke ka' be'an nigolha ni, te kan zajnekene nigolha ni.
Judas rhode'e Jesús lona'a ka bene
(Mc 14.10-11; Lc 22.3-6)
14To de bene tzachhino lachhile'anke le', bene rhelawe Judas Iscariote, guiaje yajyoe' ka xanka bxozi 15te gochhie le'ake:
—¿Nogakati gonale kia', te ne'adia yona lona'alhe Jesús?
Le'ake gdixhajke le' chirhoa domi lasi de plata. 16Te tina'ate, Judas beguilhaje kon kati soa laze kinda yode'e Jesús.
Xhtze'e ki Jesús
(Mc 14.12-25; Lc 22.7-23; Jn 13.21-30; 1~Co 11.23-26)
17Dza nerho ki dza lani na kati rhagoke yetaxhtilha ta labi notza, bene lachhile'anke le' guiajke ga'ago ga' ze'a Jesús te gnabekene le':
—¿Noga rhe'anhelho gonto xhtze'e ki Pascua?
18Le' bochhie':
—Letzeaj lo yechhi, lo yo'o ki to bene, na leye'e: Muestro rne': Tiembo kia' zoa ga'ago, te kida lo yo'o kio' le'anka bene lachhile'anke ne'adia kinda gonrha lani ki Pascua.
19Bene lachhile'anke le' be'anke ka' gochhi Jesús le'ake, te be'anke xhtze'e ki Pascua.
20Kati gchola, Jesús rhie ga' rhagoke le'an ka bene tzachhino lachhile'anke le'; 21tzalaka rhagoke, gochhie le'ake:
—Talite'a tolhe de lén yodelhe ne'adia lona'a ka bene.
22Le'ake gzoa ye'achike, te gzolhoke rnabe leza'ake toe' yetoe':
—Xanha, ¿a ne'adia?
23Jesús gochhie le'ake:
—To bene rpise yetaxhtilha lo tozi yen le'an ne'adia, le' yode'e ne'adia lona'a ka bene. 24Xhi'in bene bguio' rhala gaka kie' kan, ka' zoa lo guichi ga' chhia Xhtidza Diozo; te ¡xhle'ankse bene yode'e le'! Wenkalha goka kie' cha labi golhaje.
25Na'arhe Judas, bene yode'e Jesús lona'a ka bene, gnabene le':
—Muestro, ¿a ne'adia gonha kan?
—Loe' chi gne'alho kan —bochhi Jesús.
26Tzalaka rhagoke, Jesús gde'ale yetaxhtilha te, de bde xhle'an Diozo, bxhoxhaje te bde kika bene lachhile'anke le', na gne':
—Lesi te legago, ten naka kuerpo kia'.
27Dena'a gxhenhe kopa te de bde xhle'an Diozo, bde kie'ake, na gne':
—Leguia'aj yogolhe kopa ni, 28Le'a ten naka rhen kia', ten naka regle kobi, rhen ni glalhaja nia' kika bene kinda yedzoexhen dolaxhkia' ki yogoka bene. 29Te rhapa lén labirhe guia'aja xisa bedzolhi ni, xhchhinrhe dza kati guia'aja le'an lén xisa bedzolhi kobi lo yelarne'abe'a ki Xoza.
Jesús gne' Pedro labi skie'abe chen nonbe' le'
(Mc 14.26-31; Lc 22.31-34; Jn 13.36-38)
30De bile salmos, beza'ake lo guixi xhen rhelawe Olivos. 31Te Jesús gochhie le'ake:
—Yogolhe lén nan dze gsanle tan rheajelhe ye'a ne'adia. Kan rne'a lo Xhtidza Diozo: Gotia' bene ryoe bekoxhilha, te yeyasidzaga ka bekoxhilha. 32Te kati yeyasayebanha, yotobika lén lo yechhi Galilea.
33Pedro gochhie le':
—Zakalha yogoke birhe tzeajkene ye'a loe', ne'adia labi.
34Jesús gochhie le':
—Talite'a nan dzezi, kati zikoechhilha yajdrozi, tzona niaa sne'alho labi nonbe'alho ne'adia. 35Pedro gne':
—Zakalha gatia le'an loe', labibata snia labi nonbea loe'.
Te yogoka bene lachhile'anke le' kanteka rne'ake.
Jesús rledze Diozo Getsemaní
(Mc 14.32-42; Lc 22.39-46)
36Dena'a Jesús guiaje le'an ka bene lachhile'anke le' lo to lataj rhelawe Getsemaní, te gochhie le'ake:
—Ni lekoe, latzaka ne'adia tza'a zajledza Diozo.
37Te gche Pedro kan rhopa ka xhi'in Zebedeo, te gzolhoe rhaka ye'achie. 38Gochhie le'ake:
—Rhaka ye'achigaza tan gatia. Leyega'an lén ni, te lesnazi le'an ne'adia.
39Na Jesús gze yele'atido, na bze'achoe xhibe blapete xhgue'e lo yo', te bledze Diozo, te rne':
—Xoza, chen waka, bsla' ne'adia lo yelargui'irzaka: te labi gaka ka' rhe'anda ne'adia, le'a ka' rhe'anlo loe'.
40Na'arhe beyiaje ga' dzaka bene lachhile'anke le' te beyalene le'ake rhasike. Gochhie Pedro:
—Ni tochi'i labi bzoelhe snasle le'an ne'adia? 41Lesnazi kan legledza Diozo kinda ka' xhinajelhe gonle tamalha. Lén rhe'anhelhe gonle ta wen, le'an labi nalha yikiajlolhe. 42Ta grope niaa guiaje, te bledze Diozo kni:
—Xoza, chen labi se'akie tezi kan taze'adi zoa tea', na gaka konka rhe'anlo loe'.
43Kati beyiaje, beyalene bene lachhile'anke le' rhasike, le'a rdzodi guiajza loke tan rhaka chigasike. 44Boka'anhe le'ake te guiaje yajledze Diozo ta gyone niaa, lagazi ka' chigne' rhene'. 45Na'arhe beyiaje ga' dzaka bene lachhile'anke le' te gochhie le'ake:
—¿Anerhasilhe a ne rhezilachhilhe? Chibchhin tiembo Xhi'in bene bguio' yodeke le' lona'aka bene malha. 46¡Lechasa, ledia'; na za bene yode'e ne'adia!
Gxhenke Jesús
(Mc 14.43-50; Lc 22.47-53; Jn 18.2-11)
47Ne ze'a Jesús rtzalaje, kati Judas, to de bene tzachhino lachhile'anke le', bchhin le'anhe bene zen noake macheti le'an yaga. Bene gsela xan ka bxozi le'an ka bene waka ki yechhi na. 48Judas, bene bode'e Jesús bsnisiene ka bene nonaka gonhe kinda gakabe'a nono bene nake Jesús, na rhe' le'ake:
—Bene gawane bchhido, bene nanha Jesús; ¡Lesenhe!
49Na kan, yiajse gago ga' ze'a Jesús, gne':
—¡Azoalho, muestro!
Te gdawe bchhido le'. 50Te Jesús bochhie':
—Migo, be'an prondozi tan rhe'anlo gonlo.
Na'arhe bene yebalake, gxhenke Jesús na be'agake le'
51De ten, to de bene lachhile'anke Jesús gleaje to macheti te gchogoe naga bene we'anchhin ki bxozi. 52Jesús gochhie le':
—Bego'o macheti kio' lo xhe. Le'a yogoka bene rhotike bene le'an macheti, le'aksi le'an le'a yotike le'ake. 53¿Abinezelho waka snaba lo Xoza, te le' sele nantekalaka tzachhino angle rheajke lo dila? 54Te na'arhe ¿nonaka gaka kumplirhe lo xhtidza Diozo tan rne'ake ten gaka kan?
55Dena'a Jesús gnabene ka bene:
—¿Nobixhkia' bla'agalhe lén noalhe macheti kan yaga kinda senle ne'adia, arhonle koenda naka to gban? Yogo dza chigzea bse'adieda lén lo yo'o sdo'o le'an labibata gxhenle ne'adia. 56Na yogote'a ten rhaka kinda gaka kumplirhe tan gne'a ka bene btzalajke laza Diozo ka' rne'a lo Xhtidza Diozo.
Tina'ateka, yogoka bene lachhile'anke Jesús bsan na'ake le' te boxhonajke.
Jesús ze'e ga' rhoka'anke regle
(Mc 14.53-65; Lc 22.54-55,63-71; Jn 18.12-14,19-24)
57Ka bene gxhenke Jesús beche'ake le' lo yo'o ki Caifás, bxozi yajlo, ga' nadobika ka muestro ki xhba'a le'an ka bene waka. 58Pedro gdoe le' dezitolha bchhinte'a lo yo'o ki bxozi, guioe' te grie le'an ka bene ryornake lo yo'o sdo'o, kinda sle'ene naka yochhi tan rhaka,
59Xanka bxozi le'an ka yogote'a bene ga' rhonke regle rheguilhajke nakalha gdekene kinda gotike Jesús, 60Te labi beyalekene, za'akalha tixe ye'a rne'aka bene kinda gdekene xhkia' chola. Tayelhalhe bchhinka chopa bene 61Rne'ake:
—Bene gne': "Ne'adia waka skinaja yo'o sdo'o ki Diozo te yelisaka non tzona dza". 62Na'arhe bxozi yajlo guiase te gnabene Jesús:
¿Labigsla bi rhochhilho? ¿Nobi rne'ake rdekene loe'? 63Te Jesús kon gze balanzi. Bxozi gochhie le':
—¡Lo Diozo ban rhapa loe' sne'alho tali! ¡Gne'a chen loe' nakalho bene nasela Diozo, Xhi'in Diozo!
64Jesús bochhie':
—Kanksi ka' chigne'alho. Le'aksikan ne'adia rhapa lén sle'elhe Xhi'in bene bguio' rhie tzala'a lhi' kuita Diozo nape sdote'a yelarne'abe'a, kan sle'elhe zeze'e lo beaj xhan yeba'. 65Na'arhe xan ka bxozi gcheze xhe'e kinda gakabe'a labi rhajxenhenhe te gne':
—¡Xhtidza bene ni naka to tarne'azie' lo Diozo! ¿Labirhe rkinherha mazirhe no' bisne'a? Chi benhelhe didza zi' na rtzalaje. 66¿Nonaka rhe'akielhe?
Le'ake bochhike:
Nape dola' te rhala gatie'.
67Na bdake xhenhe lawe na bgagodza'ake le'. Yebalake rhoeke xague 68te rne'ake:
—Loe', nakalho bene nasela Diozo, ¡Belikalho nono gdapa loe'!
Pedro labi rkie'abe nonbe' Jesús
(Mc 14.66-72; Lc 22.56-62; Jn 18.15-18,25-27)
69Latzaka rhaka yogote'a ten, Pedro grie lalealha, rhoa' yo'o. De ten yiajse'a to nigolha rhonhe chhin te gochhie le':
Le'aksikan loe' glachhile'anlo Jesús, bene Galilea.
70Na Pedro labi bkie'abe loka bene zen
—Labi nezeda nobi rne'alho.
71Na'arhe beyiaje rhoa portalha, na to nigolha we'anchhin ble'ene le', te gochhie bene yebalake:
—Bene ni glachhie' le'an Jesús, bene Nazaret.
72Ta yobilha bibkie'abi Pedro nonbe' Jesús:
—Labi nonbe'a bene na!
73Goka tochi'i ka bene dzake na guiajke ga' ze'a Pedro na rhe'ake le':
Tabalha le'anksi loe' rhonlo tozi le'an Jesús. De ka' rtzalajlho rhakabe'a. 74Na'arhe Pedro gne' rhopa yona niaa:
—¡Labi nonbe'a bene na!
Tina'agsizi grechhi to yajdrozi, 75te Pedro yajnene ka' gochhi Jesús le': Zia'alha kati zi koechhi yajdrozi, tzona niaa sne'alho labi nonbe'alho ne'adia. Te berhoaj Pedro, na grechhi ye'achi.
Currently Selected:
San Mateo 26: XDZPY
Highlight
Share
Copy
Want to have your highlights saved across all your devices? Sign up or sign in
Porciones en Zapoteco de Yalahui, Oaxaca, México © Sociedad Bíblica de México, A.C.
