Zacarias 12
12
Ja Dyosi, oj sch'ay sna'jel ja kontra jumasa b'a Jerusaleni
1Ja Dyosi, yala kab' ja lo'il it b'a oj kal yab' ja israelenio jumasa:
—Ke'n ja Dyos it jel ja kipi.
K'en jk'u'lan ja satk'inali
sok ke'n ka sta' lek yip ja lu'umi.
Ke'n ka'a sak'anil
b'a spetsanil ja kristyano jumasa.
2-3—Jaxa niwak chonab' jumasa b'a mojan ay wa sk'ana oj snol k'ab'uke ja swinkil ja Jerusalen sok ja swinkil ja chonab' jumasa sb'a Juda, ke'n mismo oj jom s'olome. Ja jas chapan yujile oj sk'u'luke'i, mini jun sb'eja, jaxa jchonab'il jumasa oj spensara'uke yuj yakb'ele.
—Yaj nix k'ot ja k'ak'u jawi, spetsanil ja niwak chonab' jumasa oj stsom sb'aje b'a oj sch'ak'e sna'jel ja swinkil ja Jerusaleni. Jaxa swinkil ja Jerusaleni ke'n oj ka sk'u'l sb'aje jastal jun niwan ton; —Spetsanil ja ma' oj sk'an oj sniki ti oj pach' juke kan yuj ja—
4—Ke'n oj talna ja chonab'il sb'a Juda, ja'yuj ja k'ak'u jawi, spetsanil ja skawu'e jumasa ja niwak chonab' jumasa oj ch'a tupuk ja sate'i sok jel oj ka xiwuk ja ma'tik wax k'eye'i. 5Yaj nix yilawe ja ma'tik mas niwak ja ya'tel b'a Juda ja jastal iti, ti oj yal'e'a pero jun k'ujol lek: Kechan ye'n altiro ja Dyos it jel ja yipi, ye'n ni jDyostik ja janek' ti' aytik b'a Jerusaleni. Ja Dyostiki, ye'nani mero kiptika—
6-7—Ja k'ak'u jawi, oj ka pax k'ak'il ja ma'tik mas niwak ja ya'tel b'a Juda, sok ja k'ak' jawi, oj ch'ak jtsik spetsanil ja swinkil ja niwak chonab' jumasa b'a mojan yi'oj sb'aji, jaxa swinkil ja chonab' Jerusaleni mi jas oj ek' sb'aj altiro oj kolta ja ma'tik tey b'a Juda, jel oj makunuke jastal ja smoj alijel jumasa ja Davidi, cho jach'ni jastal ja swinkil ja chonab' Jerusaleni. Mok ma' tuk ek sk'ujol.
8-9Ja ke'n chapan ayon b'a oj ch'ak sna'jel chikan jas niwan chonab'il, ja ma' wa sk'ana ch'ay sna'jel ja Jerusaleni. Jachuk oj ni talna lek ja swinkil ja chonab' jawa, ja k'ak'u jaw ja ma'tik ko'el altiro jel niwan oj wajuke jastal ja Davidi; Mi kechanuka, ja yintil jumasa ja Davidi, oj kumxuk b'a ye'n oj sk'u'luke mandar komo yuj jun yanjel Dyos jak aljuk yabye yuj.
10—Ke'n oj ka sk'umuke ja Dyos ja yintil jumasa ja Davidi sok jel oj ka och spensare ja yaj ni oj yil'e ay ma' oj ek' k'utsjuk yuj ja machiti. Cho oj ni ka ok'uke ja swinkil jumasa ja Jerusaleni. Sok jel niwan ja scham k'ujole'i, oj ok'uke jastal wax cham ja uniko yuntikile'i. 11Ja k'ak'u jawi, jel oj ok'uke b'a Jerusaleni, jach' jastal ok'ye ja yaj ni wax cham ja dyos Hadad-rimon b'a job'iltik b'a Meguido. 12-14Spetsanil ja swinkil ja niwak chonab' jumasa jel cham k'ujol oj ayuke, b'a kada na'its pilan pilan oj ok'uke. Ixuk sok winik oj ok'uk cho jach'ni ja yintil jumasa ja Davidi, ja Natani, ja Levi sok ja Simi, sok jach'ni spetsanil ja tuk smoje jumasa.
Currently Selected:
Zacarias 12: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
