Numeros 6
6
Ja jas oj sk'uluk ja najtil tso'ots'il olom jumasa
1Ja Dyosi, sk'uman ja Moisesi, ti yal yab'a:
2—Ala yab' ja israelenio jumasa, ta yuj k'a ay jun winik ma jun ixuk najtil tso'otsil olom was k'ana oj stojb'es b'a mok. 3Mi oj b'ob' yu' pajal ya'lel ts'usub', mi oj b'ob' slo' sat ts'usub' sok mini b'a pajxa. 4Spetsanil ja k'ak'u janek' yaloj toj oj ajyuk b'a sti' sat ja Dyosi, mi oj b'ob' yab' ja sat ja ts'usub'i. 5Spetsanil ja k'ak'u jumasa jawi, mini oj cho b'ob' sk'uts ja stso'otsil s'olomi, ja jachuki wani sk'ana yal yuj kechan ke'n wax ya'teltayon.
6—Mi kechanuka, mi oj cho b'ob' och mojan sok jun cham winik, 7a'nima ja'uk ja snan stati, ma ja'uk ja smoj alijeli. Kechan ta yuj k'a jach' sk'u'lan ojni ch'ayuk ja yip ja jastal ja ma kechan ke'n wax ya'teltayona. 8Ja janek' oj alb'uk oj sk'u'luk ja jas yaluneji, t'ilan oj stalna sb'aj b'a toj oj ajyuk.
9—Ta ay k'a jun ch'ay k'ujol ay ma chami sok ti' k'a ay sok ja stso'otsil s'olom it tsa'ub'ali, mixa ni lekuka, b'a oj cho tojb'uki, a smajla oj ek' juke k'ak'u ti sjoxo el ja stso'otsil s'olomi. 10B'a swaxakil k'ak'u a yi' ochyi ja pagre chab' tortola sok chab' yal pumus b'a wax ajyi ochel b'a snajtsil tsomjeli.
11-12—B'a jach' oj ch'ayi ja smuli, yuj ja ke'n Dyoson yuj ja winik jawi, jaxa pagre oj sak' lek b'ajtan june ja yal chan jawi, ti oj chak stsik spetsanila. Ti'xta a ja juni, lajan xa ts'ika sok ja chej b'a jun jab'ili. Jach' oj ch'ayi ja smul yuj ja lom syama yi ja sb'ak'tel ja cham winiki, jaxa winik jawi, ojni cho b'ob' a'tijuk jmok pilan majke'a.
—Yuj ja lom sta'a smuli, mi oj na'xuk ja k'ak'u jumasa janek' a'tiji jan jmoki. Ti oj k'e' stulyi yajk'achil ja ya'tel ja yajni ch'akta ya'yi ja smajtan ja Dyosi.
13—Ja winik jawi, yajnix ts'ikwi yuj ja k'ak'u jumasa oj a'tijuk jmoki, t'ilan ti oj waj tek'an b'a wax ajyi ochel b'a snajtsil tsomjeli 14b'a oj ya'ki ja jmajtan jumasa iti: Jun chej b'a jun jab'il b'a mey syajb'el, ja jawi, oj ya'ki jastal jun jmajtan b'a oj tsikxuk spetsanil, jun nan chej b'a jun jab'il b'a mey syajb'el, b'a oj ch'ayi yi ja smuli, tsa'an oj ya'ki jun waw chej b'a mey syajb'el, b'a jach' laman oj ajyuk jmok ja winik jawi.
15—Mi kechanuka, oj cho yi' och jun mo'och pan sok waj b'a mey slevadura'il, b'a tojb'el sok lekil arina wots'ob'al sok aceite, oj yi' och sok lajan ja tuk smajtan ja Dyosi, k'ilub'al sat te' sok ya'lel ts'usub'.
16-19—Ja'xa pagre oj ya'ki ja mo'och sok ja pan jumasa, ja k'ilub'al sat te', sok ja ya'lel ts'usub'i. Tsa'an ja winik ma tsa'ub'al wax a'tiji jmoki, ti oj sjox el ja stso'otsil s'olom b'a wax ajyi ochel b'a snajtsil tsomjeli, ja tso'otsil olomal jawi ja pagre lajan oj ts'ik sok ja jmajtan oj ya'ki b'a laman oj ajyuki. Tsa'an yuj ja iti, ja pagre oj ya'yi ja winik ma tsa'ub'al ja ste'il spatik ja b'akb'el cheji, sok jun pan sok jun waj b'a mey slevadura'il.
20—Jaxa pagre, ti oj snik ja sxa'ax ja wa'el sok ja sb'akel yechmal ja jmajtan wax a'ji ki'i. Ja b'ak'et jumasa jawi, tsa'ub'al kechan ye'n oj b'ob' yi' ja pagre jumasa. Tsa'an yajnix ch'ak sk'u'luke ja jastal iti, ja winik ma tsa'ub'ali, ojxa b'ob' yu' ja ya'lel ts'usub'i.
21—Ja iti, ja t'ilan oj sk'u'luk ja ma' spilata sb'aj b'a oj a'tijuk jmoki, sok ja majtanal jumasa it ja t'ilan oj ya'ki'i, mi kechanuka, oj b'ob' cho ya'ki ja tuk jastik jumasa ta wan k'a sk'ana. Ja jel t'ilani, ja a sk'u'l spetsanil ja jas yaloj oj sk'u'luki—.
Ja slekil oj sta' ja pagre jumasa
22Mi kechanuka, ja Dyosi, cho yal yab' ja Moisesi:
23—Ala yab' ja Aaron sok ja yuntikil jumasa, jach' tsamal oj sta'e ti' jastal it ja israelenio jumasa:
24—Jel lek oj yil'a ja Dyosi
sok spetsanil k'ak'u oj stalnaya;
25ja Dyosi, jel tsamal wa sk'elawa
oj cho sje'a wi, ja syajal sk'ujoli;
26ja Dyosi, jel tsamal wa sk'elawa
laman lek oj ya ajyan—.
27—Yajni oj yal ja pagre jumasa, ja slekil jumasa iti, ke'n oj ka waj smeranil—.
Currently Selected:
Numeros 6: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
