Numeros 36
36
Ja slu'ume ja ixuk jumasa
1Jun k'ak'u ja ma'tik niwan ya'tel yuj ja yintil jumasa ja Galaadi, cho ti aye sok ja k'ole b'a Manasesi, waj sk'umuke ja Moises b'a sti' sat ja ma'tik niwak ya'tel yuj ja k'ole jumasa sb'a israelenio, ti yalawe'a:
2—Ja Dyosi, yala wab' oj ja wil jastal ma' oj ko' sb'aj ja jastal oj ja k'ep yi ja slu'ume ja israelenio jumasa. Ja slu'um ye'n ja jmoj alijeltikon Selofhadi, ja a wa'yi ja yuntikil ixuk jumasa. 3Jasa, wax ya'we cham jk'ujoltikon ja lek oj nupanuke sok winike b'a pilan k'ole'i. Ta yuj k'a jach' waj jastal jawi, ja lu'um yi'oje'i, oj ya'we ek' b'a sk'ab' pilan k'ole winike jumasa, yujni oj sb'ajuke lajan sok ja statame'a, jaxa ke'ntikoni oj ch'ay kujtikon ja lu'um jumasa jaw it a wa'ki'tikoni. 4Ja'yuj, ja yajnix el k'ot ja jab'il b'a wax elye yib' k'ab'ali, jaxa ye'nle'i, ti'xani oj yi'ekan ja jlu'umtikon jumasa'a. Jaxa k'ole ke'ntikoni ojni b'ob' ch'ayujile ja jlu'umtikon b'a a'jiye'i.
5Ja Dyosi, ti yal yab' ja Moises ja jas oj sk'u'luki. Jaxa Moisesi, ti yal yab' ja israelenio jumasa:
—Ja jas wax yalawe ja k'ole jumasa sb'a Manasesi, ayni sb'eja. 6-9Yuj ja yalani kab' ja Dyosi, ja yuntikil ixuk ja Selofhadi, oj b'ob' stsa'e jun winiki ma oj nupanuke sok ja b'a k'ole aye'i. Jach' oj sk'u'l spetsanil ja k'ole jumasa: Ay k'a jun ixuk yi'ajta yi ja slu'um ja smoj alijeli, t'ilan oj nupanuk sok jun winik b'a k'ole aye'i. B'a jach' mi oj waj sok pilan k'ole ja lu'umi, b'a jujun k'ole t'ilan oj stalnane ja lu'um a'jiyi'e'i.
10-11Ja'yuj ja yuntikil ja Selofhadi, jach' sk'u'lane ja jastal alji yab' ja Moises yuj ja Dyosi, ja ma nupaniye soki smoj alijele, ja sb'i'ile ja ak'ixuk jumasa jawi ja iti, Mahla, Tirsa, Hogla, sok Noa, 12ti aye sok ja k'ole sb'a Manasesi. Jachuk ja slu'ume'i, ti'ni ajyi sok ja k'ole b'a ajyi ja state'i.
13Ja it jumasa ja jas ch'ak yal ja Dyos it a'jiyi'e ja israelenio jumasa yuj ja Moises ja yajni ti aye b'a job'iltik Moabi, ja it ti lajan ay sok ja niwan ja' Jordani, sok tey b'a sti' ja chonab' Jerico.
Currently Selected:
Numeros 36: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
