Zacarias 11
11
1—Wits Libano,
—a'yi sb'ej ja k'ak'i,
yuj oj ch'ak stsik ja wa segro jumasa—
2Ja we'nlex taj jumasa,
—Ok'anik yuj ja niwak te' jumasa jawi—
—Ja niwak segro jumasa naka k'utsub'ale—
Jach'ni ja we'nlex yaxte' jumasa b'a Basani,
—Ok'anik yuj ja niwak te' jumasa jawi
yuj ja ch'ayta sna'jele'i.
3Ja talna chej jumasa mix ch'ajb'ajiye ok'el,
yuj ja ch'ak k'ak' ja yaxal job' jumasa;
ja choj jumasa tajkel lek wax awaniye,
yuj ja paxkan takin lu'um k'inalil ja b'a
lajan lugar jumasa b'a niwan ja' Jordani—.
Ja chab' talna cheji
4Ja Dyos it jel ja yipi, jach' yala kab' jastal iti:
—Ka'ax kax talna ja chej jumasa it oj i'juke b'a wax milxi ja chante'i. 5Ja ma wa smana mini t'un wa stalna slastima'il ja wa smila'a; jaxa ma'tik wa schonowe'i, ti wax yalawe'a —Sts'akatal ja Dyosi riko'onxa;— asta mini ja mismo talnumane'i, mi stalnaye slastima'il.
6—Jach' mismo oj cho jk'u'luk ja ke'n: —Mi oj talna slastima'il ja swinkil jumasa ja niwan chonab' iti— Oj ka' libre a k'u'lajuk yi'e yuj ja jas wa sk'ana oj sk'u'luk ja swinkil ja niwak chonab' jumasa b'a mojan yi'oje'i, cho jach'ni sok ja smandaranume ma' wax k'u'lajiye yuj mandari. A'nima ch'ayta sna'jel ja slu'ume'i, ja ke'n mi oj waj koltaye. Ke'non ja Dyos it jel ja kipi, ja jas wax kala yujni jach' oj k'u'l merana—.
7Ja'yuj ke'n talna ja chej jumasa it wajume'xa b'a oj miljuke ajyi', sok ja mas talna ja chej jumasa b'a mas yokeli. Ay ki'oj chab' jnajb'ante' yujni ja schol b'a talnuj cheja; june ka sb'i'iluk —Slekil k'ujolal—, jaxa juni ka sb'i'iluk —Tsoman—. 8Mi sk'anawone ja talna chej jumasa, cho jach'ni ja ke'n mix choj k'anawe, ja'yuj b'a jun ixaw ka jijluk oxe. 9Ti kal yab' ja chej jumasa: —Mixax k'ana ke'n oj talnayex. Mi kocheluk ta cham yex ma la miljiyex. Cho mi kocheluk ta we'n ita xa k'uxtala'an ab'ajex—
10Tsa'an, ti ki'aj ja najb'ante' sb'i'il —Slekil k'ujolali—, jk'oko'ele. Sok ja jawi, ti ka jak sk'ujole ja ma'tik tey tiwi, yuj ja sch'aka ja strato ja Dyos sok spetsanil ja swinkil ja niwak chonab' jumasa. 11Jaxa ma'tik yujni ja schol smanjel schonjel ja chej jumasa, yaj ni yilawe jas jk'u'lani, sna'awe sb'ej ja lo'il jawi, yuj ye'n wa'n aljel yabye yuj ja Dyos ja it ma' wa'non ya'teltajel ja ke'n, jaxa chej jumasa ja wa slaja ja kristyano jumasa.
12Tsa'an, ti kal yab' ja b'olmalanum jumasa: —Waxa k'ana oj ja wa'ex ki ja jts'akoli. Kechan ta yuj mixa k'ana oj ja tup'onex, mok a tup'onex—. Ja'yuj ya'we ki jun tajb'e sok lajune sat tak'in toj sakal tak'in.
13Ti yala kab' ja Dyosi: —Jun tajb'e sok lajune sat toj sakal tak'in jel ko'el yuj spetsanil ja jas lek naka jk'u'lunej yi ja jchonab'ili. I'aj ja sat tak'in jumasa jawi, tix waj ja ts'a' kan b'a skajonil ja limosna jumasa—
Ja'yuj ti ki'aj ja sat tak'in jumasa jawi, jk'u'an jastal yala kab' ja Dyos oj k'u'luki. 14Tsa'an yuj ja jawi, ti cho jk'oko ja otro najb'ante' sb'i'il —Tsomomani—, Jach' ch'ak jastal jaw ja jastal jel lek wax yila sb'aje ajyi ja israelenio sok ja swinkil Juda.
Ja ma' mi lek stalna ja cheji
15Ja Dyosi, cho yala kab' ja otro lo'il iti:
—Ja talna chej jumasa ma' mix cham sk'ujole yuj ja chej jumasa we'n oj kanan b'a slok'ole. 16—Porke ja b'a niwan chonab' iti, oj ka och jun mandaranum mini t'un oj cham sk'ujol yuj ja kristyano jumasa'a. Jach' jastal jun talna chej mi sna'a jastal stalnajel ja cheji: mix cham sk'ujol ja kwando wa spila sb'aj ja chej jumasa, sok mix waj sle ja ch'ayel chej jumasa, cho mix yajna ja chej jumasa b'a yajb'eli, mix ya'yi swa'el ja chej jumasa b'a wa'inx yab'i. Ja mandaranum jawi, kechan ja wa spensaran ja riko jumasa sok ja ma'tik jel niwak wax ilji b'a oj a'ji wa' yuji.
17—Jel wokol oj ek' yuj ja talna chej jaw it mix makuni,
b'a oj talna ja chej jumasa—
—Ja lek sok jun machit
oj k'uts juk yi junuk ja sk'ab'i,
ja lek sok jun kuchilo
oj a'ji' elyi schab'il ja sati—.
Currently Selected:
Zacarias 11: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
