Numeros 9
9
Ja k'in b'a sya'al k'inali
1Ek' jun jab'il elel ja israelenio jumasa b'a Egipto ja k'umaji ja Moises yuj ja Dyos b'a wits Sinai. Ti yala ja Dyosi: 2-3—Ja israelenio jumasa, t'ilan ja oj sk'u'luke ja k'in b'a sya'al k'inal b'a och k'ak'u chan lajune (14) yajtab' ja yixawil Abib, jach'ni jastal je'a a wi'i.
4Ja Moisesi, yal yab' ja israelenio jumasa a sk'u'luke ja k'in b'a sya'al k'inali. 5Jaxa ye'nle'i, ti sk'u'lane ja k'in jaw b'a wits Sinai b'a och k'ak'u chan lajune yajtab' ja ixawi, jach'ni sk'u'lane jastalni alji yab' ja Moises yuj ja Dyosi.
6Jasa, ay ma' mi tojuk ay ja k'ak'u jawi, ay ma syamunej sb'ak'tel cham winik, jaxa jas wax yala b'a ts'ijb'anub'ali mi sb'ejuk oj waj b'a k'in ja ma jach' ay jastal jawi. Ja'yuj ti waj sk'umuke ja Moises sok ja Aaroni. 7Ti yalwe yab'a:
—Ja ke'ntikoni, jyamunejtikon sb'ak'tel cham winik, ja'yuj wax k'ana oj job'tikon oj ma b'ob' ka'tikon yi ja smajtan ja Dyos jastal ja tuk jmojtikoni.
8Ti yala ja Moisesi:
—Majlayonik T'usan. Oj job' yi ja Dyos jas oj ja k'u'lukex.
9Jaxa Dyosi, ti yal yab' ja Moisesi:
10—Ala yab' ja israelenio jumasa spetsanile t'ilan oj sk'u'luke ja k'in b'a sya'al k'inali. Ay k'a ma syamunej jun cham winik ma yuj b'ej aye, 11-12t'ilan oj sk'u'luk ja k'in it b'a och k'ak'u chan lajune (14) yajtab' ja yixawil Ziv. Jach' oj sk'u'luke jastal iti: Oj sk'ux e' ja cheji, sok k'ajal k'ul, sok waj b'a mey slevadura'il. Ja cheji mini xe'n sb'akel oj kanuka, mi jas oj kan nolan ja sb'a k'ak'u jecheli.
13—Jaxa ma mini jun sb'ej ja mi oj sk'u'luk ja k'in jawi, sok mi oj ya'yi ja smajtan ja Dyos ja k'ak'u jawi, ojni a'ji stupa. Mok lom ajyuk amokex ch'ayawik sna'jel.
14Ta ay k'a ma' tuk chonab' jakel tey a mokexa cho jach'ni ja ye'nle'i oj cho sk'u'luke ja k'in jawi, jach'ni jastal alub'al a wabyex ja we'nlexi. Ja ab'al jawi. Oj makunuk b'a spetsanil ja kristyano jumasa—.
Ja Dyosi, sje'ayi ja b'a oj wajuk ja yuntikili
15Ja k'ak'u ch'ak tojb'uk ja snajtsil tsomjel b'a wax nolxi ja skajonil strato ja Dyosi, jak jun t'one ason jak smus ele. Yajni och ja a'kwali, ti sje'a sb'aj jun k'ak' ja b'a snajtsil tsomjeli, yajni sakb'i cho ch'ay ele. 16Spetsanil k'ak'u jach' wax ek'i: B'a sat k'ak'u jun t'one ason wax musji el yuj jaxa b'a a'kwali jun k'ak' ti wax ajli'a.
17-23Ye'n wax yala ja Dyos ja oj b'ejyuke ja israelenio jumasa, sok ye'n wax yala jas oj jijluke. Jach' wa sk'u'lan jastal iti: Yajni wax k'e ja asoni wa snika sb'aj, ja'ni wa snochwe ja israelenio jumasa'a; yajni wax k'ot tek'an ja asoni, jach'ni ja israelenio wax cho k'otye tek'an. Ti wa stojb'ese tiw ja snaje'i, spetsanil ja k'ak'u jumasa janek' ti wax ajyi ja ason b'a snajtsil tsomjeli, jach'ni ja kristyano jumasa ti wax ajyiye tiwi.
Ayni kechan jun a'kwal wax tejk'aji'a; sok ayni chab' oxe k'ak'u'a, ayni jun ixawa, cho ayni wax alb'i jun jab'ila. Yajni wax alb'i ja asoni, jaxa israelenio ja'ni wa sk'u'ane'a, mi ma snika sb'aj yujile. Chikan jas k'ak'u oj snik sb'aj, a'nima a'kwaluk ma sat k'ak'u, yujni ja oj snoch e' ja israelenio'a, yajni wa snika sb'aj ja asoni, jaxa kristyano jumasa ja'ni wa snochowe'a; yajni wax k'ot tek'ani, jach'ni ja kristyano jumasa wax cho k'otye tek'an, wax wajye kulto.
Ja Dyosi, jach' yal yab' jastal it ja Moisesi, jaxa kristyano jumasa sk'u'ane'ni'a.
Currently Selected:
Numeros 9: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
