San Mateo 28

Jesús beyasabebanhe

(Mc 16.1-8; Lc 24.1-12; Jn 20.1-10)

1Gde dza sabdo dza rhezilachhike, kati rzolho dza nerho ki xhman, María Magdalena kan María yetoe' guiajke yajyoke lo ye'arhoba. 2Kazoazi gde to bedoxho'o; le'a to angle ki Diozo betaje xhan yeba', bchhinhe'e lo ye'arhoba, na gde'ale guiaj nabaga rhoa ye'arhoba te grie lawe. 3Angle na rze'anigaze ka' to yesa, te xhe'e rna xhnolhagazi ka' naka begui. 4Nan ble'ekene le', bene rheajke lo dila rzizake tan rdzebike te bega'anke no natike. 5Angle na gochhie ka nigolha na:

—Bisdzebilhe. Nezeda rheguilhajlhe Jesús, bene bdake lo yaga krozo. 6Labi yoe' ni, chibeyasabebanhe, ka' gochhie lén. Ledeyokalhe lataj ga' gxoake le'. 7Letzeajstika te leye'a ka bene glachhile'anke le': Chibeyasabebanhe, te zeaje Galilea kinda yotobe le'ake tayobilha; na' sle'elhene. Le'a rhala yapa lén.

Jesús yajtzague ka nigolha

8Ka nigolha na berhoajke rholane lo ye'arhoba, rdzebike le'an tza rhebekekene, na beza'ake rholane yajtixaje'ekene ka bene glachhile'anke le'. 9Tina'ateka, Jesús yajtzague ka nigolha te gochhie le'ake adza'alhe. Ka nigolha ni guiajke kuita Jesús te be'anke xhen le', rnidake nie'e, 10te le' rhe le'ake:

—Bisdzebilhe. Lezajechhi ka bene bichia' kinda tzeajke Galilea, te na yedzagake ne'adia.

Ka bene rheajke lo dila gxhike laxhaj kinda bigslano kixaje'ekene tan beyasabeban Jesús

11Tzalaka zeajka nigolha na, bala ka bene rheajke lo dila nadolake ryoke ye'arhoba na beyiajke lo yechhi te gdixaje'ekene ka xanka bxozi yogote'a tan goka. 12Ka bene yajlo ni guiajke yajtzalajke le'an ka bene waka, kinda be'ake didza nakalha gonke ka' gochhika bene rheajke lo dila le'ake. Te bdeke domi xhengolha kika bene rheajke lo dila, 13te gochhike le'ake

—Lén sne'alhe rhe'alhalha, tzalaka rhasilhe, bene glachhile'anke Jesús bidake te glanke kuerpo na. 14Na chen snisie gobiarne ten, ne'ato guioto nakalha ye'atonhe, te bigslabi gonkene lén.

15Ka bene rheajke lo dila gxhike domi na te be'anke ka' gochhike le'ake. Ten ne rguixaje'ekene ka bene judíos lo dza nan dza.

Jesús gsele ka bene lachhile'anke le' zajtixaje'eke xhtidze doxhen lichhileyo'

16Kan xha, ka bene chineaj glachhile'anke le' zeajke Galilea, lo guia' ga' gochhi Jesús le'ake. 17Te kati ble'ekene Jesús, be'anke xhen le', zakalha balake labi rheajkene ye'a chen le' na. 18Jesús guiaje ga' ze'ake te gochhie le'ake:

—Diozo chibe'ane kia' sdote'a yelarne'abe'a tan dia yeba' kan lo lichhileyo' ni. 19Letzeaj chen, sdo xhen lichhileyo', te leye'ake goke ne'adia: leyosiloke lo Xoza, lo Xhi'inhe kan lo Be'egrasia ki Diozo, 20Te legse'adiekene kinda gonke yogote'a tan chi gochhia lén. Te laza ne'adia, ne'adia sea le'an lén yogo dza, xhchhinte'a dza yelhalhe.

Currently Selected:

San Mateo 28: XDZPY

Highlight

Copy