Numeros 7
7
Ja limosna jumasa oj makunuk b'a snajtsil tsomjeli
1Ja Moisesi, yajni tojb'i yuj ja snajtsil tsomjeli, ti stsijun sb'aj aceite b'a jach' ti oj na'xuk ja' snajtsil tsomjeli, tsa'ub'al sok spetsanil ja jas tey b'a yojoli, yujni tsa'ub'al b'a oj makunuk b'a stoyjel ja Dyosi. 2Jaxa ma'tik niwak ja ya'tel yuj ja k'ole israelenio ma'tik koltaniye yajtab'ajel sok ya'jel och ju'un spetsanile'i, ya'we yi ja Dyos b'a smajtan ja it jumasa 3wake karreta sok lajchawe wakax. B'a jujune ja ma' niwan ja ya'teli, ya'awe jujune wakax, b'a cha'tike ja ye'nle'i, ya'awe jun karreta. Spetsanil ja iti, ti waj ya'we yi b'a snajtsil stsomjel ja Dyos b'a tsa'ub'ali.
4Jaxa Dyosi, ti yala yab' ja Moisesi: 5—I'aj kan ja karreta sok ja wakax jumasa, a'yi ye'nle ja yintil jumasa ja Levi. Ala yabye a ya'we makunuk ja b'a ya'tele b'a snajtsil tsomjel tsa'ub'ali, chikan jasunk'a oj sk'u'luk b'a jujune ja ye'nle'i.
6Jaxa Moisesi, yi'aj kan ja karreta sok ja wakax jumasa, ch'ak ya'yi ja yintil jumasa ja Levi, 7-8b'a a ya'we makunuk b'a oj sk'u'luk ja ya'tele'i. Ja ma'tik tey sok ja yuntikil ja Guersoni, ya'yi chab' karreta sok chane wakax, jaxa ma' tey sok ja yuntikil ja Merari, ya'yi chane karreta sok waxake wakax. Ja ma' niwan ja ya'tel yujile'i, ja Itamar yunin ja pagre Aaroni. 9Jaxa ma' tey sok ja yuntikil ja Quehati, mi jas ya'yi, yuj ja puru k'echub'al oj yi'e och ja jastik jumasa mi kwalkyera'uki.
10Ja k'ak'u a'xi b'a sk'ab' ja Dyos ja altari, ja ma'tik niwak ya'tel yuj ja k'ole jumasa, yi'aje jan ja smajtan jumasa ja Dyosi, ti ya'we kajan b'a sat altar. 11Ja'yuj ja Dyosi, ti yala yab' ja Moisesi: —B'a jujune k'ak'u a jak tuktukil ma niwan ya'tel b'a oj yi' jan ja majtanal oj jak ya'kan b'a altari—.
12-83Ja' majtanal jumasa it ja ya'we ja ma'tik niwak ya'tele yuj ja lajchaw k'ole yuj ja israelenio.
Xet'an sakal tak'in b'a jun kilo sok snalan ja yalali,
jun xalu (jarro) sakal tak'in, t'usan mey jun kilo ja yalali,
jun niwan lechub' k'anal tak'in, jun syen lajune gramos, b'ut'el pom,
jun yal wakax,
jun swaw chej,
jun chej b'a jun jab'il b'a oj tsikxuk spetsanil b'a stoyjel ja Dyosi,
jun chivo oj tsikxuk b'a jach' oj ch'ayjuk ja smule'i,
oj tsikxuk chab' wakax b'a smajtan b'a laman oj ajyukotik sok,
jo'e waw chej,
jo'e chivo sok
jo'e yal chej b'a jun jab'il.
Spetsanil ch'ak likxuk jach'ni jastal k'ajyel wax likxi b'a snajtsil tsomjeli. Ja xe'ntiyam sakal tak'in sok ja xalu (jarro), b'ut'el chok'b'el arina, wots'ob'al sok aceite, b'a oj chapxuk jun majtanal sok chok'b'el sat te'. Spetsanil ja majtanal jumasa iti, jach' ya'awe jastal it ja ma'tik niwak ya'tele'i:
| k'ak'u | Sk'ole | ja lok'olali |
|---|---|---|
| sb'ajtanil | ja sb'a Judai | Nahason ja stat ja Aminadabi |
| schab'il | ja sb'a Isacari | Natanael ja stat ja Suari |
| yoxil | ja sb'a Zabuloni | Eliab ja stat ja Heloni |
| schanil | ja sb'a Rubeni | Elisur ja stat ja Sedeuri |
| sjoil | ja sb'a Simeoni | Salumiel ja stat ja Surisadai |
| swakil | ja sb'a Gadi | Eliasaf ja stat ja Reueli |
| sjukil | ja sb'a Efraini | Elisama ja stat ja Amihudi |
| swaxakil | ja sb'a Manasesi | Gamaliel ja stat ja Pedasuri |
| sb'alunil | ja sb'a Benjamini | Abidan ja stat ja Guidoni |
| slajunil | ja sb'a Dani | Ahiezer ja stat ja Amisadai |
| sjulucheil | ja sb'a Aseri | Paguiel ja stat ja Ocrani |
| slajchawe'il | ja sb'a Neftali | Ahira ja stat ja Enani |
84-88Ja ma'tik niwak ya'tel yuj ja k'ole jumasa, ya'awe spetsanil ja majtanal jumasa yuj ja a'xi b'a oj makunuk yuj ja Dyos ja altari:
Lajchawe xet'an sakal tak'in, ay yi'oj jujune kilo ja jujune'i,
lajchawe xalu (jarro) sakal tak'in, b'a nalantik kilo yi'oj ja jujune'i sok
lajchawe lechub' k'anal tak'in, b'a jun syen gramos (100) ja jujune'i.
Spetsanil ja lajchawe xet'an sakal tak'in sok ja lajchawe xalu (jarro), ay jun tajb'e wake kilo sok snalan (26.5), jaxa lajchawe lechub' jun kilo sok oxe syen jun tajb'e gramos (320), ja'ni jastal k'ajyel wax likxi b'a snajtsil tsomjeli.
Spetsanil ja chante jumasa b'a ch'ak tsikxuk b'a jach' laman oj ajyuke sok ja Dyosi. Ay,
lajchawe wakax,
lajchawe waw chej sok
lajchawe ch'in chej b'a jun jab'il.
89Tsa'an yuj ja iti, ti'xa och ja Moises b'a snajtsil tsomjel b'a oj sk'umuk ja Dyosi. Ti ay tiwi, wajto yab'i, ti wa'n k'umal ja Dyos b'a sat smajkil ja skajonil ja strato sk'u'lunej ja Dyos ja b'ay ja chab' yanjel querubin#7:89 yanjel querubin: Ja querubini jach splanta jastal chante sok winik, jel tsatse sok wax talnaniye. ja Dyosi.
Currently Selected:
Numeros 7: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
