Numeros 5
5
Ja jastal oj schol sb'aj ja na'itsaltiki
1Ja Dyosi, yal yab' ja Moisesi:
2-3—B'a oj yab' ja israelenio jumasa, a'b'i ch'ak ya'we el ja b'a cholan ja na'its jumasa spetsanil ixuk ma winik ja ma' ay yi'oj ja chamel jumasa iti: jun ixuk ma' tey sok ja schameli, ma ay ma k'a'el sb'ak'tel, ma yuj syamunej jun cham winik. B'a jach' mi oj sk'u'le yi b'a mi lekuk ja b'a wala ajyiyon soke ja ke'n.
4Ja israelenio jumasa, sk'u'ane ja jas wax yala ja Dyos it a'jiyi ja Moisesi, ch'ak ya'we el spetsanil ja kristyano jumasa jastal jawi.
Ja tuktukil jas oj k'u'laxuki
5Tsa'an ja Dyosi, yal yab' ja Moisesi:
6—Al yab' ja israelenio jumasa, ay k'a ma wax elk'ani ma wa sk'u'lan yi b'a mi lekuk ja jas sb'aj ja smoji, ke'nani wa sk'u'lan ki' b'a mi sb'ejuka, sok wani sta'a smula, 7ja smuli jach' oj stup jastal iti: Oj ch'ak ya kumxuk ja jas yi'aj yi ja smoji, ojxa ek'uk yuj janek' yi'aji. 8Yuj k'a chamta ja ma' mi sb'ejuk k'u'laji yi'i, ja jas oj kumxuki mi oj b'ob' a'juk yi junuk ja smoj alijeli, ja' oj a'juk yi ja Dyosi, oj b'ob' ya makunuk ye'n ja pagre. Ja ma elk'ani, oj yi' ochyi jun chej ja pagre b'a oj ya'yi ja Dyosi, b'a jach' oj ch'ay juk yi ja smuli.
9-10—Spetsanil ja majtanal jumasa it oj i'juk och yi ja Dyos yuj ja kristyano'i, ja'ni sb'a ja pagre jumasa'a.
Ja jas oj k'u'laxuk sok ja ma' wa sle'a mul sok ja sb'ak'teli
11Ja Dyosi, yal yab' jastik oj sk'u'luk ja Moisesi, ti yal yab'a:
12-13—Al yab' ja israelenio jumasa: Yuj k'a jun ixuk mi tojuk ay sok ja statami, wan k'a sta'a sb'aj sok pilan winik, mi k'a ma' sna'a ja jas sk'u'lani, cho mini ja statami. 14Oj b'ob' ek' sk'ujol ja tatamal yuj ay jastal ay sok ja sche'umi, oj b'ob' ek' sk'ujol yuj wax lo'laji yuj ja sche'umi, a'nima mi jachukuk.
15—Ta yuj k'a jach' ay jastal jawi, ja tatamal jawi oj yi' och yi ja pagre ja sche'umi, oj cho yi' och chab' kilo chok'b'el sebada b'a smajtan ja Dyosi. Yuj ja majtanal jawi, sb'a jun tatamal b'a wax ek' sk'ujol b'a mi lekuk sok ja sche'umi, wa sk'ana oj sna' ta mi yuj wa'nuk lo'lajel, ja'yuj mi oj pek'xuk sb'aj aceite sok mini pom oj och sb'aj.
16—Ja pagre, ti wax yal yab' ja ixuk a och mojan, sok ti wax ya' tek'an b'a sti' sat ja Dyosi. 17Tsa'an ja pagre ti wax yi'a jan t'un ja' b'a tsa'ub'al, ti wax ya ochyi t'un sts'ub'il ja lu'um b'a snajtsil tsomjeli.
18—Ja pagre ti oj yi'och ja ixuk b'a sti sat ja Dyosi, oj spa'yi ja stso'otsil s'olom b'a oj sje' yuj wa'n ya'jel stup ja smuli, oj ya syam ja ixuk ja smajtan ja Dyosi, jaxa ye'n ja pagre ja oj syam ja k'ajal ja' it wax a'ji k'e' syajal slukum ja ma ko'el mulali. 19Jaxa pagre jach' oj ya yal jastal it ja ixuki, ti yal yab'a: Ta yuj k'a mi wa'nuka slo'lajel wa tatami, cho mi k'a a ta'unejuk a b'aj sok tuk winik, oj k'anyi ja Dyos mi jas wokol oj ek'uk a wuj ja yajnixa wu'aj ja k'ajal ja' iti. 20Kechan ta yuj k'a mi toj ayuka, wa'na k'a slo'lajel a b'aj sok tuk winik, 21-22Oj k'anyi ja Dyos jach' oj ya'a tup jastal iti, yajnixa wu'aj ja ja' iti, oj sits' wa lukumi, sok mi oj b'ob' ajyuk a wuntikil. Ja jastal jawi, oj makunuk lek b'a a petsanilex, ja wa muli jach oj ja tup jastal jawi.
—Jaxa ixuki, ti oj yala: Jach'ni'a, jach'ni'a.
23—Ja'yuj ja jastal it mi sb'ejuki, oj sts'ijb'a ja pagre, sok ja oj sch'ay sok ja k'ajal ja'i. 24Tsa'an ti'xa oj ya yu' ja ixuk ja k'ajal ja'i, 25jaxa ixuki, ti'xa ya'yi b'a sk'ab' ja pagre ja smajtan ja Dyosi, b'a ye'n oj ya'yi b'a sat yaltar. 26Ja pagre oj ya el jun b'eche sat trigo b'a smajtan ja Dyosi, b'a ti oj stsik b'a sat altar, b'a ti oj na'juk yuj ja Dyos ja ma ya'a ja majtanal iti.
—Jaxa ixuki, ti'xa oj yu' ja k'ajal ja' jawa, 27yuj k'a slo'lonej ja statami, ojni a'ji k'e syajal slukum yuj ja ja' jawa, ja slukumi oj sits'uk, sok mi oj yil sat yuntikil. Ja iti, spetsanil ja kristyano jel oj makunuk yujile.
28—Ta mik'a slo'lonejuk ja statami, mi jas oj sk'u'luk sok ojni yil sat yuntikila.
29—Jach' oj k'u'laxuk yi jastal it ja ixuk ma wa slo'la sb'aj sok tuk winiki. Yuj k'a och ek' sk'ujol b'a mi sb'ejuk ja statami, 30ay sb'ej ma mey sb'ej kechan t'ilan oj yi' och ja sche'um b'a sti sat ja Dyosi, jaxa pagre jach' oj sk'u'l spetsanil ja jastal kalata. 31Ja tatamali, mi jas oj b'ob' k'u'laxuk yi, kechan ta yuj k'a ay jas mi sb'ejuk sk'u'lan ja ixuki, ojni a'ji stupa.
Currently Selected:
Numeros 5: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
