Numeros 10
10
Ja korneta jumasa toj sakal tak'in
1Ja Dyosi, yal yab' ja Moisesi:
2-8—Yama jun martiyo tojb'es chab' korneta b'a toj sakal tak'in, kechan ye'n oj b'ob' sju'e ja pagre jumasa yintil ja Aaroni. Ala yabye ja kristyano jumasa yuj ke'n jach' wa'non yaljel a wab' jastal iti: Yajnix yawe ok'uk ja skorneta'e ja pagre jumasa, spetsanil ja kristyano jumasa oj stsom sb'aje a mok b'a wax ajyi ochel b'a snajtsil tsomjeli. Kechan k'a jun majke ok'i, yuj ja' oj stsom sb'aj a mok ja ma'tik niwak ya'tel b'a jujun k'ole'i.
—Ja yok'el ja korneta jumasa, ja oj makunuk a wujilex sok ja kristyano ja yajni ojxa b'ejyaniki. Yuj k'a chab' korneta ok'i cho smoj sb'aj sok jitsan awanel yuj ja wa sk'ana yal oj b'ejyuk spetsanil ja ma' tey b'a stojol wax jak ja k'ak'u yuj ja na'its jumasa tojb'el sok k'u'utsi. Yajni oj cho ok' pilan majke, yuj ja oj b'ejyuke ja ma'tik ti' aye b'a ko'el k'inal yuj ja na'its jumasa tojb'el sok k'u'utsi. Ja iti, yujni jach' oj ja k'u'ukex spetsanil k'ak'u'a.
9—Jaxa yajni ay jun tiro'anel sok t'ilan oj wajanik ja we'nlexi, a'wik ok'uk ja korneta jumasa cho awananik tsats lek. Jaxa ke'n yuj ja ke'n a Dyosonexi, ti oj na'ex leka, oj cho jkoltayex b'a sk'ab' ja ma'tik mi lek wax yilawexi.
10—Cho awik ok'uk ja korneta ja sk'ak'u'il k'ini, ja yajnix k'e' ja ixawi, cho jach'ni ja yajni oj ja wa'wex ki' ja jmajtan jumasa. Yajni oj ja k'u'lukexi, ti oj na'ex leka—.
Ja israelenio elye b'a wits Sinai
11Ja ason it smusan yuj ja snajtsil tsomjel ja b'a'y ja skajonil strato ja Dyosi, stulu sb'aj b'a yajtab' jun tajb'e (20) yajtab' ja ixaw Ziv, b'a schab'il jab'ili. 12-13Ja k'ak'u jawi, jach'ni b'ob' ja jastal yaloj yab' ja Moises ja Dyosi, ja israelenio jumasa stulu sb'aje snochowe ja ason man b'a wits Sinai, masan k'otye b'a wits Paran.
14-27B'a jujun k'ole ja israelenio jumasa, ja' wajye sok ja ma' niwan ya'tel yujile'i, jach' b'ejyiye jastal iti:
Ja k'ole b'a Juda, ja wajye sok ja Nahasoni;
ja k'ole b'a Isacari, ja wajye sok ja Natanaeli;
ja k'ole b'a Zabuloni, ja wajye sok ja Eliabi;
ja k'ole b'a Rubeni, ja wajye sok ja Elisuri;
ja k'ole b'a Simeoni, ja wajye sok ja Selumieli;
ja k'ole b'a Gadi, ja wajye sok ja Eliasafi;
ja k'ole b'a Efraini, ja wajye sok ja Elisama;
ja k'ole b'a Manases, ja wajye sok ja Gamalieli;
ja k'ole b'a Benjamini, ja wajye sok ja Guidoni;
ja k'ole b'a Dani, ja wajye sok ja Ahiezeri;
ja k'ole b'a Aseri, ja wajye sok ja Paguieli;
ja k'ole b'a Neftali, ja wajye sok ja Ahira.
Ja b'a k'ole b'a Zabulon sok b'a Rubeni, ti waj sok ja yintil jumasa sb'a Guerson sok ja Merari. Ye'n schol wa sjomowe sok wa skuchuwe ja sk'u'utsil ja snajtsil tsomjeli, yujni kechan ye'n wax b'ob' yujile ja a'tel jawa.
Ja b'a k'ole b'a Gad sok b'a Efraini, ti wajye soke ja yintil jumasa ja Quehati. Ye'n schol wax yi'aje spetsanil ja jas wax makuni b'a snajtsil tsomjeli. Yuj ja ye'n tsa'an jakume'i, yajni k'otye b'a oj jijluke'i, tojb'elxa ja snajtsil tsomjeli.
28Ja israelenio spetsanil k'ak'u jel t'ilan oj b'ejyuke jach' wa scholo sb'aje jastal iti.
Ja Moises sok ja Hobabi
29Ja Moisesi, ti yala yab' ja smoj alijel Hobab yunin ja Reuel sb'a Madiani:
—Ja ke'ntikoni, ti'xa oj wajkotikon b'a lu'um oj ya'ki'tikon ja Dyosi. La' jmoktikon. Jel lek oj kil'atikon, jach' jastal yalunej ja Dyos lek oj kil jb'ajtiki.
30Ti yala ja Hobabi:
—Miyuk, ts'akatal. Jel lek wax kab' ja oj kumxukon ja b'ay ja jmoj alijel jumasa.
31Ti cho yala ja Moisesi:
—Moka wa'wotikon kani. Ja we'n waxa na'a lek jastal ay ja yoj witsi, sok waxa na'a lek ja chonab' jumasa b'a oj jijlukotikoni. 32Ta yuj k'a oj jakan jmoktikoni, spetsanil ja jas oj ya'ki'tikon ja Dyosi, lajan oj k'ep jb'ajtik.
33Jach' elye ja kristyano jumasa b'a wits Sinai, b'ejyiye oxe k'ak'u. Snajtil ja k'ak'u jumasa jawi, ti kuchan yujile ja skajonil strato ja Dyosi, wa'ne sle'jel b'a oj jijluke'a. 34Ja sakb'el jumasa yajni ojxa och b'ejyuke'i, jaxa yason ja Dyosi, ti'xa wax jak nolan sb'aje'a, 35ti wax yala ja Moisesi:
—Dyos kuj, k'e'an—
—Ja ma'tik mi lek wax yilawa
xiwtaye a ch'ak spak e' ajnel—
—Ja ma jel wa staklaya
a eluke najat jmoktikon.
36Yajni wax jijli ja skajonil strato ja Dyosi, ti wax yala ja Moisesi:
—Dyos kuj,
mok a pil a b'aj sok ja israelenio,
ja wa wuntikili, jel jitsan—
Currently Selected:
Numeros 10: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
