Numeros 35
35
Ja chonab' sb'a yintil jumasa ja Levi
1Ja ajni ti aye ja kristyano b'a job'iltik Moab it tey lajan sok ja niwan ja' Jordan b'a sti' chonab' Jerico, ti alji yab' ja Moises yuj ja Dyosi:
2-3—Ala yabye ja k'ole jumasa yuj ja israelenio, spetsanil ja chonab' jumasa tey yoj slu'ume'i, t'ilan oj ya'weyi chab' oxuk chonab' ja yintil jumasa ja Levi, oj ya'we sta' sb'a sok ja lu'um b'a joyb'anub'ale yuji. Cho jach'ni ja ye'nle'i, oj sta b'a oj ajuke'a, ja swakaxe'i, oj sta b'a oj sle' swa'ele'a.
4-5—Ja lu'um jumasa jaw b'a oj a'juk yi'e ja yintil jumasa ja Levi junxta b'a schanil sts'e'el, t'ilan oj ajyuk b'alune syen (900) metro b'a jujune st'e'el b'a yojoli, jaxa b'a sjoyanal ja chonab' b'a jwera, t'ilan oj ajyuk chane syen chab' tajb'e sok lajune (450) metro.
6-7—Ja b'a oj ja wa'wex yi ja yintil jumasa ja Levi chab' tajb'e sok waxake (48) chonab', b'a jujune oj ja wa'wex kanyi b'a oj wa'uk ja schanste'e'i. B'a spetsanil ja chonab' jumasa jawi, wake chonab' kechan oj makunuk b'a oj skoltaye ja ma wa sta'a niwak wokoli. Ta ay k'a ma jun ch'ay k'ujol smila jun smoj alijel oj b'ob' wa sle' skoltajel ja b'a chonab' jumasa jawi; sok mi ma oj b'ob' k'u'ljuk yi b'a mi sb'ejuk. 8B'a oj na'xuk jaye chonab' oj ya' b'a jujun k'ole'i, jach' oj ja k'u'l jastal iti: Ja k'ole ma ay yi'oj jitsan lu'umi, oj ya' jitsan chonab' ja ye'nle'i; jaxa ma'tik ch'in yi'oje ja lu'umi, t'usani chonab' oj ya'e ja ye'nle'a.
Ja chonab' jumasa b'a oj tax koltajeli
9Mi kechanuka, ja Dyosi, yal yab' ja Moisesi:
10—Jel t'ilan jach' oj sk'u'l jastal it ja israelenio jumasa, ja yajni oj sk'uts e' ja niwan ja' Jordan b'a oj ochuke b'a slujmal b'a Canaani: 11-15Oj spil'e wake chonab' b'a oj makunuk b'a oj skoltaye ja ta ay k'a ma ch'ay k'ujol smila jun smoj alijeli. Ja chonab' jumasa jawi, oxe tey b'a jun sti' ja niwan ja' Jordani, jaxa oxe'i, tey b'a slujmal Canaan.
—Ta ay k'a ma smila jun smoj jun ch'ay k'ujol, oj b'ob' spak ajnel oj b'ob' skolta sb'aj b'a junuk ja chonab' jumasa jawi. Jachuk oj b'ob' sta' skoltajel ja ma milwani, ta yuj k'a ay smoj alijel ja chamel winik wa sk'ana oj le'juk yuj b'a oj miljuki. Kechanxta yuj, ja winik jaw ma oj k'ot sle' skoltajel b'a chonab' jawi, ja swinkil ja chonab' jawi, oj sk'el'e yi ja smuli, ye'n oj yal'e ta sb'ej oj chamuk ma miyuk. Ja ma oj sle' ja mulal jumasa jastal iti ojni chamuka:
16—Ja ma oj milwanuk sok jun mak'e tak'ini.
17—Ja ma oj milwanuk sok toni.
18—Ja ma oj milwanuk sok te'i. 19Ja smoj alijel ja cham winiki, oj sle' ja ma milwani, b'a oj cho smil ja ye'n.
20—Ja ma tajkel sjipa lu'um june, sok toj chamel waji.
—Ja ma oj milwanuk yuj tajkel sjipa sb'aj jun chikan jasunk'a.
21—Ja ma oj milwanuk yuj tajkel wa'n mak'waneli, ja smoj alijel ja cham winiki, oj sle' ja ma milwani b'a oj cho milwanuk ja ye'n.
22—Jaxa ma' jach' oj sk'u'l jastal iti, mi oj milxuk ja ye'n:
—Ta ay ma oj sjip lu'um june sok toj chamel waji, mi yujni jach' wa sk'ana oj sk'u'l yi'i.
—Ja ma jun ch'ay k'ujol smila june yuj sjipa sb'aj jun chikan jasunk'a.
23—Ja ma ch'ay k'ujol st'ena ton june sok chami. Ta yuj k'a lek wax yila sb'aje'i, mi yuj b'a mi lek wax yila sb'aje'i, mi yuj jach' wa sk'ana oj sk'u'lanyi.
Toj oj yi' sb'ejlal
24—Jach' sb'ej oj ja k'el'ex jastal it ja ma mi sb'ejuk oj chamuki: 25-28Ja kristyano jumasa wa skolta ja ma wax milwani, ja ta yuj k'a mi jach' wa'n yaljel oj sk'u'luki, sok mi oj sk'an'e oj miljuk yuj ja smoj alijel ja cham winiki. Ja'yuj ja milwanum jawi, ti oj i'juk och yuj ja swinkil ja chonab' jumasa b'a oj sta' skoltajeli. Yajni ti'xa ay k'ot b'a chonab' jaw ja winik jawi, sta'atani skoltajela, sok mini jun ma oj k'u'lajuk yi b'a mi sb'ejuka. Kechanxta yuj, ja janek' oj ajyuk sak'anil ja ma' niwan ja ya'tel yuj ja pagre jumasa, mini oj b'ob' eluk ja b'a chonab' ja wa, yajnix ch'ay sna'jel ja ye'nle'i, ojxa b'ob' kumxuk b'a snaje, cho mini ma oj b'ob' k'u'ljuk yi' b'a mi sb'ejuk yuj ja. Kechan ta mik'a sk'u'an, elk'a b'a chonab'i cho sak'anto ja ma'tik niwak ya'tele ajyi, ojni b'ob' miljuk yuj ja smoj alijel ja chamel winika sok mini oj sta' smule'a.
29—Ja'yuj ja we'nlexi, chikan b'a kulanexa, jel t'ilan oj ja k'u'ukex b'a spetsanil k'ak'u ja ab'al jumasa iti.
30—Ta ay k'a ma' wax milwani, ojni cho miljuk ja ye'na, ta yuj k'a ay chab'e ja ma' yila sok wax yala yujni ye'n milwani'a, ta yuj k'a kechan june ja ma' wax yala, mi sb'ejuk oj chamuk. 31Yuj k'a ay ma milwanita, jach'ni ja ye'n ojni cho miljuka, a'nima wax yala oj ya' jun multa mini oj b'ob' skolta sb'aj ja. Ojni miljuka.
32—Ja ma' tey b'a junuk ja chonab' jumasa b'a wa skolta sb'a ja ma wa sta'a smuli, yajni ojxa eluk oj waj b'a snaji, mi sb'ejuk oj stupe. Kechan, t'ilan oj smajla oj chamuk ja ma'tik niwak ja ya'tel yuj ja pagre jumasa.
33-34—Ta oj k'a a jip'ex kan ja b'a kulanexi, ja ke'n ti'ni ayon a mokexa yuj ja ke'na ni ja wa Dyosonexa, mix b'ob' ajyukon b'a toj milwanum ay, kechani ta oj ch'ak milxuk ja ma wax milwani, b'a oj makunuk kuj ja b'a'ye'i.
Currently Selected:
Numeros 35: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
