Numeros 8
8
Ja kandelerio toj k'anal tak'ini
1Ja Dyosi, yal yab' ja Moisesi: 2-3—Ala yab' ja Aaroni, ja yajni oj ya ajluk ja juke ajlub'i, tix ya' kajan b'a sat ja mesa jumasa, b'a oj sje' ja yijlab' b'a stij sati—.
Jaxa Aaroni, jach'ni sk'u'lan ja jastal alji yab' ja Moises yuj ja Dyosi. 4Ja kandelerio toj k'anal takin. Man s'olom sok man yib'el, lajan sok jastal jun yal nichim, sok martiyo tojb'esji sok. Yuj ja jach'ni alub'al yab' ja Moises yuj ja Dyosi.
Tsa'ji ja yintil jumasa ja Levi
5Ti'xta'a, ja Dyosi, yal yab' ja Moisesi:
6—Pila ja yintil jumasa ja Levi, sak'awe lek. 7Pek'a sb'aje ja', b'a ti oj na'xuk yujni sakxa aye'a, al yabye a sjox'e spetsanil ja stso'otsil ja sb'ak'tele'i, a schuk' e lek ja sk'u'e'i, b'a jach' sak oj ajyuke.
8—Tsa'an t'ilan oj yi'e jun wakax sok chok'b'el arina wots'an sok aceite. Jach' oj yi'e och jastal it ja smajtan sat te' ja Dyosi, ti oj sta' sb'aj sok ja wakax it wax tsikxi b'a oj sch'ay ja mulal jumasa.
9—Tsa'an tixa wala yabye ja yintil jumasa ja Levi, sok ja chab' oxe israelenio a ochuke jan mojan sok ja snajtsil tsomjeli. 10-18Ti oj ajyuke tiw ja Aaron sok ja yintil jumasa, yuj ja ye'n ay schole yuj ja kristyano jumasa, jaxa Aaroni jach' oj spil jastal it ja ma' oj a'tijuk jmoki:
—Ja israelenio jumasa, oj ya'we kajan ja skab'e b'a s'olom ja yintil jumasa ja Levi, tsa'an ja ye'nle'i, ti' oj ya'we kajan ja sk'ab'e b'a s'olom ja chab' wakaxi. June ja wakax jawi, oj tsik yuj ja mulali, jaxa juni ja oj tsik yuj ja b'aj jtoyjel ke'n. Jach' oj cho a pil ja yintil jumasa ja Levi, sok ja iti chapanxa wax kanye b'a oj a'tijuke b'a snajtsil tsomjeli.
—Ja k'ole jumasa sb'a Levi, naka jb'aje ke'na, yuj ja ye'n oj ya'we ki ja israelenio jumasa, b'a slok'ol ja sb'ajtanil yuntikile jumasa. Ja k'ak'u ch'ak jmil ja sb'ajtanil yuntikil ja egipsiano jumasa, cho kala spetsanil ja sb'ajtanil yuntikil ja israelenio naka jb'aj ke'na, cho jach'ni ja sb'ajtanil yuntikil ja schanste'e'i. B'a slok'olan jan spetsanil ja ye'nle'i, ja ki'aj lek ja yintil jumasa ja Levi.
—Ja'yuj pilaki ja yintil jumasa ja Levi, b'a yojol ja tuk israelenio jumasa, b'a ti' oj ajyuke spetsanil k'ak'u b'a ka'teli.
19—Ja yintil jumasa ja Levi, ke'n wax ka'kan b'a sk'ab' ja Aaron sok ja yuntikil jumasa, lajan sok jastal jun jmajtan yujile ja israelenio jumasa b'a ti' oj makunuk b'a snajtsil tsomjel. Ye'n oj ya'we ki ja jmajtan oj ya'we ja israelenio b'a oj ch'ay ja smule jumasa. B'a jach' mi jas mi sb'ejuk oj ek' yuj ja ma'tik oj och mojan sok ja snajtsil tsomjeli.
20-22Jaxa Moisesi, ja Aaron sok spetsanil ja israelenio jumasa, jach'ni sk'u'lane yi' ja yintil jumasa ja Levi spetsanil ja jastal yala ja Dyosi. Jaxa yintil jumasa ja Levi ch'ak sak' lek sb'aje schuk'uwe lek ja sk'u' swexe'i, tsa'an ye'n yi'aj och ja Aaron b'a sti' sat ja Dyos jastal majtanal. Tsa'an yuj ja jawi, ti'xa kan ya'teltaye ja Dyos b'a snajtsil tsomjeli, kechan, ye'nani wax yalawe ja Aaron sok ja yintil jumasa ja jas oj sk'u'luke'i.
23Ja Dyosi, ti cho yal yab' ja Moisesi:
24-26—Ja yuntikil ja Levi, oj b'ob' stul'e yi ja ya'tele b'a snajtsil tsomjel ja yajni ayxa yi'oje jun tajb'e jo'e jab'ili (25), yajnix k'otye ja chab' tajb'e sok lajune jab'ili (50), ti' oj jijluke'a. Man ja jab'il jumasa jaw yi'oje'i, oj b'ob' skoltane t'usan sok ja ya'tele b'a snajtsil tsomjel ja pagre jumasa ma' untikto, kechan mi oj b'ob' sk'u'luke tuk a'tel—.
Currently Selected:
Numeros 8: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
